Suriyada hökumət qüvvələri helikopterlərlə Hələb şəhəri ətrafına tərkibində xlor olan çəllək bombalar atmaqda ittiham olunur. Məlumatlara görə, bu hadisə zamanı 80 nəfər yaralanıb. Könüllü fövqəladə xilasedicilər deyir ki, hücumdan sonra insanlar çətin nəfəs almaqda çətinlik çəkib.
Suriya mülki müdafiənin xilasedicisi, Ibrahem Alhaj deyir ki, Hələbə helikopter çəllək bombaları atandan bir qədər sonra əraziyə çatıb və orda 4 ədəd xlor silindri görüb.
Üsyançıların nəzarətində olan ərazidə çalışan Suriya mülki müdafiə könüllüsü uşaqların oksigen maskaları ilə nəfəs almasını göstərən video da yayıb.
Avqust ayında aparılan araşdırmalar zamanı müəyyən olunmuşdu ki, hökumət ən azı iki dəfə xlordan istifadə edib. Ancaq Suriya hökuməti xlordan kimyəvi silah kimi istifadəni inkar edib.
Suriya hökumətinin müttəfiqi olan Rusiya isə üsyançıları Hələbin hökumət nəzarətində olan ərazilərini tərkibində "zəhərli qaz" olan mərmi atəşinə tutmaqda ittiham edir.
Xlor ümumi kimyəvi sənaye məhsuludur, lakin onun silah kimi istifadəsi Kimyəvi Silahlar Konvensiyası tərəfindən qadağan olunub.
BMT bəyan edib ki, Suriyada müharibə şəraitində yaşayan dinc sakinlərə qarşı bu ilin əvvəli qısa müddət ərzində daha amansız mübarizə metodları tətbiq olunub. Suriya haqqında olan hesabatda deyilir ki, fevral ayında elan olunan atəşkəsdən sonra bəzi şəhərlərə ilk dəfə humanitar yardımın göndərilməsinə icazə verilib, lakin bu, bir neçə həftə davam edib.
Hesabatda deyilir ki, 600 min suriyalı hazırda mühasirədə yaşayır və daha 300 min insan Hələb şəhərində blokadadadır.
Onu da qeyd edək ki, son vaxtlar xarici dəstəyin köməyi ilə Suriya ordusu quruda bir sıra irəliləyişlər edib.
Bu hadisələr çərşənbə günü Suriya müxalifətinin münaqişəyə son qoymaqla bağlı yeni siyasi planlar hazırlamaq üçün Londonda keçiriləcək görüşü ərəfəsində baş verib. Tədbirdə prezident Əsədə qarşı döyüşən üsyançılara dəstək verən "Suriyanın dostları" qrupunu təmsil edən ölkələrin xarici işlər nazirlərinin də iştirakı gözlənir.
Səudiyyə Ərəbistanı xarici işlər naziri Adil əl-Cubeyr BBC-yə bildirib ki, hələ də münaqişənin siyasi həllinə inanır və Əsəd qüvvələrinin son vaxtlarda bəzi irəliləyişlərə nail olmasına baxmayaraq o, qələbə əldə etmək imkanında deyil: "Lakin Bəşər Əsəd inadkarlıq etməyə davam edərsə və əməkdaşlıqdan imtina edərsə, onda sözsüz ki, özündə daha intensiv hərbi fəaliyyəti əks etdirən B planı olacaq".
Yeni plan Suriya müxalifətinin bu suala ən ətraflı cavabıdır: Prezident Əsəd gedərsə nə baş verəcək?
Plan Rusiya və İran kimi prezidenti dəstəkləyən ölkələri əmin etmək istəyir ki, dövlət institutları məhv olmadan və İraqdakı kimi zorakı xaos baş vermədən stabil keçid mümkündür. Bu məsələ bir çoxlarını narahat edir. Lakin prezident Əsədin və onun yaxın müttəfiqlərinin istefası tələbi həmişə Dəməşqdə rədd edilib və gürünür ki, bu belə də davam edəcək.
Səudiyyə Ərəbistanının mövqeyinin əksinə olaraq, ABŞ son vaxtlar Əsədə fərqli münasibət sərgiləməyə başlayıb. Belə ki, əvvələr Suriyada vətəndaş müharibəsinin bitməsi üçün Əsədin istefasını qəti şəkildə şərt kimi ortaya qoyan ABŞ bu dəfə fərqli münasibətlə diqqət mərkəzinə gəlib.
ABŞ Mərkəzi Kəşfiyyat İdarəsinin (CIA) direktoru Con Brennan Əsəd rejiminin çökməsini arzulamadıqlarını deyir. Suriyadakı müharibə ilə bağlı açıqlama verən Brennan deyir ki, müharibədə Əsəd hökumətinin çökməsi xaosa yol aça bilər.
CIA rəhbəri Əsəd rejimi yıxıldıqdan sonra kimin iqtidara gələcəyinin məlum olmasının Vaşinqtonu narahat etdiyini də vurğulayıb. ABŞ-ın narahatlıqlarının son dərəcə aydın olduğunu deyən Brennan silahlı qrupların Dəməşqə doğru irəliləməsinə qarşı olduqlarını ifadə edib: "İstədiyimiz ən son şey silahlı qrupların Dəməşqə doğru irəliləməsidir".
Qeyd edək ki, bir müddət əvvəl Brennan təxminən 6 ildir vətəndaş müharibəsi vəziyyətində olan Suriyanın parçalana biləcəyini demişdi: "Suriyanın bütüvlüyünün qorunub saxlanacağında optimist deyiləm. Suriyanın təkrar özünü düzəldəcəyini də bilmirəm".
TAHİR