Qardaş Türkiyənin bütün tələblərinə baxmayaraq, indiki ABŞ administrasiyası Fətullahçı Terror Təşkilatının (FETÖ) lideri Fətullah Gülənin Ankaraya təhvil verilməsini uzadır. Amma belə görünür, Fətullah Güləni ABŞ-dan bu gedişlə təkcə Türkiyə yox, həm də Rusiya tələb edəcək.
Artıq Moskvanın bu istiqamətdə konkret addımlar ata biləcəyinə dair fikirlər də səslənir. Bunun əsas səbəbi Rusiyanın Türkiyədəki səfiri Andrey Karlovun sui-qəsd nəticəsində öldürülməsində başlıca şübhəli qismində məhz FETÖ-nün çıxış etməsidir.
Ankaranın Cankaya bələdiyyəsinin Müasir İncəsənət Mərkəzində təşkil etdiyi rəsm sərgisinin açılış mərasimində törədilən bu qətlə Rusiya prezidenti Vladimir Putin də çox sərt reaksiya verib. O, ölkəsinin Ankaradakı səfirinə silahlı hücumu təxribat kimi xarakterizə edib və bunun Suriyadakı sülh prosesinə qarşı yönəldiyini bildirib: "Buna yalnız bir cavab ola bilər: terrorla mübarizənin gücləndirilməsi". Digər tərəfdən Vladimir Putin ənənəvi böyük mətbuat konfransında bu xüsusda verdiyi açıqlamada qəsdin arxasında Türkiyədən kənarda olan qüvvələrin durduğuna növbəti dəfə eyham vurub: "Bizim Su-24 təyyarəsinin Türkiyə rəhbərliyinin əmri olmadan vurulduğu haqda deyilənlərə şübhə ilə yanaşırdım. Lakin səfirin qətlindən sonra fikrim dəyişdi və inanmağa başladım ki, hər şey ola bilər". İndi Türkiyənin adının açıqlanmayan yüksək səviyyəli rəsmisi yerli mediaya bildirib ki, Rusiya da FETÖ liderini ABŞ-dan tələb edə bilər.: "Qlobal səviyyədə bir əməliyyat başlayır. Qarşıdakı günlərdə Rusiya Güləni ABŞ-dan istəyə bilər. Səfir beynəlxalq hüquqa görə ikinci dövlət adamı sayılır. Rusiya da hüquqi haqlarından istifadə edərək bu addımı ata bilər".
Burada onu da xatırladaq ki, Türkiyə prezidenti Rəcəb Tayyib Ərdoğan da bildirib ki, Rusiyanın Türkiyədəki səfirini qətlə yetirən şəxs Fətullah Gülənin yaratdığı terror təşkilatının üzvüdür. Onun sözlərinə görə, istintaq Rusiyanın Türkiyədəki səfiri Andrey Karlovun qatilinin Fəthullah Gülənin təşkilatı ilə əlaqəli olduğunu müəyyən edib: "O adam FETÖ-nun üzvü olub, bunu gizlətməyə lüzum yoxdur. Açıq şəkildə etiraf etməliyik ki, polis strukturlarımız və ordu sıralarımızda bu çirkin təşkilatın üzvləri hələ də qalmaqdadır. Terror təşkilatına qarşı mübarizə bundan sonra da davam etdiriləcək və dövlət qurumları FETÖ-dən təmizlənəcək". Onun sözlərinə görə, səfir Karlovun qətli ilə əlaqədar istintaqa rusiyalı müstəntiqlər də qoşulub:"Güman edirəm ki, yaxın müddət ərzində istintaqın gedişi ilə bağlı nəticələr əldə olunaraq ictimaiyyətə təqdim ediləcək". Beləliklə, rus səfiri FETÖ qətlə yetirdiyindən, onun liderinin ekstradisiyasını Rusiya da tələb edə bilər. Hazırda Pensilvaniyada yaşayan Fətullah Gülənin ya Rusiya, ya da Türkiyəyə verilməsinin isə Donald Trampın rəsmən vəzifəsinin icrasına başlamasından sonra mümkün olacağı istisna edilmir. Donald Tramp rəsmi şəkildə postunda əyləşənə qədər, hesab olunur ki, Gülən məsələsi indiki şəkildə qalacaq. Yəni Barak Obama administrasiyası hakimiyyətlə vidalaşana qədər bu məsələdə heç nə dəyişməyəcək. Türkiyənin Gülənin ekstradisiya olunması ilə bağlı müraciətinə də yanvarın 20-ə qədər mənfi cavab veriləcək. Halbuki, Türkiyə tərəfi həm məlum dövlət çevrilişinin, həm də səfirin qətlinin Gülən tərəfindən planlaşdırıldığını açıq bildirir. İndiyə qədər Gülənlə bağlı ABŞ-a göndərilən dosyelər məhkəmə tərəfindən araşdırılsa da, ABŞ ekstradisiya məsələsində konkret addımlar atmır. Amma Rusiyanın məsələyə qarışması, həm də ABŞ-da hakimiyyət dəyişiklyi vəziyyəti dəyişə bilər.
Bu arada onu da qeyd edək ki, FETÖ-nün Türkiyədə dövlət çevrilişinə cəhdində iştirakda şübhəli bilinən 101 min 799 nəfər istintaqa cəlb edilib. Onlardan 40 min 832 nəfəri barəsində həbs qətimkan tədbiri seçilib. Bundan başqa, FETÖ-yə üzv olmaqda şübhəli bilinən 34 min 907 nəfər istintaqa cəlb edilib. Onların 9 min 795 nəfəri sərbəst buraxılıb. Amma səfirlə bağlı son hadisələr göstərdi ki, Türkiyədə müxtəlif orqanlarda çalışan FETÖ üzvlərini hələ tam neytrallaşdırmaq mümkün olmayıb. Bu səbəbdən onlara qarşı əməliyyatlar getdikcə genişlənir.
Nahid SALAYEV