Fətullah Gülənlə bağlı ABŞ və Türkiyə arasında yaşanan ziddiyyət çözülməmiş kürdlərlə bağlı məsələ də tərəflərin mövqeyinin əhəmiyyətli dərəcədə haçalandığını göstərir. Belə ki, ABŞ bölgədə terrorçu kürdlərə Türkiyə ordusu tərəfindən zərbələr endirilməsini yolverilməz sayır. Türkiyə isə təhlükəsizliyinə təhdid yaradanların hədəfdə olacağını açıq bəyan edir və onların məhv edilməsini labüd sayır və Vaşinqtonun bu xüsusda açıqlamalarını lüzumsuz hesab edir.
Qeyd edək ki, ABŞ hakimiyyəti Türkiyə ordusunun Suriyadakı kürd silahlı dəstələrinə zərbələr endirməsini pisləyərək, diqqətini daha çox İŞİD-lə mübarizəyə yönəltməyə çağırıb. ABŞ prezidentinin müşaviri Ben Rods bildirib ki, Barak Obama türkiyəli həmkarı Rəcəb Tayyip Ərdoğanla sentyabrın 4-də baş tutacaq görüşdə Türkiyənin Suriyaya müdaxiləsini və Suriyanın "demokratik qüvvələrinə" qarşı addımlarının tənqid etmək niyyətindədir.
Ankara isə Türkiyənin Suriyada keçirdiyi "Fərat qalxanı" əməliyyatına dair Ağ Ev nümayəndəsinin tənqidi bəyanatını yolverilməz adlandırıb və bu mövqeyini ABŞ-ın ölkədəki səfirinə çatdırıb. Türkiyə Xarici İşlər Nazirliyinin mətbuat katibi Tanju Bilgiç bu xüsusda bildirib: "Bu cür bəyanatlar yolverilməzdir və Ankara-Vaşinqton müttəfiq münasibətlərinə uyğun deyil. Əməliyyat Türkiyənin milli təhlükəsizliyinə yönəlmiş təhdidlər aradan qaldırılanadək davam etdiriləcək. ABŞ-la razılaşmamıza əsasən, Suriyadakı kürd silahlı dəstələrinin Fəratdan şərqə doğru çəkilməsini gözləyirik". Belə bir vaxtda Suriyanın şimalında Türkiyə Silahlı Qüvvələri tərəfindən həyata keçirilən "Fərat Qalxanı" əməliyyatı ilə əlaqədar ABŞ-dan sürpriz bir iddia gəlib. ABŞ Silahlı Qüvvələri Mərkəzi Komandanlığının sözçüsü Con Tomas türk və kürd qrupların qarşıdurmaya girməmək barədə təminat verdiklərini bildirib. Onun sözlərinə görə, məqsəd əsas diqqəti Suriyada İŞİD təhlükəsinə ayırmaqdır. Bu açıqlamanın Münbiçdə PKK-nın sıralarında döyüşən üç amerikalı əsgərin öldürülməsindən dərhal sonra verilməsi diqqətdən yayınmayıb. Türkiyə hərbi mənbələri isə YPG ilə hər hansı bir razılaşmanın olmadığını bildiriblər. Tanju Bilgic bir daha kürd qrupların tezliklə Fərat çayının şərqinə çəkilməli olduğunu deyib. O, Münbiç əməliyyatından sonra Fərat çayının qərbində PYD güclərinin qalmayacağına dair ABŞ-ın üzərinə götürdüyü öhdəliyi xatırladıb.
Son məlumatlara görə isə, Türkiyənin başladığı "Fərat Qalxanı" əməliyyatı çərçivəsində Suriyanın Cerablus şəhərini İŞİD-dən təmizləyən Azad Suriya Ordusu Saruç çayına qədər olan bölgəni PYD-dən alıb. Azad Suriya Ordusu yeni hədəfinin Əl-Bab şəhəri olduğunu açıqlayıb. PYD-nin əlində olan çoxlu sayda kənd və qəsəbəyə nəzarəti təmin edən Azad Suriya Ordusu Münbiçdən 20 kilometr şimalda yerləşən Saruc çayında dayanıb. Səlahiyyətlilərə görə, əməliyyatın növbəti hədəfi İŞİD-in əlində olan Əl-Bab şəhəridir. Əl-Bab İŞİD-in nəzarətindəki Marenin ən əhəmiyyətli təchizat yolunun üzərində yerləşir. Əl-Babın təmizlənməsindən sonra Azad Suriya Ordusunun növbəti hədəfi Mare olacaq. Beləliklə, Suriyanın şimalında yaradılacaq təhlükəsiz bölgəyə, Cerablusla yanaşı, Əl-Bab və Mare də əlavə olunacaq. Təhlükəsiz bölgə 48 kilometr enində və 78 kilometr uzunluğunda olacaq. Əməliyyatın uğurlu alınması üçün Türkiyə ordusu terrorçulardan təmizlədiyi Suriyanın Cerablus şəhərinə Almaniya istehsalı və NATO-nun ən güclü silahlarından biri olan "Leopard 24A" tankları göndərir. Hərbi mütəxəssislər deyib ki, Türkiyə ordusu avqustun 24-də başladığı hərbi əməliyyatlarda ABŞ istehsalı olan "M-60" tanklarından istifadə edib. Ancaq bu tankların istehsal ili köhnədir və minaya davamlılıq qabiliyyəti istənilən səviyyədə deyil. Minaya davamlılıq qabiliyyətinə görə "Leopard 24A" tankı əlverişli hesab edilir. Digər tərəfdən isə dünyanın ən güclü tankı sayılan "Leopard 24A" səhra şəraitində sürətli manevr imkanlarına və dəqiq atəş qabiliyyətinə malikdir.
Amma Türkiyənin Suriyada kürd terrorçularını sıxışdırması ABŞ-da narahatlıqla qarşılanır. Ankara isə bu narahatlığa əhəmiyyət vermir, əksinə, bildirir ki, "Türkiyə - ABŞ əlaqələrini, 15 iyul dövlət çevrilişinə cəhd də daxil olmaqla, digər məsələlər əsla pozmamalıdır və bunun pozulmasına icazə verilməməlidir. Türkiyənin baş naziri Binəli Yıldırım bu mövqenin ölkəsi üçün dəyişməz olduğunu bildirir. O, Fətullah Gülənin Türkiyəyə gətirilməsi ilə bağlı bildirib ki, onun cəzasını alması üçün ölkəyə gətirilməsi sürətləndirilərsə, bu, ABŞ-Türkiyə münasibətlərində irəliyə doğru atılmış addım olacaq. Amma ABŞ FETÖ başçısı Fətullah Gülənin ekstradisiyasını uzatmaqla, həmçinin Suriyada kürd terrorçularını qorumaqla Türkiyə ilə münasibətlərinə ciddi ziyan vurur.
Nahid SALAYEV