"Bu fəallaşma ölkəmizdə keçiriləcək referendumla bağlıdır"
Avropa Parlamentində üçüncü ölkələrdə insan hüquqları və korrupsiya mövzusunda dinləmə keçiriləcək. Dinləmədə "Sport for Human Rights Coalition"un (İnsan hüquqları naminə idman) koordinatoru Rebeka Vinsent çıxış edəcək. O bu barədə özünün "twitter" mikrobloqunda yazıb.
Dinləmələrdə Avropa Xarici Fəaliyyət Xidmətinin və Avropa Komissiyasının nümayəndələri də iştirak edəcək. Vinsent hesab edir ki, Avropa İttifaqı Azərbaycan hökumətini daha sərt şəkildə insan hüquqları sahəsində öhdəliklərinə riayət etməyə çağırmalıdır.
Məruzə ilə çıxış etmək istəyən Rebekanın adı Azərbaycana tanışdır. O bir neçə dəfə Azərbaycan əleyhinə kampaniyalara qatılıb. Xüsusilə ötən il Avropa Oyunları vaxtı, bu il "Formula-1" yarışları vaxtı Vinsent Azərbaycanla bağlı xüsusi qaralama məqsədli kampaniyalar aparıb.
Hazırda onun fəallaşması nə ilə bağlı ola bilər?
Politoloq olan QHT rəhbəri Vüqar Qədirov qəzetimizə açıqlamasında bildirdi ki, Rebeka Vinsent adı bizlərə çox tanışdır: "Bir neçə fakta diqqət etmək kifayətdir ki, həmin adamın əsl niyyəti bəlli olsun. "Eurovision" mahnı yarışması zamanı həmin adam "Demokratiya naminə oxu" adlı kampaniya keçirirdi. Məqsədi tədbirin keçirilməsinə mane olmaq, Azərbaycan haqda yalan informasiyaları yaymaq idi. Sonra ölkəmizdə keçirilən idman yarışması olan Avropa Oyunları zamanı da həmin xanım "İnsan hüquqları naminə idman" adlı kampaniyanın fəalları sırasında oldu. Bu tədbirlər arasında da tez-tez gözə dəyirdi. Xüsusilə də Azərbaycanda ciddi tədbirlər və hadisələr olan zaman. Belə adamlar bəzi dairələrin əlində təzyiq vasitəsidir. Lazım olanda onlardan istifadə olunur. Hazırda Rebekanın yenidən gündəmə gəlməsi təsadüfi deyil. Hesab edirəm ki, bu fəallaşma ölkəmizdə keçiriləcək referendumla bağlıdır. Azərbaycanda insan haqlarının vəziyyəti normaldır. Kiminsə konkret cinayət əməlinə görə həbs edilməsi heç də təqib anlamına gələ bilməz. Bunlar sanki belə bir mexanizmlə çalışır. Adam bir az tanınırsa, cinayət edib həbs olunsa belə, o təqib olunmuş sayılır. Tamamilə yanlış yanaşmadır. Biz Avropa Parlamentindən belə qərəzli yanaşmaların çox şahidi olmuşuq. Mənə elə gəlir ki, son vaxtlar münasibətlərin normallaşmasında maraqlı tərəf kimi görünən AB belə qərəzli münasibətlərin sərgilənməsinə yol verməməlidir".
Məhəmmədəli QƏRİBLİ