"Belə şüarlar səsləndirib reallıqda isə fərqli bir xətti həyata keçirdikdə..."
Məlum olduğu kimi, Roma Papasının Azərbaycana planlaşdırılmış səfəri "Hamımız qardaşıq" şüarı altında həyata keçiriləcək. Bu barədə Müqəddəs Taxt-Tacın mətbuat xidmətinin yaydığı məlumatda bildirilir.
Məlumata görə, Roma Papası Fransisk Qafqaza sentyabrın 30-dan oktyabrın 2-dək davam edəcək ikinci apostol səfəri çərçivəsində Gürcüstan və Azərbaycana gələcək.
"Hamımız qardaşıq" şüarı "Matfeydən İncil"də yer almış kəlamlardan (23,8) və Roma-katolik kilsəsinin "bütün insanlar vahid ailənin bir hissəsidir, qardaşlığa və dostluğa çağrılırlar" təlimindən ilhamlanıb", - deyə Müqəddəs Taxt-Tacın mətbuat xidmətinin yaydığı məlumatda bildirilir.
Məlumatda, həmçinin, qeyd olunur ki, səfərin loqotipi şüarın mahiyyətini əks etdirir.
Qeyd edək ki, planlaşdırılan səfər hazırkı Papanın sayca 16-cı xarici səfəridir. Səfərin proqramına əsasən, Fransisk sentyabrın 30-da Tiflisə, oktyabrın 2-də isə Azərbaycana səfər edəcək.
Roma Papası bu ilin iyununda İrəvana səfər edib və orada "soyqırım" abidəsini ziyarət edib. Bundan başqa, o, "Azərbaycana gedərkən orada Ermənistanda gördüyüm həqiqətlər barədə danışacağam və deyəcəyəm ki, kiçik torpaq parçasına görə sülhü bərqərar etməməkdə möhtəşəm heç nə yoxdur" fikrini dilə gətirib. Bu da erməniləri çox mənmun edib. Belə olan halda, "Hamımız qardaşıq" şüarı altında səfərə gələcək Roma Papası həqiqi qardaşlığı göstərmək üçün Azərbaycanda nə etməlidir? Sözügedən məsələni dəyərləndirən millət vəkili, politoloq Elman Nəsirovun fikrincə, Papanın Bakıya "Hamımız qardaşıq" şüarı ilə gəlməsi pis əlamət deyil: "Azərbaycanda müxtəlif dinlərin, mədəniyyətlərin daşıyıcıları mehriban, harmonik şəkildə, qardaş kimi yaşayır. Bu baxımdan bizim üçün belə şüarlar yeni deyil. Azərbaycan dövlətinin siyasəti müxtəlif millətlərin, dinlərin daşıyıcılarının bir-birinə qardaşlıq münasibətləri şəklində yaşaması məntiqini özündə ehtiva edir. Hesab edirəm ki, Papanın belə bir şüarla Azərbaycana gələcəyini bəyan etməsi çox müsbət haldır. Nəzərə alsaq ki, Azərbaycanda katolik kilsəsinin inkişafı, orada dini ayinlərin yerinə yetirilməsi üçün kifayət qədər imkanlar var. Beynəlxalq aləm Azərbaycanı tolerant ölkə kimi tanıyır və artıq tolerantlığın mərkəzinə çevrilməkdədir. Bütün bu reallıqlar dünyada qəbul və dərk edilir. Roma Papası da Azərbaycandakı proseslərdən kifayət qədər xəbərdardır. Ancaq Papa bu kimi şüarlar səsləndirməklə qalmamalı, eyni zamanda əməli addımlar atılmalıdır. Qardaşlıqdan danışıb Ermənistan-Azərbaycan, Dağlıq Qarabağ münaqişəsi ilə bağlı xristian həmrəyliyi, qardaşlığı nümayiş etdirilməsin. Yəni məsələyə belə yanaşma olanda problemlər həllini tapmır. Əksinə, kəskinləşir. Ona görə də özü-özlüyündə yaxşı qardaşlıq ideyasını ehtiva edən belə yanaşmalar, şüarların praktiki tətbiqi özünü doğrultmalıdır. Bu baş verərsə, regiona sülh və təhlükəsizlik gələr. Amma belə şüarlar səsləndirib reallıqda isə fərqli bir xətti həyata keçirdikdə, tərəfkeşlik etdikdə, xristian həmrəyliyi nümayiş etdirdikdə hesab edirəm ki, bu, Samuel Hantinqtonun "Sivilizasiyaların toqquşması" nəzəriyyəsini praktiki olaraq maddələşdirmiş olur. Belə olarsa, bu çox təhlükəli bir tendensiyaya çevrilər. Papanın şüarı çox düzgündür. Təki bu konkret əməli işlərdə öz təsdiqini tapsın".
Vidadi ORDAHALLI