Aqşin Əliyev: "Türkiyə ilə Rusiya arasında bir müddət əvvəl olan soyuqluğun aradan qaldırılmasında Azərbaycanın rolunu nəzərə alsaq, onda ölkəmiz üçün də risqlər ola bilər"
Türkiyədə fəaliyyət göstərən rus səfirinin öldürülməsi hadisəsindən sonra hər iki ölkənin soyuqqanlı davranışı nəzərə çarpdı. Məqsədin nə olduğunu bilən hər iki ölkə rəsmiləri ehtiyatlı bəyanatları ilə diqqətin başqa istiqamətə yayındırılmasına imkan vermədi.
Aydın oldu ki, bu terror aksiyası Rusiya və Türkiyə arasında mövcud olan ikitərəfli əməkdaşlığın pozulmasına yönəlmiş təxribatdır. Maraqlıdır ki, bu arada, Rusiya hüquq-mühafizə orqanları ölkə ərazisində terror törətməyi planlaşdıran bir neçə çeçen mənşəli vətəndaşı saxlayıb. Göründüyü kimi, bu məsələdə hədəf iki ölkə olub - Rusiya və Türkiyə. Azərbaycan hər iki ölkə ilə yaxın qonşudur və normal münasibətə malikdir. Bu xüsusda ölkəmiz terrorun növbəti hədəfi kimi seçilə bilərmi?
Ekspert Aqşin Əliyev qəzetimizə açıqlamasında bildirdi ki, Türkiyədə baş verən son hadisə bütün dünyada şok effekti yaratdı: "Hadisənin törənməsinə səbəb olan ehtimallarla bağlı çox çeşidli versiyalar səsləndirilib. Aydın olan bir məqam var ki, Türkiyə hakimiyyəti bunun baş verməsini istəməzdi. Xüsusilə də son vaxtlar normallaşan Türkiyə-Rusiya münasibətləri fonunda bu, ölkələrdən heç birinə lazım deyildi. Terrorçunun səsləndirdiyi şüarlardan görünür ki, onu Rusiyanın Suriyadakı davranışı narahat edib. Bu hadisənin effekti düşünülən kimi olmadı. Rusiyadan təyyarə olayı zamanı olan davranışı gözləyənlər bərk yanıldılar. Şübhə etmirəm ki, hadisə arxasında radikal islamçılar dayanıb, istər İŞİD, istərsə də "Cəbhət ən-Nusra" və başqası ola bilər. Rusiya və Türkiyəni yenidən qarşı-qarşıya qoymaq istəyi uğursuzluqla nəticələndi. Razıyam ki, Azərbaycan istər coğrafi, istərsə də mənəvi tellərlə hər iki ölkəyə yaxındır. Türkiyə ilə Rusiya arasında bir müddət əvvəl olan soyuqluğun aradan qaldırılmasında Azərbaycanın rolunu nəzərə alsaq, onda ölkəmiz üçün də risqlər ola bilər. Qeyd edim ki, Azərbaycanın hüquq-mühafizə orqanları bu istiqamətdə daim ayıq-sayıq olub. Əminəm ki, yenə də öz işlərini peşəkarlıqla yerinə yetirəcəklər. İstənilən halda, belə hadisələr təhlükəsizlik tədbirlərinin daha da artırılması üçün zəmin yaradır. Görürsünüz ki, artıq hədəf kimi ayrı-ayrı nüfuzlu fərdlər seçilir. Bu istiqamətdə təhlükəsizliyi təmin etmək asan deyil. Buna baxmayaraq, ehtiyatı əldən vermək olmaz".
Məhəmmədəli QƏRİBLİ