Məhərrəm Zülfüqarlı: "Bu da, öz növbəsində, bir sıra məsələləri rəsmi Bakı ilə müzakirə etmək zərurətini yaradır"
"Azərbaycan Prezidenti ilə Avropa və ABŞ-dakı siyasi dəyişiklikləri müzakirə etdik". Bu sözləri ABŞ Dövlət Departamentinin beynəlxalq enerji məsələləri üzrə xüsusi elçisi Amos Hokştayn Bakıda keçirdiyi mətbuat konfransında deyib.
Dövlət Departamentinin rəsmisi ölkəmizə səfəri çərçivəsində keçirdiyi görüşlər barədə məlumat verib və bir sıra məqamlara toxunub. Hokştayn onu da xüsusi olaraq bəyan edib ki, Azərbaycan və ABŞ təkcə yaxın dost deyil, həm də strateji tərəfdaşlıq münasibətlərinə malikdir: "Bu münasibətlər bir çox sahələri əhatə edir".
TAP layihəsi ilə bağlı suala cavabında Dövlət Departamentinin rəsmisi deyib ki, belə çoxtərəfli layihələrin icrası zamanı müxtəlif mərhələlərdə yerli icmalar, siyasətçilər tərəfindən müəyyən çətinliklər yaradıla bilər. Əsas odur ki, birgə səylər və əməkdaşlıq şəraitində bu çətinlikləri aradan qaldıraq. Layihə tərəfdaşlarının iştirakı ilə konsorsium əsasında bu problemləri həll edə bilərik.
Ümumilikdə, Avropa və ABŞ-dakı siyasi dəyişikliklər niyə Azərbaycanla müzakirə edilir? Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, bu, Azərbaycana verilən önəmdən irəli gəlir: "Məsələ ondadır ki, Azərbaycan Cənubi Qafqazda çox mühüm regional və strateji əhəmiyyətə malik ölkədir. Ötən illər ərzində bölgədə bir sıra layihələr həyata keçirilib və bunların hər birində həlledici rolu Azərbaycan oynayıb. Azərbaycan Birləşmiş Ştatlarla iqtisadi məsələlərlə yanaşı, siyasi, hərbi məsələlərdə də əməkdaşlıq edir. 2001-ci ildə Azərbaycan ABŞ-ın antiterror koalisiyasına dəstək verib. Kosovada, Əfqanıstanda, İraqda sülhyaratma əməliyyatlarında yaxından iştirak edib. Əfqanıstana müəyyən yük daşımaları Azərbaycan üzərindən həyata keçirilib. Eyni zamanda, ABŞ 2002-ci ildən məşhur "907-ci Düzəliş"in həyata keçirilməsini hər il dondurur. Bununla yanaşı, ABŞ zaman-zaman QHT-lərin timsalında Azərbaycanda birgə layihələr həyata keçirib. Bütün bunlar və digər faktorlar, təbii ki, Azərbaycanın imicinə müsbət təsir edir. Bu da, öz növbəsində, bir sıra məsələləri rəsmi Bakı ilə müzakirə etmək zərurətini yaradır".
Vidadi ORDAHALLI