Aqşin Əliyev: "Yəqin ki, Ermənistanı nəyəsə məcbur edə biliblər, amma bu da inandırıcı görünmür"
ATƏT-in Minsk Qrupunun amerikalı həmsədri Ceyms Uorlik bildirib ki, apreldə Azərbaycan və Ermənistan qoşunlarının qarşıdurma xəttindəki hərbi fəaliyyət böyük sayda tələfata səbəb oldu və nümayiş etdirdi ki, münaqişənin hərbi yolla həlli yoxdur.
Onun sözlərinə görə, apreldəki qarşıdurmadan sonra tərəflər ümumilikdə atəşkəs rejiminə riayət edir: "Artıq danışıqlar masasında təkliflər var. Bu təkliflər münaqişənin həllinə gətirib çıxara bilər".
Həmsədr əlavə edib: "Biz bu il, o cümlədən Vyana və Sankt-Peterburq görüşlərində danışıqlarda irəliləyişə nail olmaq üçün yeni cəhdlər gördük. Ümid edirik ki, tərəflər prosesi irəlilətmək üçün gələcəkdə də konstruktiv işləyəcək".
Diplomatın sözlərinə görə, Donald Trampın prezidentliyi dövründə Dağlıq Qarabağ münaqişəsinin nizamlanması ilə bağlı vəziyyətin necə inkişaf edəcəyini indidən demək çətindir:
"Şübhə etmirəm ki, ABŞ hakimiyyəti həmsədr ölkələrin köməyi ilə münaqişənin sülh yolu ilə həllinə sadiq qalacaq".
C.Uorlik qeyd edib ki, onun dekabrın 31-dən postunu tərk edəcəyi ilə əlaqədar olaraq, yeni amerikalı həmsədrin adı yaxın vaxtda məlum olacaq.
Həmsədr qeyd edib ki, masada münaqişənin həllinə gətirib çıxara biləcək yeni təkliflər var. Hansı təkliflərdən söhbət gedə bilər?
Ekspert Aqşin Əliyevin sözlərinə görə, ümumən masada təkliflər hər zaman olub: "Ancaq Ermənistan hər zaman qeyri-konstruktivlik göstərib. Bu səbəbdən də danışıqlar prosesində nəsə alınmayıb. Yeniliyin nədən ibarət olduğunu ehtimal etmək çətindir. Bəlkə də bu, elə köhnə təkliflərin təkrarıdır ki, Ermənistan Dağlıq Qarabağın hansısa statusu qarşılığında əraziləri Azərbaycana qaytarır. Azərbaycanın nəyə razı olacağı aydındır. Ancaq fikrimcə, bu, hansısa yüksək muxtariyyət statusudur. Azərbaycan Prezidenti hansı formada statusun verilə biləcəyini açıqlayıb. Ermənistan mərhələli həll planı müqabilində bununla razılaşsa, hansısa irəliləyişdən söhbət gedə bilər. Mərhələli həll planı ilə bağlı tərəflərin irəliləyiş əldə etdiyi xəbəri yayılmışdı. Lakin sonradan Ermənistan danışıqlardan yayındı. Uorlik deyirsə, yəqin Ermənistanı nəyəsə məcbur edə biliblər, amma bu da inandırıcı görünmür".
Məhəmmədəli QƏRİBLİ