Aydın Mirzəzadə: "Azərbaycan ərazisini işğal edərək oyuncaq bir rejim yaratmaq, sonradan isə Azərbaycanın ərazi bütövlüyünü tanıdığını demək çox əcaib bir siyasi düşüncədir"
Rusiyanın "Sputnik" beynəlxalq informasiya agentliyinin direktoru Dmitri Kiselyov Azərbaycan Prezidenti İlham Əliyevdən sonra bu dəfə Ermənistan prezidenti Serj Sarkisyandan geniş müsahibə götürüb. Sarkisyan müsahibədə Azərbaycanın Ermənistan üzərində iqtisadi və hərbi üstünlüyünü etiraf edib.
Onun Ermənistanın silahlanma yarışında ölkəmizlə rəqabət qabiliyyətində olmadığını, Azərbaycanın maliyyə potensialının böyük olduğunu söyləməsi də xüsusi diqqət çəkir.
"Hesab edirəm ki, bu, məcburi addım idi və hansısa formada regionda hərbi situasiyanı balanslaşdırmaq məqsədi daşıyırdı. Sirr deyil ki, Azərbaycan son bir neçə ildə müntəzəm olaraq ən yeni silahlar alıb. Bizim Azərbaycan kimi imkanımız yoxdur. Mən maliyyə imkanlarını nəzərdə tuturam. Lakin biz həmişə "antizəhər" tapmağa, situasiyanı balanslaşdırmağa çalışmışıq... Əlbəttə, insani baxımdan yaxşı olardı ki, belə sistem olmasın, ancaq sən məcbur olanda belə addıma gedirsən". Bu sözləri Sarkisyan "İsgəndər" raketləri ilə bağlı danışarkən deyib.
Onun cavablarında ən çox diqqət çəkən bir neçə məqam var. Onlardan biri Qarabağ münaqişəsinin nizamlanması üçün kompromislərin mümkünlüyü ilə bağlıdır. Erməni prezident deyib ki, Dağlıq Qarabağ problemi yalnız kompromislər və Minsk Qrupunun işləyib hazırladığı üç prinsip əsasında həll edilməlidir: ərazi bütövlüyü, xalqların öz müqəddəratını təyin etməsi və güc tətbiqindən imtina.
Ardınca o, Ermənistanın Azərbaycanın ərazi bütövlüyünü tanıdığını deyib. "Biz Azərbaycanın da ərazi bütövlüyünü tanıyırıq. Ancaq hesab edirik ki, Dağlıq Qarabağ probleminin həllində xalqların öz müqəddəratını təyin etməsi hüququ da nəzərə alınmalıdır" .
Sarkisyan "Azərbaycanın ərazi bütövlüyünü tanıyırıq" fikrini səsləndirməklə nəyə işarə edib?
Millət vəkili Aydın Mirzəzadənin sözlərinə görə, Sarkisyanın bu açıqlaması dünya ictimaiyyətini aldatmaq üçün növbəti gedişdir: "Ərazi bütövlüyünü tanımaq dövlətin BMT-yə qəbul olunarkən qanuni ərazisinə hörmətlə yanaşmaq deməkdir. Bu gün Ermənistanın Azərbaycan ərazilərinin 20 %-də qoşunları var və ölkəmizin orada suverenliyi pozulub. Azərbaycan ərazisini işğal edərək oyuncaq bir rejim yaratmaq, sonradan isə Azərbaycanın ərazi bütövlüyünü tanıdığını demək çox əcaib bir siyasi düşüncədir.
Azərbaycan Ermənistandan öz qoşunlarının işğal altında saxladığı torpaqlardan çıxarılmasını tələb edir. Bunun hansı yolla baş verməsinin Azərbaycan üçün əhəmiyyəti yoxdur. Ermənistan aprel döyüşlərində Azərbaycan Ordusunun gücünü gördükdən sonra hər vəchlə hərbi qarşıdurmanın qarşısını almağa çalışır".
Deputatın sözlərinə görə, Sarkisyanın növbəti bəyanatı əslində onun qorxu içində olduğunu göstərir: "Artıq Ermənistan cəmiyyətində də Sarkisyan və onun komandasına heç bir inam yoxdur. Ermənistan vətəndaşının Azərbaycana gələrək ölkəmizin ərazi bütövlüyünü tanıdığını deməsi, əslində, Ermənistanda alt qatda gedən dərin prosesin ilk işartılarıdır. Bu gün yüz minlərlə erməni Azərbaycanın ərazi bütövlüyünü tanıyır və bu məsələdə öz hökumətini müdafiə etmir.
Hesab edirəm ki, Ermənistan prezidentinin dünya ictimaiyyətini aldatmaq cəhdi yersizdir və baş tutmayacaq. İki ölkə arasında əlaqələr ancaq Ermənistan öz qoşunlarını Azərbaycan ərazisindən çıxardıqdan sonra mümkün ola bilər. Bu barədə Azərbaycan Prezidenti cənab İlham Əliyev dəfələrlə bildirib. Bir neçə gün əvvəl cənab Prezidentin cəbhə bölgəsində bununla bağlı bəyanatları Sarkisyan üçün çox ciddi dərs olmalıdır".
Məhəmmədəli QƏRİBLİ