Elşad Həsənov: “Bəlkə də Putin ora gedərdi, sadəcə Zelenskidən dəvət gəldiyi üçün bunu özünə sığışdıra bilmir”
Fransanın Evian şəhərində keçirilən G7 ("Böyük Yeddilik") samitində Ukrayna prezidenti Volodimir Zelenski Rusiya prezidenti Vladimir Putini görüşə dəvət edib. Daha sonra Zelenski deyib ki, Putin onun bu dəvətindən də imtina edib.
Kremlin rəsmi nümayəndəsi Dmitri Peskov Ukrayna lideri Zelenskinin tədbir çərçivəsində Putinlə görüşmək təklifi irəli sürməsi barədə yayılan məlumatlara bu cür münasibət bildirib: “Rusiya prezidenti Vladimir Putin G7 ("Böyük Yeddilik") sammitinə dəvət almayıb”.
Peskov Rusiya liderinin rəsmi kanallar vasitəsilə hər hansı bir dəvət alıb-almaması ilə bağlı suala qəti şəkildə “Əlbəttə ki, xeyr” cavabını verib. Peskovun açıqlamasından belə çıxır ki, dəvət gəlməyib, amma belə çıxır Putin ora getmək istəyir.
Maraqlıdır, Putin niyə bu şansı buraxır? Axı "Böyük Yeddilik" sammitinə dəvət olunmağın özü bir üstünlükdür. Çünki Rusiya 2014-cü ildə Krımı ilhaq edəndən sonra oradan qovulub. Növbəti dəfə ora qayıtmaq bir prestijdir. İkincisi, orada ən azından Trampla ikilikdə görüşmək şansı var. Üçüncüsü, Zelenski ilə orada görüşüb bütün dünyaya bəyan edə bilər ki, o, Ukrayna prezidentinin qabağından geri çəkilmir və üzbəüz görüşməkdən qorxmur. Ancaq Putin bütün bu üstünlükləri görə-görə imtina edir. Niyə?
Sözügedən məsələni baki-xeber.com-a şərh edən siyasi ekspert Elşad Həsənovun fikrincə, “Böyük Yeddilik” sammitində Ukrayna prezidenti Zelenskinin iştirakı və bir sıra aparıcı dövlət başçıları ilə görüşməsi ABŞ-ın son dövrlər bu ölkəyə dəstəyinin azalmasının qarşısını aldı: “Çünki indiyə qədər ABŞ İranla müharibə aparırdı və bu da Ukraynanı arxa plana atırdı. Düzdür, Tramp prezident olandan sonra ABŞ öz hesabına Ukraynaya yardım etmir. Ukrayna üçün silahı Avropanın bir neçə dövləti öz vəsaitləri hesabına ABŞ-dan alır. Ancaq İranla müharibə istər-istəməz Ukraynanın silah təchizatına mənfi təsir göstərirdi. Bu dəfəki G7 görüşündə iştirakçı ölkələr Trampı Ukraynaya dəstək verməyə çağırdılar. Tramp da Ukraynaya dəstək olacağını və yaxın zamanlarda müharibəni bitirəcəyini bildirdi. G7-yə rəsmi olaraq Putin dəvət almayıb, ancaq Zelenski onu ora dəvət edib ki, sülhlə bağlı müzakirə aparsınlar. Ancaq məsələ ondadır ki, Putin Avropada yox, Moskvada Zelenski ilə danışıq aparmaq istəyir. Aydın məsələdir ki, Zelenski Moskvaya getməyəcək və o, Putinlə Ərəb ölkələrində, Türkiyədə görüşməyə hazırdır. Fikrimcə, rəsmi dəvət olsaydı, bəlkə də Putin ora gedərdi. Sadəcə Zelenskidən dəvət gəldiyi üçün bunu özünə sığışdıra bilmir, ar bilir. Belə baxanda son vaxtlar Rusiyanın vəziyyəti yaxşı deyil. Bu ölkənin Avropada yerləşən bütün neft emalı zavodları od tutub yanır. Əhaliyə yanacaq talonla verilir. Faktiki olaraq Rusiya iqtisadiyyatı çökmək üzrədir. Ölkə beynəlxalq miqyasda təcrid edilib və bütün bunların dayandırılması müharibəyə son qoymaqdan keçir. Başqa bir tərəfdən Putin həm də müharibəni dayandırmaqdan qorxur. Çünki müharibə dayansa Rusiyada çoxsaylı sosial problemlər ortaya çıxacaq və buna görə Putin cavab verməli olacaq. Bu da onun sonunu gətirəcək. Gör vəziyyət hara gəlib çatıb ki, Qərb Ukraynaya öz balestik raketlərini yaratmağa kömək edir. Güclü qorunan Moskva belə, hücumlara məruz qalır”.
Vidadi ORDAHALLI
