Ağa Seyidli: "Onlar bu məsələni dərindən araşdırdıqdan sonra nə dərəcədə böyük yanlışlığa yol verdiklərini anlayacaq"
Yunanıstanın Saloniki şəhərində Parlamentlərarası Pravoslav Assambleyasının (PPA) 23-cü illik toplantısının iştirakçıları tərəfindən qəbul olunan "Fundamental Qlobal Təhdidlər - Xristian Pravoslav Perspektivi" adlı qətnamənin sonuncu bəndinə - Azərbaycanın ərazi bütövlüyünü şübhə altına alan və aprel döyüşləri ilə bağlı tamamilə yanlış məlumatı özündə əks etdirən müddəa yer alıb.
Azərbaycandakı dini icmaların rəhbərləri Parlamentlərarası Pravoslav Assambleyasına etiraz məktubu ünvanlayıb. Azərbaycanda fəaliyyət göstərən qeyri-islam dini icmalarının rəhbərlərinin imzaladığı müraciətdə deyilir ki, "Parlamentlərarası Pravoslav Assambleyasının hörmətli üzvləri, Parlamentlərarası Pravoslav Assambleyasının bu ilin 4-8 iyul tarixlərində Yunanıstanın Soloniki şəhərində keçirilən 23-cü illik toplantısında qəbul olunan "Fundamental Qlobal Təhdidlər - Xristian Pravoslav Perspektivi" adlı qətnamə müasir dünyanın, xüsusilə də Avropanın taleyi üçün əhəmiyyətli və həssas məsələlərə toxunsa da, təəssüf ki, qətnamədə Ermənistan-Azərbaycan münaqişəsi ilə bağlı müddəalar reallıqdan və obyektivlikdən uzaqdır.
Nəzərinizə çatdırırıq ki, Azərbaycanda tarix boyu müxtəlif dinlərin və millətlərin nümayəndələri bir ailə kimi dinc yanaşı yaşamışlar. Təsadüfi deyil ki, Azərbaycanda mövcud olan dini tolerantlıq və mədəniyyətlərarası dialoq mühiti, həmçinin bu istiqamətdə Azərbaycan hökumətinin həyata keçirdiyi ardıcıl siyasət bu gün bütün dünyada örnək olaraq qəbul edilməkdədir. Azərbaycanda dözümlülüyün və dialoqun qorunması istiqamətindəki siyasətin tərkib hissəsi olaraq, dini mənsubiyyətindən asılı olmayaraq, bütün dini icmalara dövlət tərəfindən xüsusi diqqət göstərilir. Təsadüfi deyil ki, təkcə bu il Azərbaycan Respublikasının Prezidenti cənab İlham Əliyev tərəfindən qeyri-müsəlman dini icmalara 800 min manat (516 000 dollar), o cümlədən Rus Pravoslav Kilsəsinin Bakı və Azərbaycan Yeparxiyasına 250 min manat (161 000 dollar) vəsait ayrılıb. Həmçinin maddi və mənəvi irsə olan ənənəvi hörmətin göstəricisi kimi müsəlman məscidlərinin, pravoslav, katolik, alban kilsələrinin, sinaqoqların inşası və təmir işlərinə dövlət tərəfindən qayğı ilə yanaşılır".
Dinşünas Ağa Seyidli də qəzetimizə açıqlamasında bildirdi ki, dini tədbirdə hansısa həqiqətlərin inkar olunması yolverilməzdir: "Biz analoji hallarla çox rastlaşmışıq. Ancaq din adamlarından belə çirkin oyunlarda istifadə olunması olduqca acı mənzərə yaradır. Dağlıq Qarabağ probleminə dini kontekstdən yanaşmaq olmaz. Ermənilər xristiandır deyə, onların din adı ilə müdafiə olunması və bunun fonunda Dağlıq Qarabağla bağlı həqiqətlərin təhrif edilməsi ədalətsizlik olar. İstənilən səmavi din isə ədalətsizliyi rədd edir. Bunun başqa bir adı da yalandır. Bilirsiniz ki, yalanın özünə də heç bir dində yer yoxdur. Azərbaycan milli və dini zəmində münaqişələrin artdığı bir dövrdə əsrlər boyu tolerantlığı ilə nümunə olan ölkədir. Ermənistanın Azərbaycana qarşı təcavüzkar və etnik təmizləmə siyasəti nəticəsində Azərbaycan ərazisinin 20 faizi işğal olunub, 1 milyondan artıq azərbaycanlı öz doğma yurdlarından qaçqın və köçkün düşüb. Hərbi təcavüz nəticəsində təxminən minə yaxın tarixi-dini abidə erməni işğalı altında qalıb. Onların böyük əksəriyyəti məhv edilib. Ancaq Bakının mərkəzində olan erməni kilsəsi dövlət tərəfindən təmir olunaraq saxlanır. Hesab edirəm ki, Dağlıq Qarabağ barəsində düzgün olmayan, təxribat xarakterli müddəanın əlavə edilməsini Parlamentlərarası Pravoslav Assambleyasının xristianlıq və demokratiya prinsipləri və dəyərləri üzərində qurulan hədəflərinə ziddir. Yəqin ki, onlar bu məsələni dərindən araşdırdıqdan sonra nə dərəcədə böyük yanlışlığa yol verdiklərini anlayacaq".
Məhəmmədəli QƏRİBLİ