"Həqiqətən də işğalçı ölkə danışıqlarda dirəniş göstərməsinə rəğmən, yaxşı durumda deyil"
Uzun sürən sükutdan sonra Ermənistanın keçmiş prezidenti Robert Köçəryan mətbuata müsahibə verib. Müsahibəsində o Qarabağ tənzimlənməsi məsələlərinə toxunub:
"Bu gün biz şahidiyik ki, ciddi narahatlıq doğuran bir sıra əlverişsiz amil üst-üstə toplanmaqdadır: Rusiyadan silah təchizatı ilə hərbi balansın pozulması, Dağlıq Qarabağ üzrə beynəlxalq təşkilatların bir neçə xoşagəlməz bəyanat və hesabatları, Azərbaycanın təşəbbüsü ilə (təbii ki, Ermənistansız) regional əməkdaşlığın yeni formatının formalaşdırılması, ölkəmizdən yan keçməklə "Şimal-Cənub" nəqliyyat dəhlizinin yaradılması. Baş verənlərin geosiyasi nəticələri bizim nüfuzumuza uzun müddət ərzində iqtisadi, beynəlxalq və regional məsələlərdə mənfi təsir göstərəcək və əlbəttə ki, bu, Dağlıq Qarabağ üzrə danışıqlar prosesinə bizim təsir ehtiyatlarımıza da sirayət edəcək. Münaqişə tərəflərinin vəzifəli şəxslərinin bəyanatlarına və hökumətə yaxın KİV-in çoxsaylı yazılarına əsasən demək olar ki, tərəflərin güzəştə getmək hazırlığı müqayisəolunmazdır".
Bununla yanaşı, o, danışıqlarda güzəştlərin əleyhinə olduğunu bildirib. Daha sonra Ermənistandakı situasiyadan danışan eks-prezident deyib: "Təəssüf ki, ümidverici heç nə haqda danışmaq olmaz. Bizim statistika iqtisadiyyatda daha real vəziyyəti əks etdirməli, hökumət isə iqtisadi siyasətini formalaşdırmalıdır. Sosial şəbəkələrdə ölkədə yaranmış sosial-siyasi situasiyanı görmək mümkündür. Artıq bir neçə ildir cəmiyyət neqativ əhval-ruhiyyəyə köklənib, açıq-aşkar radikallaşma gedir. Bu, investisiya fəallığına, alıcılıq əhval-ruhiyyəsinə, miqrasiyaya, deməli, bütövlükdə iqtisadiyyata təsir göstərməyə bilməz".
Ümumilikdə Köçəryanın bu kimi neqativ tonda açıqlamalar verməsi nədən xəbər verir?
Sözügedən məsələ ilə bağlı fikirlərini "Bakı-Xəbər"lə bölüşən AMİP Siyasi Şurasının üzvü Əli Orucovun sözlərinə görə, R.Köçəryanın belə açıqlama verməsinin kökündə bir sıra amillər dayanır: "Köçəryanın Ermənistanın hazırkı vəziyyəti ilə bağlı toxunduğu məqamlar reallığı əks etdirir. Həqiqətən də işğalçı ölkə danışıqlarda dirəniş göstərməsinə rəğmən, yaxşı durumda deyil. Ölkə iqtisadiyyatı geriləməkdə davam edir. Mövcud böhran iqtisadiyyatda müşahidə olunan geriləməni bir az da dərinləşdirir. Ən başlıca məqam ondan ibarətdir ki, Ermənistan regionda həyata keçirilən böyük layihələrdən kənarda qalıb. Bu da ölkə iqtisadiyyatına mənfi təsir göstərir. Ancaq onu da nəzərə almaq lazımdır ki, Köçəryanın belə açıqlamalar verməsinin kökündə hakimiyyət ambisiyaları dayanır. Artıq neçə ildir onun Serj Sarkisyanla münasibətləri xeyli pisləşib. Baxmayaraq ki, onlar birlikdə separatçı quruma rəhbərlik ediblər, Ermənistanda Levon Ter-Petrosyan hakimiyyətini deviriblər. Köçəryan prezident olandan sonra Sarkisyan ölkənin müdafiə naziri olub və s. Ancaq 2008-ci ildən sonra vəziyyət dəyişdi. Sarkisyan prezident olandan sonra Köçəryana məxsus biznesin böyük hissəsini öz əlində cəmləşdirdi. Köçəryanın müsabihəsində danışıqlarla bağlı radikal mövqedən çıxış etməsi də təsadüfi deyil. O hesab edir ki, Sarkisyanın kompromisə getməsi onun yenidən hakimiyyətə yiyələnmək istəyini önləyə bilər. Hər halda onu da nəzərə almalıyıq ki, danışıqların dalana dirənməsində və Ermənistanın acınacaqlı vəziyyətə düşməsində Köçəryanın da az rolu olmayıb. O, on il Ermənistana rəhbərlik edib". Vidadi ORDAHALLI