"Hesab edirəm ki, Azərbaycan belə hallara diqqətlə yanaşmalı və mümkün imkanlar çərçivəsində gərəkən tədbirləri görməlidir"
Ermənistan növbəti dəfə təxribata əl ataraq qondarma "Dağlıq Qarabağ Respublikası"nın 25 illik "yubiley"i ilə bağlı müxtəlif ölkələrdə tədbirlər keçirmək istəyir. Ermənistan tərəfindən Azərbaycanın işğal olunmuş ərazilərində yaradılmış qondarma rejimin 25 illiyi adı altında Fransada yerləşən Siyasi və xarici siyasət məsələləri üzrə mərkəzin xətti ilə avqustun sonu, sentyabrın əvvəlində beynəlxalq konfransın keçirilməsi nəzərdə tutulur.
Bu konfransda iştirak etmək üçün rəsmi İrəvan bir sıra keçmiş dövlət rəsmilərinə, ictimai xadimlərə, parlament üzvlərinə dəvətlər göndərir. Ermənistan tərəfi konfrans iştirakçılarının Azərbaycanın işğal olunmuş ərazilərinə bu və ya digər adla səfərini də təşkil etməyi planlaşdırır. Ermənistan tərəfindən bu tədbirlə əlaqədar görülən işlər gizlin şəkildə aparılır və KİV-ə məlumat verilmir. Məsələ ilə bağlı Azərbaycan Xarici İşlər Nazirliyi xəbərdarlıq edib.
Digər tərəfdən, məlumata görə, ermənilər Uqandada sentyabrın 2-də forum keçirməyə hazırlaşır. Forumun məhz sentyabrın 2-də keçirilməsinin planlaşdırılması təsadüfi deyil. Bunda da məqsəd separatçı qurumu təbliğ etməkdir. Məlumata görə, Uqandadakı Ermənistan səfirliyi bu istiqamətdə hərəkətə keçib.
Sözügedən məsələ ilə bağlı fikirlərini "Bakı-Xəbər"lə bölüşən AMİP Siyasi Şurasının üzvü Əli Orucovun sözlərinə görə, bu kimi hallara son dərəcə həssas yanaşmaq lazımdır: "Yəni Azərbaycan diplomatiyası, diaspor təşkilatları son dərəcə diqqətli və dinamik olmalıdır. Dinamik deyəndə onu nəzərdə tuturam ki, buna dərhal adekvat reaksiya verilməli və hansı ölkədə keçirilirsə, buna etiraz edilməlidir. Eyni zamanda, həmin ölkə məlumatlandırılmalıdır ki, buna yol verməsin. Biz nə qədər bu məsələlərdə ayıq-sayıqlıq nümayiş etdirsək, bir o qədər onların çirkin niyyətlərinin qarşısını almış olarıq. Baxın, ermənilər o qədər də diqqəti cəlb etməyən uzaq, yoxsul Afrika ölkəsində bu kimi tədbir keçirmək istəyir. Hesab edirlər ki, bu o qədər də diqqəti cəlb etməz. Belə-belə analoji tədbirləri digər ölkələrdə keçirməklə qondarma separatçı rejimi təbliğ etmək məqsədi güdürlər. Hesab edirəm ki, Azərbaycan belə hallara diqqətlə yanaşmalı və mümkün imkanlar çərçivəsində gərəkən tədbirləri görməlidir. Başqa çıxış yolu yoxdur".
Vidadi ORDAHALLI