"Rəsmi Ankara aparıcı dövlətlərin maraqlarını nəzərə almaqla çevik manevrlər etməlidir"
Nəhayət ki, türk ordusu sərhədi adlayaraq Suriya ərazisinə girdi. Amma əvvəlki vaxtlardan fərqli olaraq, nə Amerika etiraz etdi, nə də Rusiya - heç Bəşər Əsədin də səsi çıxmadı. Türk ordusu yarım günə xeyli kəndi və İŞİD-in istinadgahı, eləcə də PYD-nin iştahını çəkən Cerablus şəhərini azad edib Suriya müxalifətinə təhvil verdi.
Bu arada Türkiyə xüsusi təyinatlıları Suriyanın şimal hissəsində Azad Suriya Ordusuna (ASO) güclü dəstək verməyə başlayıb. Artıq strateji əhəmiyyətli Cerablus şəhəri terrorçulardan təmizlənəndən sonra digər yaşayış məntəqələrinin azad olunması hədəflənir. Ankara prosesin bütövlükdə bölgə İŞİD və PYD-dən tam təmizlənənə qədər davam edəcəyi haqqında informasiyalar yayır. Növbəti hədəf strateji əhəmiyyətli Menbic şəhəridir. Maraqlıdır ki, böyük dövlətlər Türkiyənin bu addımına elə də etiraz etməyib. Hətta Amerika, Fransa və Almaniya birmənalı şəkildə Ankaranın yanında olduqlarını bəyan edib.
ABŞ Dövlət Departamentinin sözçüsü Mark Toner Türkiyənin Suriyada hərbi əməliyyatlara başlamasına münasibət bildirib. Toner təzyiqin yüksəlməməsi üçün çalışdıqlarını deyib: "Türkiyə YPG və İŞİD-i toplarla atəşə tutub. Bu barədə türk rəsmilər və Suriya Demokratik Qüvvələrinin rəhbər heyəti ilə əlaqə saxlayırıq. Hər iki tərəfə burada əsl düşmənin İŞİD olduğunu xatırlatmağa çalışırıq".
Bu arada ABŞ Dövlət Departament təmsilçisi Rubin bildirib ki, Türkiyənin Suriyada fəaliyyətini genişləndirməsi səbəbindən, İŞİD Türkiyədə fəaliyyətini artıra bilər. Maraqlıdır, ekspertlər bunu necə dəyərləndirir? Məsələyə münasibət bildirən VİP-in sədr müavini Ramil Hüseynovun sözlərinə görə, ABŞ Türkiyənin Suriyada fəaliyyətinin bəlli bir çərçivədə olmasını istəyir: "Onlar Türkiyənin Suriyada fəaliyyətini daha böyük miqyasda genişləndirməsini istəmir. Ona görə də, dolayı da olsa, İŞİD faktorunu qabardırlar. ABŞ-ın mövqeyi ondan ibarətdir ki, PYD və YPG qüvvələri Fərad çayının şərq sahilinə çəkilməlidir. Ancaq həmin qüvvələr bununla razılaşmaq istəmir. PKK-nın Suriya qolu adlanan PYD isə açıq-aşkar Ankaranı təhdid etməkdədir. Bunlara rəğmən, Türkiyənin Suriya ərazisinə hərbi qüvvə göndərməsinin mümkün nəticələri barədə birmənalı proqnoz vermək çətindir. Çünki burada fəaliyyət göstərən xarici güclər Ankaranı da oda atmaqda maraqlıdır. Bu məqsədlə müxtəlif təxribatlar törədilə bilər. İŞİD adı ilə Türkiyədə müəyyən terror aktlarının törədilməsi risqi var. Hər halda nəzərə almalıyıq ki, İŞİD-i bəsləyən dairələr var. Belə olmasaydı, iki il əvvəl bu terror təşkilatı İraq və Suriyanın böyük hissəsini nəzarət altına ala bilməzdi. Ona görə də bəzi qüvvələr bütövlükdə yaranmış situasiyanın mürəkkəbliyindən istifadə edərək Türkiyəni üzücü müharibəyə sürükləməyə çalışır. Təbii ki, bu ssenariləri istisna etmək olmaz. Ancaq yenə də Türkiyə bu addımı atmağa məcbur idi. Çünki Ankara üçün məsələ strateji-geosiyasi əhəmiyyət kəsb edir. Bütün hallarda, Türkiyə Suriyada aparıcı dövlətlərin maraqlarını nəzərə almaqla, çevik manevrlər etməlidir".
Vidadi ORDAHALLI