Qabil Hüseynli: "Ermənistan öz daxilindən olan nüfuzlu və ictimai rəyə təsir etmək qabiliyyətinə malik şəxsin təkliflərinə bu cür aqressiya nümayiş etdirirsə..."
Ermənistan hakimiyyətindən eks-prezident Levon Ter-Petrosyanın Qarabağda sülhə və kompromislərə çağıran çıxışına reaksiyalar verilib. Ter-Petrosyanın çıxışına müdafiə naziri Vigen Sarkisyan reaksiya verib.
Nazir eks-prezidentin erməni xalqının fəxr etməyə futbolçu Henrix Mxitaryandan başqa heç bir nailiyyəti olmadığı haqda dediklərinə cavab olaraq bildirib ki, Ter-Petrosyan bu məsələdə haqlı deyil. Çünki ermənilərin fəxr etməyə başqa xadimləri də var.
Ter-Petrosyanın Ermənistan hakimiyyətinin "millət-ordu" yaratmaq barədə irəli sürdüyü proqramı tənqid etməsinə cavab olaraq müdafiə naziri deyib ki, o, keçmiş prezidentin "sülhün güclü müdafiə sisteminə malik olmadan mümkün olmadığını" dərk etmədiyini tamamilə istisna edir. Onun fikrincə, irəli sürülən "millət-ordu" ideyası dövlətin militarizasiyasına yox, cəmiyyətlə silahlı qüvvələrin sıx əməkdaşlığına yönəlib.
V.Sarkisyan Ter-Petrosyanın pasifist ruhlu çağırışlarının indi Ermənistan üçün aktual olmadığını, çünki ölkənin "hərbi avantüra qarşısında qaldığını" deyib.
Hakim Respublika Partiyası parlament fraksiyasının rəhbəri V.Baqdasaryan isə Ter-Petrosyanın hakim partiya və hökumət üzvlərinin prezident Serj Sarkisyanı sülh və kompromislər məsələsində dəstəkləməyib tək qoyduqları haqda dediklərinə cavab verib: "Serj Sarkisyan heç vaxt tək qalmayıb".
Ermənistandan səslənən sülhə meylli çağırışlara bu şəkildə reaksiya verilməsi həmin ölkənin əsl mahiyyətini ortaya qoymuş olur.
Politoloq Qabil Hüseynlinin sözlərinə görə, Ermənistanın indiki hakimiyyətindən bundan artıq reaksiya gözləməyə dəyməz: "Biz dəfələrlə bəyan etmişik ki, Ermənistan sülh danışıqlarına meylli deyil. Hər vasitə ilə danışıqları pozur, qeyri-konstruktiv mövqeyi ilə mövcud status-kvonu qorumağa çalışır. Bunun da nəticəsində işğal faktoru uzanır. Ermənistanın eks-prezidenti haqlı olaraq belə siyasətin sonunun olmadığını bəyan edib. Ancaq gördünüz ki, Ermənistan rəsmilərinin məsələyə reaksiyası necə oldu? Reaksiyalardan aydın olur ki, Ermənistan siyasi dairələrində eks-prezidentin sülh və kompromislər yolu ilə Qarabağ məsələsinin həllinə nail olmaq, status-kvonun uzadılmasına son qoymaq barədə çağırışlarına dəstək, demək olar ki, yoxdur. Yaxşı olar ki, eks-prezidentin nisbətən yumşaldılmış təkliflərinə verilən reaksiyaya sülhyaratma missiyasını üzərinə götürən qurumlar fikir versin. Ermənistan öz daxilindən olan nüfuzlu və ictimai rəyə təsir etmək qabiliyyətinə malik şəxsin təkliflərinə bu cür aqressiya nümayiş etdirirsə, ondan konstruktiv addım gözləməyə dəyməz. Bir daha sübut olunur ki, Ermənistana lazım olan şəkildə təzyiq edilməsə, o, yolundan dönən deyil".
Məhəmmədəli QƏRİBLİ