Elşən Mustafayev: "Sevindirici haldır ki, bu, ənənəyə çevrilib"
Azərbaycan və Türkiyənin xarici işlər nazirlikləri arasında siyasi məsləhətləşmələrin növbəti mərhələsi keçirilib. Məsləhətləşmələrdə Azərbaycan tərəfini xarici işlər nazirinin müavini Xələf Xələfov, Türkiyə tərəfini isə xarici işlər nazirinin müavini Ümit Yalçın təmsil edib.
Xarici İşlər Nazirliyinin mətbuat xidmətindən bildirilib ki, görüşdə ölkələrimiz arasında əlaqələrin qardaşlıq və dostluq prinsiplərinə əsaslanaraq bütün sahələrdə yüksələn xətlə inkişaf etdiyi vurğulanıb, bu əlaqələrin yalnız ikitərəfli münasibətlər çərçivəsində deyil, eyni zamanda, beynəlxalq təşkilatlar səviyyəsində hər iki ölkənin maraqlarına cavab verən şəkildə həyata keçirildiyi diqqətə çatdırılıb. Ümummilli lider Heydər Əliyevin "bir millət, iki dövlət" kəlamının Azərbaycan və Türkiyə arasında milli, tarixi, mədəni köklərə əsaslanan qardaşlıq və dostluğun səciyyəvi rəmzi olduğu ifadə olunub.
Son zamanlar Türkiyədə baş verən hadisələrin Azərbaycanda diqqətlə izləndiyi, bu hadisələrin Türkiyənin daxili və xarici siyasətindəki sabitliyin pozulmasına yönəldiyi ilə bağlı narahatlığımız dilə gətirilib, terrorun bütün forma və təzahürlərini qınadığımız, Azərbaycanın Türkiyəyə daim dəstək verdiyi və onun yanında olduğu bildirilib. Türkiyə və türk xalqının bu çətinlikləri tezliklə dəf edəcəyi və tarixin bu sınağından qalibiyyətlə çıxacağına birgə əminlik ifadə edilib.
Həmçinin Türkiyə ilə Azərbaycan-Türkiyə-İran, Azərbaycan-Türkiyə-Gürcüstan, Azərbaycan-Türkiyə-Türkmənistan kimi üçtərəfli formatlarda əməkdaşlıqdan məmnunluq ifadə edilib, bunun regional əməkdaşlığın inkişafına önəmli töhfələr verdiyi qeyd olunub. Ölkələrimiz arasında çoxtərəfli əsasda birgə fəaliyyətin və qarşılıqlı dəstəyin davam etdirilməsinin əhəmiyyəti vurğulanıb.
Ermənistan-Azərbaycan, Dağlıq Qarabağ münaqişəsinin beynəlxalq hüququn norma və prinsiplərinə uyğun olaraq, Azərbaycan Respublikasının ərazi bütövlüyü və suverenliyi çərçivəsində həlli istiqamətində birgə səylərin artırılmasına diqqət çəkilib.
Görüşdə, həmçinin, Yaxın Şərq problemləri, beynəlxalq terrorizmə qarşı mübarizə, regional münaqişələrin həll edilməsi, qonşuluq siyasəti və qarşılıqlı maraq kəsb edən digər beynəlxalq məsələlər müzakirə edilib.
İki ölkənin diplomatları arasında belə məsləhətləşmənin aparılması nəyin əlaməti sayıla bilər?
Ekspert Elşən Mustafayev qəzetimizə açıqlamasında bildirdi ki, bu, ölkələrimiz arasındakı qardaşlıq və hədsiz yaxınlıq münasibətinin təzahürü sayıla bilər: "Müstəqillik əldə edəndən sonra bizim diplomatiyamız Türkiyə ilə eyni hədəfə vurub. Bunun bir sıra səbəbləri var. Birincisi, biz eyni milləti təmsil edən fərqli dövlətlərik. İkincisi, qonşu olmaqla yanaşı, həm də başqa mənfur qonşumuzun eyni anda hədəfinə tuş gəlirik. Biz ermənilərin işğalından, Türkiyə isə qondarma "soyqırım" ittihamlarından əziyyət çəkir. Bu istiqamətdə mübarizəmiz bir olub. Son dövrlər Türkiyəyə təzyiqlər artıb. Təəssüflər olsun ki, bu təzyiqlər qeyri-sivil üsullarla aparılır. Əsasən də bütün dünyanın lənətlədiyi terrordan daha çox istifadə edilir. Yəni bu cür təmaslar vaxtında edilib. Biz hər iki ölkənin həyatında yaşanan narahatlıq zamanı belə yaxınlığı hiss etmişik. Sevindirici haldır ki, bu, ənənəyə çevrilib. Eyni zamanda ölkələrimizin digər dövlətlərlə birgə əməkdaşlığa önəm verməsi və bu istiqamətdə məsləhətləşmələrin aparılması çox ürəkaçandır".
Məhəmmədəli QƏRİBLİ