"Mən baş verən terror aktlarında PKK izinin olmasını güman edirəm"
Son günlər Türkiyədə silsilə terror hadisələrinin olması adi hal alıb. Avstriya, Albaniya, Ukrayna və İspaniya Türkiyənin Kayseri şəhərində törədilən son terror aktı ilə bağlı kəskin mövqeyini nümayiş etdirib.
İspaniya Xarici İşlər Nazirliyi Türkiyə xalqı və hakimiyyətinə başsağlığı verərək Ankara ilə terrorizmə qarşı mübarizədə həmrəy olduğunu bəyan edib.
Ukrayna prezidenti Petro Poroşenko "Tvitter" hesabından açıqlamasında "Kayseridəki terror hücumunu pisləyirəm. Qurbanların ailələrinə üzüntümü bildirirəm. Türkiyənin yanındayıq. Terrorizm haqlı deyil" vurğulayıb.
Albaniya xarici işlər naziri Ditmir Buşati rəsmi sosial media hesabı üzərindən terror aktı ilə bağlı bəyanatında "İstanbuldakı hücumun üzərindən bir həftə keçməmiş Kayseridə başqa bir terror törədildi. Hücumu şiddətlə qınayıram. Türk xalqının acısını paylaşıram" qeyd edib.
Avstriya xarici işlər naziri Sebastian Kurz da "Tvitter" hesabında terror aktını kəskin şəkildə qınadığını bildirib.
Kosovo parlamentinin spikerinin müavini Fikrim Damka, kosovalı nazir Mahir Yağcılar da hücumu pisləyərək, türk xalqının qardaşlıq ruhu içərisində olduğunu söyləyib.
Qeyd edək ki, Kayseridə baş verən terror aktında 14 nəfər həlak olub. Türkiyədə bu cür hadisələrin niyə baş verməsinə dair müxtəlif fikirlər səsləndirilir. Bəziləri bunu ölkənin dollardan imtinası, digərləri Türkiyənin PKK və onun siyasi qolu sayılan HDP-yə qarşı sərt münasibəti və Suriyadakı mövqeyilə izah edir.
Tükiyədə terrorun intensiv hal almasını nə ilə əlaqələndirə bilərik?
Politoloq Qabil Hüseynlinin sözlərinə görə, ilk əvvəl Rusiyanın bu məsələyə verdiyi reaksiyaya diqqət edək: "Onlar dedi ki, Türkiyə Qərb və NATO ilə əlaqələri soyuqlaşdırandan sonra ölkədə bu proseslər baş verməyə başladı. Rusiyanın belə bir açıqlaması sadəcə qızışdırıcı xarakter daşıyır. Ona görə də ona inanmaq olmaz. Türkiyəni sevməyən, orada daxili siyasi sabitliyin pozulmasını istəyən qüvvələr çoxdur. Məsələn, Avropa ölkələri. Belə ki, dekabrın 10-da baş verən terror hadisəsi ilə bağlı onlar Türkiyəyə başsağlığı vermədilər. Hətta bunu PKK-nın zəfəri kimi dəyərləndirənlər də oldu. Bu biabırçılıqdır, Avropa dəyərlərinə hörmətsizlikdir. Hər bir ölkə daxili təhlükəsizliyini qorumağı bacarmalıdır. Peşəkar kadrlarla həm xüsusi kəşfiyyat idarələrini, həm də axtarışa cavabdeh olan nazirlikləri möhkəmləndirmək lazımdır. Daxilə terrorçuların sızmasının qarşısı alınmalıdır. Bu da sərhədlərin möhkəmləndirilməsindən başlayır. Təəssüf ki, Türkiyədə bu arzuolunan səviyyədə deyil. Ümumiyyətlə, Rusiya PKK-nı maliyyələşdirməyib qızışdırmasa, Türkiyə öz işinin öhdəsindən gələ bilər. Rusiya PKK-ya etdiyi yardımlardan əl çəkəndən sonra hər şey qaydasına düşəcək. Mən baş verən terror aktlarında PKK izinin olmasını güman edirəm".
Məhəmmədəli QƏRİBLİ