2022-ci ildən bəri davam edən və hər iki tərəfdən milyonlarla əsgərin ölümünə səbəb olan Ukrayna müharibəsində nüvə silahından istifadə ehtimalı ən yüksək səviyyədə ifadə olunmağa başlayıb.
Rusiya Xarici və Müdafiə Siyasəti Şurasının rəhbəri professor Sergey Karaqanov Avropaya, xüsusən də Almaniyaya qarşı tarixi nüvə təhdidləri səsləndirib.
Bu açıqlama Qərb mənbələrinin Ukraynanın təxminən 600 minə yaxın, Ukrayna Baş Qərargahının isə Rusiyanın 1 milyon 381 mindən çox əsgər itirdiyini iddia etdiyi bir vaxta təsadüf edir. ABŞ və AB ölkələri tərəfindən Kiyev hökumətinə hava hücumundan müdafiə sistemləri, dronlar, sursat və uzaqmənzilli silahların davamlı tədarükü Rusiya tərəfində nüvə çəkindirmə qabiliyyətinin hüdudlarını aşan ritorikaya çevrilib.
Rusiyanın ən nüfuzlu strateqlərindən biri hesab edilən Karaqanov, mümkün nüvə hücumu zamanı ABŞ-ın öz şəhərlərini Avropa üçün qurban verməyəcəyini bildirib: "ABŞ-ın Rusiyaya hücum etməsi ağlasığmazdır. Bu, 1950-ci illərin ortalarından bəri belədir. Məhdud bir nüvə hücumu zamanı ABŞ cavab verməyəcək".
Karaqanov, Avropa elitasının səviyyəsinin getdikcə aşağı düşdüyünü iddia edib: "Avropa bəşər tarixindəki bütün pisliklərin mənbəyidir və qanlı köklərinə qayıtmaqdadırlar. Avropalılar cəhənnəm qorxusunu itiriblər. Bizim bu cəhənnəm qorxusunu onlara xatırlatmağımız və bu qorxunu geri qaytarmalıyıq".
Nüvə silahlarından istifadə təhlükəsinin masada qalmalı olduğunu vurğulayan Karaqanov deyib ki, nüvə silahlarından istifadə etməməliyik, amma onlardan istifadə etməklə hədələməli və buna hazır olmalıyıq: “Əks təqdirdə, dünyanın sonsuz müharibələrə və qaçılmaz olaraq qlobal termonüvə müharibəsinə sürüklənmə riski alırıq".
Almaniyanın nüvə silahı əldə etmə ehtimalını da dəyərləndirən Karaqanov, tarixi travmalara diqqət çəkib: "Almaniya, Yaponiya ilə birlikdə, bəşəriyyət tarixindəki ən pis təhdiddir. Onlara heç vaxt nüvə silahından istifadə etməyə icazə verilməməlidir. Əgər buna cəhd etsələr belə, yer üzündən tamamilə silinməlidirlər".
Karaqanov potensial eskalasiyada raketlərin trayektoriyasını da açıqlayıb: "Əgər adi və ya nüvə raketlərindən istifadə etməyə məcbur olsaq, əsas hədəf yalnız Rumıniya və ya Polşa olmayacaq. Hədəf Almaniya olacaq. Onlar bir nəsildə iki dünya müharibəsinə başladılar və buna görə heç vaxt bağışlanmamalıdırlar".
Karaqanovun bu sərt açıqlamaları qlobal nüvə arxitekturasının dağıldığı bir vaxta təsadüf edir.
Onun açıqlamasını şərh edən ekspertlərin fikrincə, Moskva administrasiyası, İkinci Dünya Müharibəsinin tarixi yaddaşını bu gün Avropanın yenidən silahlanmasının qarşısını almaq üçün legitimlik əsası kimi istifadə edir və Almaniyanın artan hərbi rolunu birbaşa müharibə səbəbi kimi görür. Digər tərəfdən, rus strateqin bu açıqlamaları Avropanın öz müdafiə qabiliyyətini artırmaq səylərinə qarşı Rusiyanın qabaqlayıcı nüvə zərbəsini qanuni hesab etdiyinin ən açıq ifadəsi kimi dəyərləndirilir.
Tahir TAĞIYEV
