Qabil Hüseynli: "Bu səbəbdən də hazırda "Ermənistan danışıqlara hazırdır" imitasiyasını etməklə beynəlxalq aləmi aldadırlar"
Xarici işlər naziri Elmar Məmmədyarov Fransaya işgüzar səfəri çərçivəsində noyabrın 17-də Fransanın xarici işlər və beynəlxalq inkişaf naziri Jan-Mark Eyro ilə görüşüb.
XİN-nin Mətbuat xidmətindən verilən məlumata görə, görüş zamanı tərəflər Azərbaycan və Fransa arasında siyasi, iqtisadi, mədəniyyət və təhsil sahələrində ikitərəfli əlaqələrin indiki durumu və perspektivləri, o cümlədən son zamanlar sürətlə inkişaf edən regionlararası əməkdaşlıq məsələlərini müzakirə edib. Azərbaycan-Fransa münasibətlərinin müsbət və davamlı şəkildə inkişaf etməsindən məmnunluq ifadə olunub.
Nazirlər Azərbaycanın Avropa İttifaqı ilə münasibətlərinə nəzər salaraq, bu günlərdə Brüsseldə Azərbaycanla Avropa İttifaqı arasında strateji tərəfdaşlıq haqqında yeni saziş layihəsi üzrə danışıqların başlanması üçün Avropa Komissiyasına müvafiq mandatın verilməsi faktını alqışlayaraq, bu qərarın ölkəmizin Avropa İttifaqı ilə münasibətlərinin məqsədyönlü və qarşılıqlı maraq əsasında inkişafına yeni təkan verəcəyinə əmin olduqlarını bildirib.
Həmçinin, nazirlər Ermənistan-Azərbaycan, Dağlıq Qarabağ münaqişəsinin həlli və danışıqlar prosesinin perspektivləri ətrafında fikir mübadiləsi aparıb. Onlar münaqişənin tezliklə siyasi həllinə nail olunması məqsədilə danışıqlar prosesinin məntiqli və nəticəyə yönəlmiş əsasda davam etdirilməsinin vacibliyini təsdiq edib. Bu xüsusda nazir Elmar Məmmədyarov fransalı həmkarı tərəfindən irəli sürülmüş, dekabrın 8-də Hamburqda keçirələcək ATƏT-in nazirlər toplantısı çərçivəsində xarici işlər nazirləri səviyyəsində "3+2" formatında görüşün keçirilməsi təklifini qəbul etdiyini bildirib.
Nəzərdə tutulan görüş formatı ilə bağlı maraqlı olan məsələ Ermənistanın bu görüşə razılıq verməsidir. Çünki uzun müddətdir Ermənistan sülh danışıqları prosesini tərk edib.
Ermənistanın yenidən danışıq masasına qayıtması nə ilə bağlıdır?
Politoloq Qabil Hüseynlinin sözlərinə görə, Ermənistan dərin daxili siyasi böhran içərisindədir və onun danışıqlar masasına qayıtmaqdan başqa çarəsi qalmır: "Sarkisyan hakimiyyətinin dayaqları xeyli sarsılıb. Müdafiə Nazirliyindəki son təmizləmələr, indi isə hökumətin iqtisadi problemlər məngənəsində çabalaması onu göstərir ki, Sarkisyan bir sıra addımları ilə ölkə ictimaiyyətini sakitləşdirməyə, hətta erməni mətbuatının yazdığı kimi, baş verə biləcək hakimiyyət çevrilişinin qarşısını almağa çalışır. Aprel hadisələri zamanı onların yaşadığı məğlubiyyət danışıqlar prosesinə getməyi təhlükəli edirdi. Ona görə də həmin müddətdən bu ana kimi onlar cəbhədə vəziyyətin gərginləşdirilməsinə böyük əmək sərf etdilər. Bununla ölkənin əsas problemlərindən diqqəti yayındırıblar. Sarkisyan Rusiyadan silah almaqla bölgədə vəziyyəti gərginləşdirir və ölkə daxilindəki antikonstitusion qüvvələri, bir növ, sakitləşdirməyə çalışır. Ermənistanın sülh danışıqlarına getməməklə bağlı mövqeyi Sarkisyan iqtidarının qorunub saxlanmasına xidmət edib. Hesab edilirdi ki, Sarkisyan sülh danışıqlarına getsə, Ermənistan əhalisinin dərin nifrətini qazanacaq. Hətta Sarkisyan hakimiyyətini itirə də bilərdi. Ona görə danışıqlara bir müddət meyl etmədi. Amma Sarkisyanın danışıqlardan imtina qərarı dünya ictimai rəyində, eləcə də Rusiyada ciddi etimadsızlıq yaradırdı. Bu səbəbdən də hazırda "Ermənistan danışıqlara hazırdır" imitasiyasını etməklə beynəlxalq aləmi aldadırlar. İnanmıram ki, Ermənistan nəzərdə tutulan danışıqlar zamanı konstruktiv mövqe nümayiş etdirsin".
Məhəmmədəli QƏRİBLİ