Dağlıq Qarabağ münaqişəsi ətrafında baş verənlər, həm hərbi, həm də diplomatik fəallığın artması Ermənistanda böyük narahatlığa səbəb olub. Burada hesab edilir ki, hadisələrin gedişi konflikt ətrafında situasiyanın dəyişməsinə gətirib çıxaracaq və bu, heç də Ermənistanın lehinə olmayacaq.
Ümumiyyətlə, Ermənistanda belə bir fikir hakimdir ki, Azərbaycan həm diplomatik, həm də hərbi müstəvidə getdikcə daha böyük üstünlük qazanır. Qeyd olunan fonda ordumuzun təlimləri də ermənilərdə böyük təşviş yaranmasına səbəb olub. Hesab edilir ki, bu təlimlər yeni güc nümayişidir və Ermənistan rəhbərliyi bunun qarşısında davam gətirə bilməyəcək.
Ermənistanın "armenianreport" saytı yazır ki, Azərbaycan ordusunun güc nümayişi artıq müəyyən qədər ərazilərin hələ apreldə qayıtmasına səbəb olub və hərbi əməliyyatlar uzansaydı, İrəvan daha çox ərazini geri qaytarmağa hazır idi: "Serj Sarkisyan "aprel müharibəsi" zamanı ərazilərin qaytarılmasına hazır idi. Hətta o, bütünlüklə Qarabağı qaytara da bilərdi". Sayt Ermənistan prezidentini tənqid edərək, onu qorxaqlıqda ittiham edib. Qeyd edib ki, apreldə baş verən döyüş zamanı Azərbaycan ordusu onun gözünü qorxutmuşdu: "Və o, əraziləri Azərbaycana qaytarırdı. Son anda daxildəki qüvvələr buna imkan vermədilər. Lakin belə görünür, bu gec, ya tez baş verəcək". Erməni mediası diqqəti ona da yönəldir ki, ölkə hərbi cəhətdən Azərbaycanla müqayisədə zəifdir və Sarkisyan hərbi rəhbərliklə bağlı istənilən msüqaviməti aradan qaldırmaq üçün kadr dəyişikliklərinə gedib. "Jamanak" qəzeti yazır ki, bu yaxınlarda media nümayəndələri və rəhbərləri ilə görüşdə Sarkisyanın təyin etdiyi yeni müdafiə naziri Vigen Sarkisyan özünə etimadsız münasibəti bir az da dərinləşdirib. Qəzet mənbələrə istinadla yazır: "Vigen Sarkisyan heç bir ciddi qərarı müstəqil qəbul etmir. Və hazırda canla-başla Serj Sarkisyanın referenti vəzifəsini yerinə yetirir. Heç bir ciddi məsələni həll etməyə və həlledici qərar verməyə onun ixtiyarı yoxdur. Bizim mənbələr xəbər verir ki, indi müdafiə nazirinin dəyişdirilməsinin əsas məqsədi daha çox aydın olur: elə adamı müdafiə naziri qoymaq ki, o, Serj Sarkisyanın qərarlarına qarşı çıxmasın və müti şəkildə bu qərarları icra eləsin. Bu, hətta Seyran Ohanyanın vaxtında da mümkün deyildi. O, təzyiqə davam gətirə bilirdi və hətta az-çox müstəqil qərar verə bilirdi". Hesab olunur ki, bütün bunlarda əsas məqsəd Qarabağ danışıqlarında mümkün güzəşt halında Sarkisyanın daxili təzyiqləri neytrallaşdırmasına hesablanıb. Güzəşt üçün isə Sarkisyana təzyiqlər artır. Bu mənada Serj Sarkisyanın "Rusiya bu gün" agentliyinə müsahibəsi ermənilər tərəfindən birmənalı qarşılanmayıb. Ermənistan mediası isə Sarkisyanın dolayısı ilə əraziləri qaytarmağa hazır olduğunu açıqladığını yazır. "Lragir" saytı Kremlin Dmitri Kiselyovu Sarkisyana təzyiq etmək üçün göndərdiyini yazıb: "Kiselyov Sarkisyanı küncə sıxışdırır və ondan eşitmək istədiklərini almağa çalışırdı. Hər şeydən əvvəl o, Sarkisyandan İlham Əliyevlə görüşməyə hazır olduğu fikrini aldı, lakin məcbur edirdi ki, Serj təkliflə çıxış etsin. Sarkisyanın müqaviməti isə çox zəif idi və nəticədə, onun müqaviməti qırıldı. Sarkisyan Qarabağ ətrafındakı rayonların qaytarılmasını nəzərdə tutan "Kazan düsturu"na razı olduğunu etiraf etdi və Kiselyov, qismən də olsa, öz hədəfinə nail oldu". Sayt qeyd edir ki, Sarkisyan 2009-cu ildə Türkiyə-Ermənistan sərhədlərinin açılması məsələsinə də toxunub: "Qeyd etdi ki, həmin vaxt protokolların imzalanması üçün Türkiyə tərəfi Ermənistandan Qarabağ ətrafındakı rayonlardan heç olmasa birini qaytarmağı istəyib. Lakin ermənilər buna razı olmadıqları üçün razılaşma təxirə düşüb. İndi isə Rusiya əraziləri qaytarmaq üçün Ermənistana təzyiq edir. Moskva "Kazan düsturu"nun həyata keçməsinə və erməni-türk münasibətlərinin nizama salınmasına çalışır. Bu məsələni Türkiyə və Rusiya razılaşıb. Sarkisyanın cavabları Ermənistanın müqavimət göstərəcəyini deməyə əsas verir, lakin bu müqavimət çox zəifdir". Baş verənlər ətrafında mövqeyini bölüşən tanınmış amerikalı politoloq, hazırda Vaşinqtondakı Dünya Siyasəti İnstitutunun professoru Pol Qobl Ermənistanın "168 jam" qəzetinə müsahibəsində İrəvanın təklənəcəyini bildirib. Donald Trampın prezidentliyi dövründə Rusiya və Azərbaycanın Qarabağ problemini Bakının xeyrinə həll edə biləcəyindən danışan politoloq deyib: "Rusiyanın Cənubi Qafqazdakı siyasətinin məqsədi, hədəfi Azərbaycanın özüdür. Bakı ilə Moskva arasında daha geniş əməkdaşlıq başlansa, mən Rusiyanın üzünü Azərbaycana doğru çevirəcəyini gözləyirəm və mənim fikrimcə, bu, Dağlıq Qarabağ problemi üzrə danışıqlar prosesində özünü göstərəcək. Ancaq hesab edirəm ki, Rusiya ikili oyun oynamaq iqtidarındadır. Rusiya Azərbaycandan indikindən daha çox təminat istəyəcək ki, Azərbaycan Rusiyanın orbitində qalsın. Ancaq Rusiyanı İranla birləşdirən dəmiryolunun açılışı, Prezident İlham Əliyevin Moskva ilə əməkdaşlıq haqda bəyanatı Kremllə Bakını yaxınlaşdıracaq. Bu baş versə, Ermənistan təklənəcək, təcrid olunacaq. Bu da danışıqlara təsir edəcək".
Nahid SALAYEV