Aqşin Əliyev: "Burada şəxslərin təmsil etdiyi dövlətin bu məsələyə münasibəti önəmlidir"
Məlum olduğu kimi, ABŞ və Fransa ATƏT-in Minsk Qrupunda təmsil olunan həmsədrlərini dəyişib. ABŞ-ın ATƏT-in Minsk Qrupundakı həmsədri Ceyms Uorlik özünün mikrobloqunda paylaşdığı məlumatda bu il dekabrın 31-də ATƏT-in Minsk Qrupunun həmsədri postundan gedəcəyini bildirib. Amerikalı diplomat gələcək fəaliyyətini Rusiyanın "Yeqorov, Puqinski, Afanasyev və tərəfdaşları" hüquq şirkətində davam etdirəcəyini bildirib.
Fransa da ATƏT-da olan həmsədrini dəyişib. Ancaq maraqlıdır ki, üçüncü həmsədr ölkə olan Rusiya bu addımı atmayıb. Yeni həmsədrlərlə köhnənin birgə fəaliyyəti necə alınacaq?
Ekspert Aqşin Əliyevin sözlərinə görə, 1992-ci ildən fəaliyyət göstərən Minsk Qrupunda həmsədrlərin dəyişdirilməsinin nə demək olduğunu artıq bilirik: "Qurumun ABŞ, Fransa və Rusiyadan olan həmsədrlərinin növbə ilə öz yerlərini diplomat xələflərinə verməsi Qarabağ danışıqlarında qeyri-müəyyən müddətə durğunluğun yaranması ilə nəticələnir. Hər halda, amerikan, fransız və ya rus diplomatları Minsk Qrupunda "relsə düşmək"dən ötrü ona qədər aparılmış danışıqlar prosesi ilə tanış olmaq üçün vaxt istəyir. Həmsədrlərdən biri nə baş verdiyini dərk edənə qədər digər həmkarları da Minsk Qrupundakı postu ilə vidalaşır. Xatırladaq ki, ötən ay Fransanı qurumda təmsil edən həmsədri Pyer Andryu da öz yerini Stefan Viskontiyə verib. Yəni bu "qapanmayan dövrə" uzandıqca-uzanır, ancaq münaqişənin dinc yolla həlli istiqamətində ciddi irəliləyiş yoxdur. Burada şəxslərin təmsil etdiyi dövlətin bu məsələyə münasibəti önəmlidir. Dağlıq Qarabağ probleminə münasibətdə də hər hansı bir ciddi dəyişiklik ortalıqda deyil. Belə bir ciddi dəyişiklik müşahidə olunmur. Ona görə də amerikalı həmsədrin, fransalı həmsədrin, sonra isə rusiyalı həmsədrin dəyişməsinin bütövlükdə prosesə heç bir təsiri olmur və olmayacaq. Çünki Dağlıq Qarabağ münaqişəsinə, açığı, dünyada heç bir yerdə müşahidə olunmayan selektiv bir mövqe nümayiş etdirilir. Yəni bu münaqişədə birmənalı bəllidir ki, Dağlıq Qarabağ və ətraf rayonlar Azərbaycanın tərkib hissəsidir və işğal olunub. Azərbaycanın 20 faizi işğal olunmuş bir vəziyyətdə ola-ola, hələ də nədənsə işğalçının işğal etdiyi torpaqlardan dərhal, qeyd-şərtsiz çıxarılması birmənalı tələb olunmur. Amerikalı və yaxud fransalı həmsədrin dəyişməsi bütövlükdə Dağlıq Qarabağ münaqişəsinə münasibəti dəyişmir. Ona görə də dəyişən bir şey yoxdur. Təbii ki, bu özünü yeni həmsədrlərin köhnənin iş prinsipinə uyğunlaşmasında da aydın göstərəcək. Onsuz da nəticəsi olmayan proses bir qədər də ləngiyəcək".
Məhəmmədəli QƏRİBLİ