Xəzər Teyyublu: "Ortaq problemlərdən birgə güc sərf etməklə daha tez yaxa qurtarmaq olar"
GUAM - Demokratiya və İqtisadi İnkişaf Naminə Təşkilatın Parlament Assambleyasının doqquzuncu sessiyasının açılışında Azərbaycanın xarici işlər naziri Elmar Məmmədyarov deyib ki, GUAM üzv ölkələrin əməkdaşlığı üçün vacib platformaya çevrilib. Nazir qeyd edib ki, GUAM təşkilatı, həmçinin, üzv ölkələrin ərazisində mövcud münaqişələrin həlli məsələsində səylərin birləşdirilməsi üçün vacib rol oynayır.
E.Məmmədyarov GUAM-a üzv ölkələrin BMT Baş Assambleyasında "uzanmış münaqişələr" üzrə qətnamə layihələrinin irəli sürülməsi ilə bağlı səylərini artırmasının vacibliyini vurğulayıb: "GUAM-a üzv ölkələrin təhlükəsizliyinin və suverenliyinin təmin olunması, beynəlxalq səviyyədə tanınan sərhədlər çərçivəsində ərazi bütövlüyünün bərpası üzv ölkələr üçün həyati əhəmiyyət kəsb edir. Biz münaqişələrin həlli yolunda səylərimizi birləşdirməliyik".
Xarici işlər nazirinin təşkilata üzv olan ölkələrin ümumi problemi sayılan işğal faktına qarşı birgə fəaliyyət təklifi necə dəyərləndirilə bilər?
Klassik Xalq Cəbhəsi Partiyasının sədr müavini Xəzər Teyyublunun sözlərinə görə, təklif olunan əməkdaşlıq təklifinə normal yanaşmaq lazımdır: "Qurumda təmsil olunan bütün ölkələrin oxşar problemləri var. Faktiki olaraq həmin ölkələr öz ərazilərinin bir hissəsinə nəzarəti itirib. Ölkələrin hər birində yaradılan problemin kökündə Rusiya faktoru durur. Hətta bir müddət əvvəl Rusiya bütün separatçı qurumların liderlərini öz ərazisində görüşdürmək istədi. Putin anlayır ki, Ukrayna uğrunda Qərblə geosiyasi savaşı uduzsa, ardınca Moldova, Gürcüstan və Azərbaycan, hətta Ermənistan da birdəfəlik əldən çıxacaq. Odur ki, paralel surətdə bu ölkələrə də təzyiq-təhdidləri gücləndirmək kursu ortaya qoymaqdadır.
Moskvanın Abxaziya, Cənubi Osetiya, Dnestryanı, Dağlıq Qarabağ və Donbas separatçıları ilə normal münasibətdə olması hamıya bəllidir. Moskva öz niyyətindən əl çəkmək fikrində deyilsə, ərazi bütövlüyü pozulmuş bütün dövlətlərin bu istiqamətdə birgə fəaliyyəti yaxşı olar.
Rusiya GUAM-ı öz layihəsi saymır. Elmar Məmmədyarovun təklifi tərəflər üçün məqbul sayılmalıdır. Əvvəl 3 ölkə separatçılıqdan uzun müddət əziyyət çəkdisə, hazırda siyahıya Ukrayna da qoşulub. Ortaq problemlərdən birgə güc sərf etməklə daha tez yaxa qurtarmaq olar".
Məhəmmədəli QƏRİBLİ