"XİN-in çevik fəaliyyətini xüsusilə vurğulamalıyıq"
Ermənistanın təxribatçı məqsədlərlə siyasi və xarici siyasət məsələləri üzrə mərkəzlə birlikdə 2-3 sentyabr tarixlərində İrəvanda Azərbaycanın işğal edilmiş ərazilərində yaradılmış qondarma rejimin "müstəqilliyinin 25 illiyi" bəhanəsi ilə təşkil etməyə çalışdığı tədbir ləğv edilib. Keçmiş dövlət rəsmiləri, parlament üzvləri və ictimai şəxslərin dəvət edildiyi bu tədbir iştirakçılarının sonra işğal edilmiş Azərbaycan ərazilərinə səfəri nəzərdə tutulurdu.
Siyasi və xarici siyasət məsələləri üzrə mərkəzin sədri Fabien Baussart bəyanatla çıxış edərək bu təşəbbüsü ləğv etmək məcburiyyətində qaldığını bildirib. Bu barədə Azərbaycan XİN-in Mətbuat xidmətinin rəhbəri Hikmət Hacıyev məlumat verib. "Bildiririk ki, Ermənistanın qondarma rejimin "müstəqilliyinin 25 illiyi" bəhanəsi ilə gizlin şəkildə planlaşdırdığı bu təxribatçı tədbirlərin qarşısını almaq üçün Xarici İşlər Nazirliyi 25 və 31 avqust tarixlərində bəyanatlarla çıxış edib və zəruri önləyici addımlar atılıb.
Azərbaycan Respublikasının diplomatik nümayəndəlikləri, xüsusilə Fransa və Böyük Britaniyadakı səfirlikləri tədbirin təşkilatçıları və dəvət olunan şəxslərlə izahedici və məlumatlandırıcı iş aparıb, birtərəfli və qərəzli xarakter daşıyan bu tədbirin münaqişənin həlli üzrə aparılan danışıqlar prosesinə xələl gətirdiyi bildirilib.
Müsbət haldır ki, tədbirə dəvət almış şəxslərin bir çoxu regiondakı vəziyyətin həssaslığını bilərək iştirakdan imtina edib.
Rəsmi İrəvanın bu kimi təxribatçı əməllərlə məşğul olmaq əvəzinə prezidentlərin Vyana və Sankt-Peterburq görüşlərinin ruhuna uyğun olaraq, münaqişənin həlli istiqamətində konstruktiv addımlar atması regionda davamlı sülhün təmin edilməsinə xidmət edərdi. Ermənistanın bu kimi təxribatçı əməllərinin qarşısını almaq üçün bundan sonra da bütün zəruri tədbirlər görüləcək".
Politoloq Qabil Hüseynlinin sözlərinə görə, həmin qondarma tədbirin ləğv olunmasını Azərbaycan diplomatiyasının uğuru kimi qiymətləndirmək olar: "Uzun illərdir belə tədbir keçirilir. Adətən biz qondarma "respublika" ilə bağlı keçirilən tədbirdən sonra sərt reaksiya verirdik. Bu dəfə bir qədər fərqli yanaşma ortaya qoyduq. Xarici İşlər Nazirliyi nəzərdə tutulan tədbirin mahiyyəti barədə əvvəlcədən ictimaiyyətə açıqlama yaydı. Tədbirə dəvət edilənlərə mahiyyət izah olundu. Həmin adamların bir çoxu tədbirdə mahiyyəti dərindən dərk etmədən də iştirak edə bilərdi. Onlara izah olundu ki, beynəlxalq ictimaiyyət qəti şəkildə Ermənistan tərəfindən Azərbaycana qarşı hərbi gücdən istifadəni və onun torpaqlarının işğalının nəticələrini davamlı olaraq qınayıb. 1993-cü ildə BMT Təhlükəsizlik Şurası 822, 853, 874 və 884 saylı qətnamələr qəbul edib, Azərbaycana qarşı gücdən istifadəni və onun ərazilərinin işğalını pisləyib, eyni zamanda Azərbaycanın suverenliyi və ərazi bütövlüyünü, o cümlədən beynəlxalq səviyyədə tanınmış sərhədlərinin toxunulmazlığını bir daha təsbit edib. Bildirildi ki, münaqişənin həlli istiqamətində konstruktiv addımlar atmaq əvəzinə qondarma rejimin "müstəqilliyinin 25 illiyi" bəhanəsi ilə Ermənistanın təşkil etməyə çalışdığı növbəti təxribatçı tədbirlər prezidentlərin Vyana və Sankt-Peterburq görüşlərinin ruhuna zidd olaraq, münaqişənin həlli üzrə ATƏT-in Minsk Qrupunun həmsədr dövlətlərinin vasitəçiliyi ilə aparılan danışıqlar prosesinə xələl gətirir, regionda davamlı sülhün təmin olunması istiqamətində atılan səylərə fayda vermir. Bilirsiniz ki, Azərbaycanın icazəsi olmadan qondarma rejimə səfər edən şəxslər bizim XİN tərəfindən tərtib olunan "qara siyahı"ya salınır. Sonra onlara Azərbaycana səfər etməyə icazə verilmir. Bir çox tanınmış şəxslər bu amili də nəzərə aldığı üçün qondarma rejimin təşkil etdiyi tədbirdən imtina etdi. Təbii ki, bu məsələdə XİN-in çevik fəaliyyətini xüsusilə vurğulamalıyıq".
Məhəmmədəli QƏRİBLİ