"Ermənistan rəsmiləri barədə açıqlanan faktlar bizim üçün məqbul sayılır"
Ermənistan Respublika Partiyasının önəmli funksionerlərindən biri və həmin ölkənin parlamentinin vitse-spikeri Ermine Nağdalyan yenidən ölkəsinin gündəmində geniş müzakirə olunur. Ermənistanın bəzi aparıcı KİV-ləri onun bəzi terror təşkilatları ilə əlaqədə olmasından yazır. Vitse-spiker hələlik həmin ittihamlara cavab verməyib.
Qeyd edək ki, sözügedən siyasətçi bu ilin aprel ayında cəbhədə gedən döyüşlərdən sonra Ermənistanda bomba effekti verən açıqlama ilə çıxış etdi. O bildirib ki, Dağlıq Qarabağ və hazırda nəzarətimizdə olan torpaqlarla bağlı yanlış təsəvvürlərə qapılmaq gərək deyil: "Bu yanlışlıq bizə çox baha başa gələ bilər. Hazırda nəzarətimizdə olan, əlimizə keçirdiyimiz torpaqları nə zamansa azad etməli, oradan çəkilməliyik. Reallığı anlamaq gərəkdir. Dağlıq Qarabağın statusu və gələcəyi ilə bağlı danışıqlar qaçılmazdır. Ona görə referendum keçiriləndə, statsusla bağlı qərar qəbul olunanda və dünya birliyi də qarabağlı ermənilərin dövlət müstəqilliyini tanımaq üçün konkret addımlar atmağa başlayanda deməliyik ki, hüququmuz olmayan torpaqları istəmirik. İndi əlimizdə, nəzarətimizdə olan o torpaqlara heç bir hüququmuz yoxdur".
Hazırda Ermənistanda Ermine Nağdalyan barədə aparılan kampaniya onun apreldə söylədiyi fikirlərlə bağlı qisasçılıq xarakteri daşıya bilərmi? Ya vitse-spiker həqiqətən terrorla bağlıdır?
Azərbaycan Sosialist Partiyasının sədri Elşən Həsənov qəzetimizə açıqlamasında bildirdi ki, çox təcrübəli siyasətçi, ən başlıcası isə, Ermənistan prezidenti Serj Sarkisyana həddən ziyadə sədaqətli olan Nağdalyanın həmin vaxt verdiyi açıqlama təsadüf sayıla bilməzdi: "Onun etirafı Dağlıq Qarabağdakı "dördgünlük müharibə"dən sonra Ermənistan rəhbərliyinin məntiqində və mövqeyində dəyişikliklərin qismən nümayiş olunması anlamına gəlirdi.
E.Nağdalyanın bəyanatı həm də Dağlıq Qarabağ münaqişəsinin nizamlanması prosesində həll variantı qismində rəsmi İrəvanın "Madrid prinsipləri"nin gerçəkləşməsinə çalışdığını göstərirdi. Həmin bəyanata həm ölkə daxilindən, həm də xaricdən verilən reaksiyalar xanım siyasətçini bir qədər yavaşımağa vadar etdi. Yəni düşünmürəm ki, vitse-spiker həmin vaxt Sarkisyanın əleyhinə nəsə danışmaq istəyib. Hazırda aparılan kampaniya eyni zamanda Sarkisyanı hörmətdən salmağa yönələ bilər. Bilirsiniz ki, istənilən kampaniyanın arxasında maraqlar dayanır. Mən Ermənistan siyasətçisinin terroristlərlə əlaqəli olmasına təəccüblənmirəm. Çünki terror onların dövlətinin başlıca silahıdır. İstənilən halda, daxildə hansı məqsədlə istifadə olunmasından asılı olmayaraq, Ermənistan rəsmiləri barədə açıqlanan faktlar bizim üçün məqbul sayılır. Bununla erməni mənbələrinin özü sübut edir ki, onların dövlətini idarə edənlərin böyük əksəriyyəti terroristdir".
Məhəmmədəli QƏRİBLİ