"Ümid edirik ki, bundan sonrakı fəaliyyətində həmsədrlər daha korrekt və rasional olacaq"
Dağlıq Qarabağ münaqişəsinin nizamlanmasını üzərinə götürmüş ATƏT-in Minsk Qrupu həmsədrləri növbəti məsləhətləşmələr keçirəcək. Rusiya Xarici İşlər Nazirliyinin rəsmi nümayəndəsi Mariya Zaxarova məsləhətləşmələrin sentyabrın 8-də Moskvada keçiriləcəyini deyib. O bildirib ki, görüşdə Qarabağ nizamlanması ilə bağlı aktual məsələlər müzakirə olunacaq: "Mayın 16-da Vyanada və iyunun 20-də Sankt-Peterburqda keçirilən görüşlərdə əldə olunmuş razılaşmaların reallaşdırılmasının gedişatına xüsusi diqqət yetiriləcək".
M.Zaxarova əlavə edib ki, söhbət mütəmadi olaraq Vaşinqton, Paris və Moskvada keçirilən məsləhətləşmələrdən gedir. O qeyd edib ki, bu görüşün əsas məqsədi üç ölkənin Qarabağ nizamlanması ilə bağlı səylərinin koordinasiyasıdır.
Həmsədrlərin bu məsləhətləşməsindən nə gözləmək olar?
Azərbaycan Milli İstiqlal Partiyasının sədr müavini Elşən Mustafayev qəzetimizə açıqlamasında bildirdi ki, uzun illərdir Dağlıq Qarabağ münaqişəsinin həlli ilə ATƏT-in Minsk Qrupu məşğul olur: "1996-cı ilin dekabrından onun Rusiya, ABŞ və Fransadan ibarət həmsədrlik institutu fəaliyyət göstərir. Bu 20 il ərzində həmsədrlər mütəmadi olaraq görüşür, bölgəyə və münaqişə zonasına səfərlər edirlər. Azərbaycan dəfələrlə rəsmi səviyyədə həmsədrlərin nəticəsiz fəaliyyətinə etiraz edib. Zaxarovanın özü də deyir ki, bu məsləhətləşmələr mütəmadi şəkildə həmsədr ölkələrin paytaxtlarında keçirilir. Ancaq onu da etiraf etmək lazımdır ki, son vaxtlar danışıqlar prosesində müsbət dinamika müşahidə olunur. Ancaq bu məsələdə bir özəllik diqqəti çəkir. Vyana və Sankt-Peterburqda keçirilən görüşlərdə əldə olunan razılaşmaların reallaşmasına diqqət yetiriləcəyi deyilir. Belə bir məntiq ortaya çıxır ki, deməli, qismən də olsa, hansısa razılaşma əldə olunub. Ermənistan tərəfinin həmin danışıqlardan sonra davranışlarından görünür ki, onlar prosesdən yayınmaq istəyir. Bu baxımdan həmin razılaşmaların həyata keçirilməsini koordinasiya etmək lazımdır. Həmsədrlərin görüşündəki bu detala xüsusi diqqət yetirilməlidir. Ümid edirik ki, bundan sonrakı fəaliyyətində həmsədrlər daha korrekt və rasional olacaq".
Məhəmmədəli QƏRİBLİ