Ermənistanda gələn ilin aprelində keçirilməsi nəzərdə tutulan parlament seçkiləri ilə bağlı bu ölkənin siyasi həyatında indidən aktivlik müşahidə olunmaqdadır. Serj Sarkisyan iqtidarı, saxtakarlıq yolu ilə olsa belə, bu seçkilərdə qalibiyyətini təmin etməyi düşünürdüsə, cari ilin aprelində cəbhədə baş verən hadisələr bunun heç də asan olmayacağını ortaya qoydu.
Məlumdur ki, məhz aprel müharibəsi Sarkisyanın komandasında çoxsaylı yeniliklər və dəyişikliklər etməsi ilə nəticələndi. O cümlədən sabiq müdafiə naziri Seyran Ohanyan istefaya göndərildi. Amma istefaya çıxanlar Sarkisyanın onları aprel müharibəsinə görə qurban verməsi ilə barışmaq niyyətində deyil. Məhz bu səbəbdən onlar indi Sarkisyana qarşı yeni vahid cəbhə yaratmaq istiqamətində fəaliyyətlərini genişləndirir. Bu qüvvələrə Rusiya erməniləri tərfindən maliyyə və digər dəstək verilməsi isə Sarkisyanın durumunu daha da çətinləşdirir.
Hələlik isə məlumdur ki, Seyran Ohanyan parlament seçkisinə yeni siyasi blokun tərkibində qatılacaq. "Past" qəzeti özünün etibarlı mənbələrinə istinadən bildirir ki, bu blokun maliyyələşdirilməsini Ermənilərin Rusiyadakı İttifaqının rəhbəri Ara Abramyan həyata keçirəcək. Abramyanı blokda Ermənistan Demokrat Partiyasının sədri Aram Sarkisyan təmsil edəcək. Blokun seçkidə əsas namizədi məhz Ohanyan olacaq. İndi iddialar səslənir ki, Serj Sarkisyanın gələn ilin parlament seçkiləri ilə hakimiyyətdən devrilməsi Seyran Ohanyanın vasitəsilə həyata keçiriləcək. Demək olar ki, cəmiyyət daxilində bütün sütunlarını itirən Sarkisyanın hazırda əsas rəqibi məhz Ohanyan, həmçinin, sabiq prezident Robert Köçəryan və Levon Ter-Petrosyanın ətrafında cəmlənən qüvvələr sayılır. Sarkisyanın Levon Ter-Petrosyanla birləşərək Seyran Ohanyan və Robert Köçəryana qarşı çıxmaq cəhdləri isə nəticə verməyib. İndi Seyran Ohanyanı maliyyələşdirən Ara Abramyan da Sarkisyanı sevməyənlər sırasında yer alır. Moskvada isə Köçəryanla Abramyan bir neçə dəfə görüş keçirib. Rusiyadakı ermənilərin lideri həmçinin Kremlə yaxınlığı ilə seçilir və birbaşa onun diqtələri əsasında hərəkət edir.
Ümumiyyətlə, hələ ötən ildən Ara Abramyan Ermənistanda siyasi fəaliyyətə başladığını təsdiqləyib. Hələ o vaxtdan erməni hakimiyyətinin nəzarətində olan media vasitələrində Abramyana qarşı tənqidlər artırılıb. Onun intellektual səviyyəsi, siyasəti qabiliyyəti tənqid olunub. İndi əksər müşahidəçilər hesab edir ki, Abramyan və onun partiyası Serj Sarkisyanın iqtidarına qarşı potensial əks-gücdür. Bir daha xatırladaq ki, Sarkisyan son konstitusiya islahatlarından sonra Ermənistanı parlament respublikasına çevirib, növbəti çağırışda hakimiyyətini qorumaq istəyir. Amma bunun üçün onun partiyası parlamentdə əksər yerlərin sahibi olmalıdır. Böyük maliyyə iimkanlarına malik Abramyan isə, görünür, buna imkan vermək niyyətində deyil: "Mən hər zaman Ermənistan barədə düşünmüşəm. Moksvada heç bir problemim yoxdur. Mən böyük uğurlara çatmışam və maliyyə vəziyyətim yaxşıdır. Amma bilirəm ki, Ermənistanda problemlər var. Bu da mənə vicdan rahatlığı vermir. Bizim konkret iqtisadi proqramımız var və onun üzərində çalışıram".
Qeyd edək ki, Abramyan Rusiyada tikinti və digər sahələrə investisiya qoyub. Əvvəllər Ermənistan vətəndaşı olmuş Abramyan, ölkə konstitusiyasına görə, yüksək seçkili vəzifə tuta bilməz. Məhz bu səbəbdən o, indi əsas stavkanı Seyran Ohanyana edir. Abramyan Ermənistanda onu dəstəkləyən bütün qüvvələrə yardım edəcəyini də açıq bildirir: "Heç bir güc məni dayandıra bilməz. Pis bir şey eləmirəm ki, qorxam. Qoy o adamlar qorxsunlar ki, bu gün çox danışırlar. Fikirləşirəm ki, gün gələcək, hər kəs cavabını alacaq. Mənə hücum edənlər yerini itirəcəyindən qorxanlardır". "Jamanak" qəzeti özünün etibarlı mənbələrinə istinadən bildirir ki, Seyran Ohanyanın siyasi fəaliyyətini həm də Robert Köçəryan koordinasiya edəcək. Qəzet Ohanyanın bütün köçəryanyönlü qüvvələrin birləşdirilməsi üçün əsas mərkəz rolunu oynayacağını bildirib. Bu vəziyyətdə Sarkisyan, son çıxış yolu kimi, Seyran Ohanyana qarşı inzibati metodlardan istifadəyə daha çox diqqət yetirir. Belə ki, Ermənistanın yeni təyin olunmuş müdafiə naziri Vigen Sarkisyan 2016-cı il üçün Müdafiə Nazirliyinin büdcə xərclərinin, eləcə də şirkətlərlə bağlanan müqavilələr və onların yerinə yetirilmə mərhələlərinin yoxlanması barədə tapşırıq verib. Ermənistan mediasında yayılan xəbərə görə, buna səbəb Ermənistan Müdafiə Nazirliyinin ehtiyaclarını qarşılamaq üçün elan edilən tenderlərin Seyran Ohanyan və yaxın ətrafına məxsus şirkətlər tərəfindən saxta üsullarla udulması barədə kifayət qədər dəlillərin mövcud olmasıdır. Bu günə qədər komissiya tərəfindən aparılan araşdırmalar nəticəsində məlum olub ki, Ohanyana məxsus, İrəvan şəhəri, Tumanyan küçəsi, ev 21 ünvanında qeydiyyatda olan "Hesperus" QSC Ermənistan ordusunu geyimlə təchiz etmək üçün ümumi olaraq 7, 67 milyon dram məbləğində pul vəsaitini mənimsəyərək öhdəliyi yerinə yetirməyib. Həmçinin Ohanayana məxsus "Eko Plastik" şirkəti Ermənistan Müdafiə nazirliyinin ehtiyacları üçün 196 milyon dram dəyərində "plastik boru" tədarük etməli olduğu halda, həmin məbləğ mənimsənilərək öhdəlik yerinə yetirilməyib. Bu isə Ohanyanın, lazım gələrsə, hüquq-mühafizə orqanları vasitəsilə sıradan çıxarılmasını istisna etmir.
Tahir TAĞIYEV