ABŞ-ın yeni seçilmiş prezidenti Donald Tramp Müdafiə Kəşfiyyatı Agentliyinin keçmiş rəhbəri, istefada olan general-leytenant Maykl Flinnə milli təhlükəsizlik müşaviri postunu təklif edib.
Baki-xeber.com xəbər verir ki, Tramp Flinnlə yanaşı Kansas ştatından ABŞ Konqresi Nümayəndələr palatasının üzvü Mike Pompeoya Mərkəzi Kəşfiyyat İdarəsinin (CIA) rəisi vəzifəsini, Alabama ştatından senator Jeff Sessionsa Baş prokurorluq təklif edib. Onların hər üçü yeni prezidentin təklifini qəbul edib.
Türkiyədə çevriliş cəhdində ittiham edilən FETÖ lideri Fətullah Güləni Usamə Bin Ladenə bənzədən və Türkiyəyə verilməsini dəstəkləyən təqaüdçü general, artıq rəsmi olaraq ABŞ-ın yeni prezidentin milli təhlükəsizlik müşaviri postunu tutub.
57 yaşlı Flinn Trampın təklifini qəbul edib və artıq onu təyin etmək üçün Konqresin təsdiqinə ehtiyac qalmayıb. Ancaq CİA direktoru və Baş prokuror Senatda təsdiq olunmalıdır.
Qeyd edək ki, Flinn bir müddət əvvəl açıqlamasında Fətullah Güləni “Əl Qaidə” lideri Usamə Bin Ladenə bənzətmişdi: "Pensilvanyaya rahatca yerləşmiş bu maskalı terror və qeyri-sabitlik mənbəyi tərəfindən Vaşinqtonun gözü bağlanarkən, NATO müttəfiqimiz Türkiyəyə mane olmaq məntiqsizdir. Türkiyənin gözündə Vaşinqton Türkiyənin Usamə Bin Ladeninə sığınacaq verir. 11 sentyabrdan sonra Usamə bin Ladenin Türkiyədə gözəl bir kənddə yaşadığını və eyni anda türk vergi ödəyicilərinin vergiləri ilə maliyyələşən 160 məktəbi işlətdiyini öyrənsəydik nə edərdik?"
Flinn deyir ki, ABŞ maraqları üçün Türkiyənin həyati rolunu anlamağa başlamalıyıq: “İraqda və Suriyada İslam Dövləti təşkilatına qarşı mübarizədə Türkiyə həqiqətən ABŞ-ın ən güclü müttəfiqidir. Türkiyə regionda da sabitlik mənbəyidir”
Onu da qeyd edək ki, 57 yaşlı, istefada olan kəşfiyyat zabiti, general Maykl Flinn Demokratlar Partiyasının üzvüdür. O, Trampın seçki kampaniyası zamanı onun milli təhlükəsizlik müşaviri olub.
"The New York Times" qəzeti yazır ki, Tramp və general Flinnin faktlarla arası bir o qədər də yaxşı deyil: "Məsələn, general Flinn deyib ki, islam qanunu olan şəriət ABŞ-da yayılmaqdadır". Qəzetin yazdığına görə, Flinnin faktlara əsaslanmayan dəyərləndirmələri o qədər adi hal alıb ki, Müdafiə Kəşfiyyatı Agentliyinə rəhbərlik edərkən tabeliyindəki əməkdaşlar onları "Flinn faktları" adlandırırmış.
Müşavir kimi general Flinn Trampa çox güclü təsir edə bilib. O, yeni seçilmiş prezidenti inandırıb ki, ABŞ islam yaraqlıları ilə "dünya müharibəsi" aparır və Putin də daxil olmaqla istənilən müttəfiqlə əməkdaşlıq etməlidir.
Prezident Barak Obama general Flinni Müdafiə Kəşfiyyatı Agentliyinin rəhbəri vəzifəsindən uzaqlaşdırandan sonra o, "Flynn Intel Group" konsaltinq şirkətini yaradıb. Bu şirkətin Yaxın Şərq ölkələri ilə qaranlıq biznes əlaqələri var. Bu şirkət həm də Türkiyə hökumətinin xeyrinə lobbiçilik edib. Bundan başqa, general Flinn ötən il Kremlin yaratdığı televiziya şəbəkəsi olan "Russia Today"lə ödənişli əsaslarla əməkdaşlığa başlayıb. O, "Russia Today"in Moskvada təmtəraqlı ildönümü mərasiminə qatılıb və burada Putinlə yanaşı oturub.
Bu potensial maraq toqquşmalarına görə Trampın keçid komandası onun milli təhlükəsizlik müşaviri postundan başqa hər hansı vəzifəyə təsdiqlənəcəyinə şübhə ilə yanaşırdı. Məsələ burasındadır ki, milli təhlükəsizlik müşavirindən başqa bütün digər vəzifələrə yeni təyinatları Konqres təsdiqləməlidir. Ancaq Trampın gözündə Flinnin çox böyük üstünlüyü var: Vaşinqtonun bütün milli təhlükəsizlik isteblişmenti Trampın prezidentliyə layiq olmadığını deyəndə Flinn hamıdan öncə onun yanında idi.
General Flinn seçkidən öncəki çıxışlarında da, avqustda işıq üzü görmüş kitabında da "radikal islam terrorizmi" təhlükəsini dönə-dönə qabardıb. "The New York Times" yazır ki, qalan hər şey general Flinn üçün ikinci dərəcəlidir. Bu təhlükənin hər hansı başqa təsvirini isə o, “siyasi korrektliyin ən pis forması" adlandırır. General seçkidən iki gün öncə verdiyi müsahibədə belə deyib. O söyləyib ki, islamçı silahlı qruplaşmalar qlobal səviyyəli real təhlükədir. Onun fikrincə, islam dininin özü problem mənbəyidir. Bir dəfə o, din yox, siyasi ideologiya kimi gördüyü islamı xərçəng xəstəliyi ilə müqayisə edib.
Bu iki şəxsin aylarla sürən ünsiyyətindən sonra "artıq Trampın fikirlərinin harada bitdiyini, general Flinnin fikirlərinin harada başlandığını anlamaq çətindir", – "The New York Times" yazır. Onların hər ikisi ABŞ-ın islamçı yaraqlıların öhdəsindən gəlməkdən ötrü Putinlə əməkdaşlıq etməli olduğunu düşünür. İnanırlar ki, ABŞ Putinin öz ölkəsində tənqidi fikirləri boğmasına, Ukrayna ilə bağlı etdiklərinə, Rusiya ordusunun Suriya şəhərlərini bombalamasına görə narahatlığa son qoymalıdır. Eyni fikirləri Misirin çevrilişlə hakimiyyətə gəlmiş prezidenti Abdel Fattah el-Sisi barədə də demək olar. El-Sisi seçkidən sonra Trampla danışmış ilk xarici liderdir.
General Flinnlə Donald Trampın fikirləri başqa bir məsələdə də üst-üstə düşür. Onların hər ikisi düşünür ki, əhalisi, əsasən, müsəlmanlar olan ölkələrdən gələn mühacirlərin sayı məhdudlaşdırılmalı və bəlkə də Amerikada yaşayan müsəlmanlar hökumətin qeydiyyatından keçməlidir.
General Flinn də Tramp kimi isteblişmenti pisləyir. Onun fikrincə, son iki prezidentin dövründə Amerikanın müdafiə və xarici siyasətini formalaşdıran respublikaçı və demokrat liderlər "bizi mənasız səbəblərdən bir zibildən o biri zibilə salıblar".
General təkidlə bildirir ki, onun kəşfiyyat agentliyinin rəhbəri vəzifəsindən uzaqlaşdırılmasının səbəbi Obama administrasiyasının islamçı yaraqlıların geri çəkilməsi barədə fikirləri ilə razılaşmamasıdır. "The New York Times" qəzeti bu məsələdə generala haqq qazandırır.
Tramp son təyinatlarla bağlı yaydığı bəyanatda Pompeo haqda deyib ki, o, CİA direktoru kimi terroizmlə mübarizədə parlaq və yorulmaz lider olacaq.
Pompeo İranla nüvə sazişinə tənqidi yanaşır. Noyabrın 15-də İranın silah proqramları ilə bağlı ABŞ sanskiyalarının uzadılması haqda qanuna səs verən Pompeo deyib ki, bu qanun amerikalıları qoruyur və İranın təcavüzünə qarşı çıxır.
Pompoe dünən şəxsi Twitter hesabından bəyan edib ki, "İranla olan müqaviləni ləğv etməyi səbirsizliklə gözləyirəm". O, İranı terroru maliyyələşdirməkdə ittiham edir.
“International Business Times” isə Pompeonu qatı bir İslam düşməni kimi xarakterizə edir. Pompeo Amerika xarici siyasətində sərt addımların atılmasını dəstəkləyənlərdən biridir. Seçki prosesində Trampın Orta Şərqdən uzaq durmaq və döyüşlərdən çəkilmə kimi sözlərinə qarşı çıxan Pompeo ABŞ-ın geri çəkilməsilə bağlı fikirləri sərt şəkildə rədd etdiyini deyib.
Tramp Sessions haqda da deyir ki, dünya səviyyəli hüquşünasdır və hüquq müəllimləri ona heyrandırlar. 69 yaşlı Sessions 1996-cı ildən senatordur. Ondan əvvəl isə öz doğma ştatı Alabamanın baş prokuroru olub.
Senatın ən qatı mühafizəkarlarından olan Sessions qanunsuz miqrantlar və sərhəd təhlükəsizliyində çox sərt mövqe tutur. O, baş prokuror olduğu vaxt afro-amerikalılar haqda dediyi irqçi sözlərə görə 1986-cı ildə federal hakim ola bilməmişdi.
Tramp prezidentliyə namizədliyini irəli sürəndə Trampı dəstəkləyən birinci respublikaçı senator məhz Sessions oldu.Tramp hətta onu vitse-prezidentliyə namizəd irəli sürmək istəyirdi.
TAHİR