Məlum olduğu kimi, Ermənistanın Dilican şəhərində Azərbaycan prezidentinin köməkçisi Hikmət Hacıyev ilə Ermənistanın Təhlükəsizlik Şurasının katibi Armen Qriqoryan arasında işgüzar görüş keçirilib. Görüş zamanı tərəflər Azərbaycan-Ermənistan sülh gündəliyi ilə bağlı bir sıra məsələləri müzakirə ediblər. Regionda davamlı sülhün və sabitliyin təşviqinə yönəlmiş səylər çərçivəsində ikitərəfli dialoqun davam etdirilməsinin əhəmiyyəti vurğulanıb. Tərəflər, həmçinin iki ölkənin vətəndaş cəmiyyətləri arasında etimad quruculuğu tədbirləri barədə fikir mübadiləsi aparıblar. Hikmət Hacıyev və Armen Qriqoryan işçi səviyyəsində təmasların davam etdirilməsi barədə qərar qəbul edib, növbəti görüşün Azərbaycanda keçiriləcəyini təsdiqləyiblər.
Bütün bunlar Ermənistanda bəzi dairələrdə, xüsusən müxalifət çərçivəsində ciddi narahatlıq yaradıb. Məsələn, “Hayastan” blokunun üzvü İşxan Saqatelyan qeyd edir ki, seçkilərdən sonra, nəticələrin rəsmi dərc olunmasından əvvəl belə, Ermənistana gələn ilk rəsmi şəxs Dilicanda Təhlükəsizlik Şurasının katibi Armen Qriqoryanla görüşən prezident İlham Əliyevin köməkçisi Hikmət Hacıyev olub. Saqatelyan qeyd edib ki, Paşinyan hazırda nümayişkaranə şəkildə Tavuşda velosiped sürərkən, pərdəarxası məsələlərdə Bakı ilə dəqiq nəyin müzakirə edildiyi və razılaşdırıldığı ilə bağlı suallar həll olunur. Saqatelyanın sözlərinə görə, baş nazirin müxalifət milli qüvvələrini həbs etmək, mülkiyyətindən məhrum etmək və məhv etmək barədə təhdidləri onun Azərbaycan prezidenti qarşısındakı öhdəliklərinin birbaşa yerinə yetirilməsidir və Paşinyan, ehtimal ki, sadəcə olaraq, siyasi meydanı təmizləmək üçün əlavə vaxt istəyib. İşxan Saqatelyan vurğulayıb: "Qulaq as, Paşinyan, ölkənin bir nömrəli prioriteti müxalifət xadimlərinin həbsi deyil, təhlükəsizlik məsələləri və sizin yaratdığınız iqtisadi çöküş, eləcə də saxtakar seçkilərinizdir". O, baş naziri ictimaiyyətə yeni əraziləri təhvil verməyə, konstitusiyanı dəyişdirmək üçün qanunsuz addımlar atmağa və anklavları nə vaxt təhvil verməyi planlaşdırdığı barədə açıqlama verməyə çağırıb. Saqatelyan əlavə edib ki, hökumət qanunsuz həbslərdən istifadə etməklə süni gündəm yaratmağa və ictimaiyyətin diqqətini fundamental çətinliklərdən yayındırmağa çalışır.
Ermənistan Respublika Partiyasının üzvü Tiqran Abrahamyanın sözlərinə görə, Təhlükəsizlik Şurasının katibi ilə Əliyevin köməkçisi arasında Dilicanda keçirilən “xoşbəxt görüş” siyasi baxımdan başqa bir nüansı göstərir. O hesab edir ki, Paşinyan əvvəlki kimi Azərbaycanın tələblərini yerinə yetriməkdə davam edəcək.
Tahir TAĞIYEV
