Fikrət Sadıqov: "Bunu törədən qüvvələr ilk növbədə bu iki ölkə arasında münasibətlərin pozulmasını istəyir və inkişafına qarşı çıxış edir"
Ankarada Rusiya səfiri Andrey Karlovun qətlə yetirilməsi bütün dünya miqyasında böyük rezonansa səbəb olub. Baş vermiş hadisə ilə bağlı müxtəlif versiyalar səsləndirilir.
Bu xoşagəlməz hadisənin niyə baş verməsi ilə bağlı bizim politoloqlar nə düşünür?
Ekspert Arzu Nağıyevin sözlərinə görə, Rusiyanın Türkiyədəki səfiri Andrey Karlov Yaxın Şərq problemlərini yaxından bilən, tanınmış diplomat olub: "Ona qarşı törədilən sui-qəsd Rusiya-Türkiyə münasibətlərinə xələl gətirməyə və Rusiyanı Yaxın Şərqdə gedən antiterror əməliyyatlarında iştirakdan çəkindirməyə hesablanıb. Terrorçunun ərəb dilində hadisəni Suriya və Hələbə görə törətdiklərini deməsi bunun təxribat, terror olduğunun göstəricisidir. Məhz Rusiya təmsilçisinin hədəf seçilməsi terroru törədənlərin Rusiyanın Suriyada və Yaxın Şərqdə Türkiyə ilə birgə keçirdiyi əməliyyatlardan narahat olan qüvvələr olduğunu göstərir. Düşünürəm ki, bu hadisələr Türkiyə-Rusiya münasibətlərinə mənfi təsir etməyəcək. Hər kəs yaxşı bilir ki, Türkiyə belə bir hadisənin baş verməsini və Rusiya ilə əlaqələrinin pozulmasını istəməz".
Politoloq Fikrət Sadıqov isə hesab edir ki, Türkiyədə Rusiya səfirinin öldürülməsi çox acınacaqlı bir faktdır: "Düşünürəm ki, bunu törədən qüvvələr ilk növbədə bu iki ölkə arasında münasibətlərin pozulmasını istəyir və inkişafına qarşı çıxış edir. Əlbəttə, iki ölkə arasında müəyyən soyuqluq yarana bilər, amma burada bir çox məsələlər hər iki dövlətin siyasi rəhbərliyindən asılıdır. Onların strateji maraqlarının üstün tutulması ikitərəfli münasibətlərin inkişafına xələl gətirməməlidir və bu dövlətlər arasında münasibətlər bundan sonra da inkişaf etməlidir. Çünki bu çox mürəkkəb regiondur və hər iki dövlət xüsusilə Yaxın Şərq regionunda baş verən hadisələr fonunda bir-birinə lazımdır".
Məhəmmədəli QƏRİBLİ