"Buna əmin olmaq üçün Ermənistan mətbuatını izləmək kifayətdir"
Ermənistan mətbuatının iddialarına görə, yaxın vaxtlarda onların sülhməramlı qüvvələri Yaxın Şərqdə görünə bilər. Bildirilir ki, bununla bağlı Putin-Sarkisyan görüşündə razılığa gəlinib. Erməni mətbuatı bu xəbəri xüsusi təqdimatla tirajlayır. Onlar Ermənistanın Suriyadakı proseslərdə söz sahibinə çevriləcəyinə dair absurd iddialarla çıxış edir. Qeyd edilir ki, razılaşmaya əsasən, erməni əsgərləri Suriyadakı soydaşlarının kompakt yaşadığı Kesabe şəhərində xidmət keçməyə hazırlaşır.
Qeyd edək ki, həmin ərazi həm də Türkiyə ilə sərhədə yaxın sayılır. Erməni sülhməramlılarının dedikləri yerdə xidmət keçməsi hansı fəsadlara səbəb ola bilər?
Konfliktoloq Aqşin Əliyev qəzetimizə açıqlamasında bildirdi ki, ermənilər bu canfəşanlığı öz soydaşlarına kömək adı ilə əsaslandırır: "Belə fikirlər səslənir ki, Rusiya ilə Ermənistanın birgə qruplar yaratmaq barədə əldə etdiyi razılaşma əsasında bu mümkündür. Mənə elə gəlir ki, Ermənistanda bu təbliğatın aparılması onlar üçün simvolik bir məna da kəsb edir. Kasabedə xidmət keçməklə onların bayrağı orada dalğalanacaq. Erməni millətçiləri iddia edir ki, həmin ərazilər tarixi erməni torpaqlarıdır və qədim Klikiya dövlətinin yarısı hesab olunur. Artıq dövlət də bu iddianı dəstəkləyir. Maraqlıdır, niyə Ermənistan indiyə kimi hansısa ölkəyə sülhməramlılar göndərməyə bu qədər maraqlı olmayıb? Bəllidir ki, bu, humanitar istəkdən irəli gəlmir. Hətta bəzi erməni ekspertləri iddia edir ki, belə bir missiya baş tutarsa, Ermənistan Yaxın Şərqdə söz sahibinə çevrilə bilər. Bunun da əsaslandırılmasını tarixi sərsəmləmələrə istinadən edirlər. Ermənistanın bu cür zərərli iddialarını nəzərə almaqla onların sülhməramlı kontingentin tərkibində iştirakına etiraz etmək lazımdır. Çünki onlar orada sülh yaratmağa deyil, əlavə münaqişə ocağının əsasını qoymağa gedir. Buna əmin olmaq üçün Ermənistan mətbuatını izləmək kifayətdir. Belə bir kontingentin ora göndərilməsi onlarla türk əsgərləri arasında konfliktə səbəb ola bilər".
Məhəmmədəli QƏRİBLİ