Rusiyanın Türkiyədəki səfiri Andrey Karlovun qətlə yetirilməsi geosiyasi müstəvidə və dövlətlərarası əlaqələrdə də mühüm yeniliklərə səbəb olmaqdadır. Belə görünür ki, baş verənlər Türkiyə və Rusiyanı bir-birinə daha çox yaxınlaşdıracaq. Bu yaxınlaşma isə Yaxın Şərq, eləcə də Qafqazda geosiyasi hadisələrin inkişaf axarına mütləq mənada təsir göstərəcək.
Bu fonda Ermənistanda yeni narahatlıq yaranıb ki, Rusiya ilə Türkiyə arasında yeni yaxınlaşma Qarabağ münaqişəsinin də həllini sürətləndirə bilər. Eyni zamanda bu hal Ermənistanı növbəti proseslərdə daha zəif mövqe sahibinə çevirəcək.
Bununla yanaşı diqqət həm də ona yönəldilir ki, Rusiya-Türkiyə yaxınlaşması ABŞ-ın həm Qafqaz, həm də Yaxın Şərqdə Moskva ilə Ankaraya uduzmasına gətirib çıxaracaq. Yeri gəlmişkən qeyd edək ki, səfirin ölümündən sonra ABŞ-ın ünvanına ittihamlar da xeyli artıb. Türkiyənin Vətən Partiyasının sədri Doğu Perincək bu xüsusda maraqlı fikirlər səsləndirib. Onun sözlərinə görə, səfirin qətlə yetirilməsi 15 iyul hadisələrinin davamıdır: "İstanbulda, Kayseridə terrora qurban gedən şəhidlərimiz kimi sui-qəsdin qurbanı olan səfir Andrey Karlov da bizim şəhidimizdir. Karlov Türkiyənin şəhididir. Dostumuz həyatını itirdi. Lakin güllələr hədəfinə çata bilmədi. Bu, Türkiyə-Rusiya dostluğuna atılmış güllə idi". Perincək onu da iddia edib ki, Türkiyə partlayışlar və sui-qəsdlərlə ABŞ tərəfindən cəzalandırılır. Bu arada Türkiyənin xarici işlər naziri Mövlud Çavuşoğlu ABŞ-ın dövlət katibi Con Kerri ilə telefon söhbətində Andrey Karlovun Ankarada qətlinin məsuliyyətini Fətullah Gülənin təşkilatının üzərinə qoyub. Fətullah Gülənə ABŞ-da hələ də göstərilən himayə isə həm də Vaşinqtonu burada hədəfə çevirir. Amma ABŞ Dövlət Departamentinin rəsmi nümayəndəsi Con Kirbi ittihamları əsassız sayır: "Birləşmiş Ştatların Rusiyanın Türkiyədəki səfiri Andrey Karlovun qətli ilə heç bir əlaqəsi yoxdur. Dövlət katibi Con Kerri Türkiyənin xarici işlər naziri ilə söhbət zamanı Gülənin ABŞ-da olması səbəbindən Amerikanın bu çirkin qətlə yardım etməsi və onda iştirakına dair Türkiyədə səsləndirilən bəyanatlardan narahatlığını ifadə edib... Bu ittihamlar tamamilə yalandır və həqiqətlə heç bir əlaqəsi yoxdur". Kirbi qeyd edib ki, Rusiya səfirinin qətlinin motivləri barədə rəsmi təhqiqat başa çatanadək möhtəkirlik etmək olmaz. Amma Fətullah Gülənin Türkiyəyə təhvil verilməsinin uzadılması ABŞ-a qarşı ittihamların sayını artırır. Hakim Ədalət və İnkişaf Partiyasının (AKP) Xarici Əlaqələr Komitəsinin sədri Mehmet Tozlu isə bu fonda bildirir ki, Andrey Karlovun qətlə yetirilməsi ABŞ-ın Fətullah Güləni Türkiyəyə təhvil verməsi prosesinin başlanğıcı olmalıdır. O qeyd edir ki, Andrey Karlovun qətlə yetirilməsi rəsmi Moskva ilə Ankara arasında münasibətləri pozmağa hədəflənən təşəbbüsdür: "Bu hadisənin əhəmiyyətli tərəfi odur ki, ABŞ nəhayət FETÖ rəhbəri Fətullah Gülənin Türkiyəyə təhvil verilməsi prosesini sürətləndirməlidir. Görünən odur ki, FETÖ beynəlxalq terror təşkilatıdır və səfiri qətlə yetirməklə dünyada gedən prosesləri dəyişməyə çalışır. Bu hadisə ABŞ-ın regiondakı nüfuzuna zərər vurmaq baxımından da ciddi əhəmiyyət kəsb edir. Hadisəyə düzgün qiymət verməmək ABŞ-ın strateji hədəflərini və maraqlarını hər an zədələyə bilər".
"The New York Times" qəzeti də yazır ki, səfirin qətlindən ən çox uduzan tərəf məhz ABŞ olacaq. Qeyd olunur ki, bu hadisə Yaxın Şərqdə Rusiya və Türkiyəni daha da yaxınlaşdıracaq: "Baş verən olay hər iki ölkənin Suriyadakı dayaqlarına zərbə vura, aradakı gərginliyi qaytara bilərdi, amma tərəflər də elə bunun qarşısını almaqdan ötrü birgə fəaliyyət göstərir. Yaxın Şərqdə hərbi maraqlarını təmin etməkdən ötrü Türkiyənin Rusiyaya ehtiyacı var. Rusiyaya isə Türkiyə Suriyada qələbə qazanmaqdan ötrü lazımdır. Yəni hərənin öz səbəbi var. Düzdür, Rusiya ilə Türkiyə Suriyada əvvəllər, elə indi də fərqli mövqeləri müdafiə edir. Amma Türkiyənin Suriya strategiyasını dəyişən kürd separatçıları oldu. Suriya kürdlərinin Türkiyə sərhədləri yaxınlığında böyük ərazilərə yiyələnməsini önləməyə çalışan Ankara sükanı Rusiyaya tərəf çevirməli oldu. Çünki Rusiyanın müharibəyə qoşulması Türkiyənin strategiyasının uğurlu olmayacağından xəbər verirdi. Rusiya da qiyamçılara üstün gəlməkdən ötrü, onlara yardım edən Türkiyə ilə düşmənçilikdənsə, dostluğun daha sərfəli olduğunu anladı.
Beləliklə, Rusiya ilə Türkiyənin qeyri-rəsmi anlaşma əldə etdiyini güman etmək olar: Türkiyə qiyamçılara yardımını dayandırır, Rusiya isə kürd separatçılarına. Üstəlik, Rusiya Türkiyənin sərhədləri yaxınlığındakı Suriya torpaqlarına müdaxiləsinə, kürdlərin, İŞİD yaraqlılarının əlindəki əraziləri tutmasına imkan verir. Ekspertlər bunu "əl-Bab əvəzinə Hələb" sövdələşməsi adlandırır. Səfirin öldürülməsinin isə Rusiya-Türkiyə müttəfiqliyini möhkəmlədəcəyini söyləmək olar. Bu hadisədə ən çox itirən Vaşinqton olacaq, məntiqsizdir, amma belədir. Ərdoğan hökuməti bu qətldə də ABŞ-a sığınmış dini lider Fətullah Güləni günahlandıraraq, yenə də onun ekstradisiyasını tələb edir. Birləşmiş Ştatların ekstradisiyadan imtinası isə yenə də Ərdoğan tərəfdarlarının artmasına səbəb olacaq".
Nahid SALAYEV