"Xüsusilə də Suriya məsələsində Türkiyənin əməliyyatları genişləndirməsi onları bərk narahat edir"
İran Türkiyəyə Suriyadakı hərbi əməliyyatları dərhal dayandırmaqla bağlı çağırış edib. Bu barədə İranın Xarici İşlər Nazirliyinin sözçüsü Bəhram Qasimi deyib.
"Terrorizm əleyhinə mübarizə və regionda stabillik və təhlükəsizliyi qorumaq cəhdlərinə baxmayaraq, region ölkələri ilə siyasətdə dəyişməz və vacib prinsip sülh axtarışıdır. Bununla belə, bu məsələ ərazi bütövlüyünü pozmağa və başqa ölkənin ərazisində mərkəzi hökumətlə koordinasiya etmədən hərbi əməliyyat aparılmasına bəraət qazandırmır", - sözçü bildirib.
Bəhram Qasimi əlavə edib ki, mərkəzi hökumətin siyasi suverenlik və qanuni gücünü kölgə altında qoyan hər hansı sistemə müraciət etmək qəbuledilməzdir. O əlavə edib ki, Türkiyənin Suriyada davam edən hərbi mövcudluğu məsələləri daha da mürəkkəbləşdirə bilər: "Suriyanın şimalında münaqişənin yayılması daha çox günahsız vətəndaşın ölümünə səbəb olacaq. Türkiyə ordusu Suriyadakı hərbi fəaliyyətini dərhal dayandırmalıdır". Qeyd edək ki, Türkiyə dəfələrlə Suriyanın ərazi bütövlüyünü dəstəklədiyini bəyan edib. Belə olan təqdirdə, İran Türkiyənin Suriyadakı hərəkətlərindən niyə narahat olub?
Konfliktoloq Aqşin Əliyev qəzetimizə açıqlamasında bildirdi ki, bu narahatlığı İranla Rusiya eyni anda edib: "Suriyadakı münaqişənin anatomiyasına bir qədər fikir verək. Əvvəl Türkiyənin Suriya məsələsindəki mövqeyi həm İran, həm də Rusiyanın mövqeyindən kəskin fərqlənirdi. Türkiyə konkret olaraq Qərb koalisiyasında yer alaraq Əsəd rejiminə qarşı çıxırdı. Rusiya isə Əsədi müdafiə edirdi. İran məzhəb amilinə görə Əsədə dəstək verirdi. Türkiyədə baş verən hərbi çevrilşə cəhddən sonra Türkiyənin xarici siyasət kursunda əhəmiyyətli korrektələr edildi. İlk addım Rusiya ilə münasibətlərin normallaşmasına yönəldi. Ərdoğanın Rusiya səfərindən sonra Türkiyə antiterror tədbirləri çərçivəsində Suriyaya qoşun yeritdi. Bu addım həm İran, həm də Rusiya tərəfindən təqdir edildi. Maraqlıdır ki, Türkiyənin oradakı əməliyyatlarından sonra hər iki ölkə fərqli bəyanatla çıxış etməyə başladı. Rusiya əvvəl Türkiyəyə Əsəd hakimiyyətilə koordinasiyalı qaydada fəaliyyət göstərməyi tövsiyə edirdi. Türkiyə həmin çərçivədə fəaliyyət göstərdi və məqsədi açıq bəllidir. Qardaş ölkə kürd yaraqlılarını öz sərhədindən bir qədər kənara sıxışdırmaq istəyir. Çünki onlar mövqelərindən istifadə edərək, PKK ilə əlbir olub Türkiyəyə həmlələr edirdi. Əməliyyatın uğurlu alınması İranı narahat edir. Çünki onlar regionda balansın itməsini istəmir. İran bölgədə kiminsə güclənməsində maraqlı deyil. Xüsusilə də Suriya məsələsində Türkiyənin əməliyyatları genişləndirməsi onları bərk narahat edir. Belə getsə, Türkiyə Suriya konfliktində əsas söz sahibinə çevrilə bilər. Ən maraqlısı isə budur ki, ABŞ da İranla eyni mövqeni sərgiləməyə başlayıb".
Məhəmmədəli QƏRİBLİ