Adil Səmədov: "Bu nümunədən başqa ölkələr də örnək götürməlidir"
Azərbaycanın sorğusu ilə Minskdə bloger Aleksandr Lapşin saxlanıb. Bu barədə blogerin "Facebook" səhifəsində bildirilir. Lapşin qeyd edib ki, o, Azərbaycan tərəfinin sorğusu əsasında saxlanıb. "Sputnik Belarus" agentliyinin yaydığı məlumatda isə bildirilir ki, Lapşin Bakıya təhvil verilə və Azərbaycan qanunvericiliyinin tələblərinə uyğun məsuliyyətə cəlb edilə bilər.
Qeyd edək ki, sözügedən şəxsin adı 2013-cü ildə Azərbaycan Xarici İşlər Nazirliyinin "qara siyahı"sına daxil olunub. Buna səbəb blogerin digər əcnəbilərlə Dağlıq Qarabağa qanunsuz səfər etməsidir. Lakin 2015-ci ildə Lapşin Ukrayna pasportu ilə Azərbaycan ərazisinə Gürcüstandan keçib. Pasportda Aleksandr adı Ukrayna dilinə uyğun Oleksandr yazıldığı üçün Lapşin Azərbaycana maneəsiz daxil ola bilib. Azərbaycan tərəfi "Dövlət sərhədinin pozulması haqqında" Qanunu pozduğu üçün blogeri beynəlxalq axtarışa verib.
Ayrı-ayrı dövlətlərin vətəndaşlığını daşıyan Aleksandr Lapşin Ermənistan silahlı qüvvələri tərəfındən Azərbaycanın işğal olunmuş ərazilərində yaşayan digər şəxslərlə qabaqcadan əlbir olub cinayət əlaqəsinə girərək, "Azərbaycan Respublikasının dövlət sərhədi haqqında", "Pasportlar haqqında" Azərbaycan Respublikası qanunlarının tələblərini kobud surətdə pozmaqla Azərbaycan Respublikasının mühafizə olunan dövlət sərhədini müəyyən edilmiş sənədlər olmadan və nəzarət-buraxılış məntəqələrindən kənarda keçərək 2011-ci ilin aprel və 2012-ci ilin oktyabr aylarında işğal olunmuş ərazilərə daxil olub, qanunsuz rejimin beynəlxalq səviyyədə təbliğ edilməsi məqsədilə internet sosial şəbəkəsində özünə məxsus "http//puerrtto.livejournal.com" səhifəsində səyahət etdiyi dövlətlər arasında Azərbaycan və Ermənistanla yanaşı, Dağlıq Qarabağı da müstəqil dövlət kimi qeyd etməklə, həmçinin 6 aprel və 29 iyun 2016-cı il tarixli müraciətlərində işğal olunmuş ərazilərdə qanunsuz fəaliyyət göstərən rejimin "müstəqilliyini" dəstəkləməklə Azərbaycan Respublikasının beynəlxalq səviyyədə tanınmış ərazi bütövlüyünün parçalanmasına yönələn açıq çağırışlar edib.
Baş Prokurorluğun mətbuat xidmətindən qəzetimizə verilən məlumata görə, A.Lapşinin hərəkətlərində dövlət əleyhinə yönələn açıq çağırışlar və dövlət sərhədini qanunsuz olaraq keçmə əməllərinin tərkib əlamətləri olduğundan, Baş Prokurorluğun Ağır cinayətlərə dair işlər üzrə istintaq idarəsində fakta görə Azərbaycan Respublikası Cinayət Məcəlləsinin 281.2 (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanıb və barəsində dövlətlərarası axtarış elan edilib. Hazırda A.Lapşinin Azərbaycana ekstradisiya olunması ilə əlaqədar zəruri tədbirlər aparılır.
Məlum olduğu kimi, Azərbaycanın hazırladığı "qara siyahı"da bir çox ölkə vətəndaşlarının adı var. Ancaq onların əksəriyyətinə qarşı hansısa hüquqi addım atılmır. Belarusun bu addımı digər ölkələr üçün örnək ola bilərmi?
Miqrasiya məsələləri üzrə ekspert Adil Səmədov qəzetimizə açıqlamasında bildirdi ki, bu müddət ərzində Azərbaycanın arzuolunmaz şəxslər siyahısına bir çox məşhur adamlar düşüb: "Azərbaycan bu siyahını qanunvericiliyə uyğun şəkildə tərtib edib və həmin sənəd bütün beynəlxalq müqavilə və tələblərə cavab verir. Bizim ölkənin bir hissəsi işğal altındadır. Həmin əraziyə faktiki olaraq biz nəzarət edə bilmirik. Deyilən ərazilərin Azərbaycana aid olması bütün beynəlxalq razılaşma və sənədlərdə öz təsbitini tapır. Bu baxımdan da ölkəmiz haqlı olaraq həmin ərazilərə bizdən icazəsiz səfər edənlərin adlarını "qara siyahı"ya salır. Etiraf etmək lazımdır ki, bəzi şəxslərin adı anlaşılmazlıq ucbatından həmin siyahıya düşüb. Yəni həmin əraziyə hansısa biznes məqsədilə səyahət edən şəxs sonradan bunun hüquqi məsuliyyət yarada bildiyini anlayıb. Bu xüsusda siyahıya adları düşən rusiyalı müğənnilər Timur Temirov və Soso Pavliaşvilini qeyd edə bilərik. Onlar ölkəmizdən üzrhaqlıq etdiyi üçün, hətta Bakıda konsert vermələrində problem yaşanmadı. Müğənnilər yazılı məktub vasitəsilə nazirliyə müraciət edərək, Azərbaycan xalqına, mədəniyyətinə və musiqisinə böyük hörmət və ehtiram bəslədiyini, ölkəmizin qonaqpərvərlik ənənələrini yüksək qiymətləndirdiyini vurğulayaraq, Azərbaycana səfər etmək və tezliklə Bakıda konsert proqramları ilə çıxış etmək arzusunda olduğunu bildirib.
Ancaq Minskdə saxlanan bloger belə davranış nümayiş etdirməyib. Əksinə, o, səfərdən sonra da Azərbaycan dövləti əleyhinə təbliğatla məşğul olub. Bu baxımdan da onun saxlanaraq Azərbaycana ekstradisiya olunması qanunvericiliyin tələblərinə tam cavab verir. Atdığı addıma görə Belarusa xüsusi təşəkkür düşür. Hesab edirəm ki, bu nümunədən başqa ölkələr də örnək götürməlidir".
Məhəmmədəli QƏRİBLİ