İbrahim Rüstəmli: “O, reallığı görüb qiymətləndirə bilsəydi, bu cür əsassız və məsuliyyətsiz bəyanat verməzdi”
Ermənistanın bəzi rəsmi dairələri Azərbaycana qarşı müəyyən kampaniyalar aparırlar. Azərbaycana qarşı ərazi iddialarından əl çəkmək istəməyən belə qüvvələr ölkəmiz haqda yanlış rəy yaradırlar.
Ermənistan Baş Qərargah rəisi Edvard Asryan jurnalistlərlə söhbətində iddia edib ki, guya Azərbaycan qoşunları Sünikdə (Qərbi Zəngəzur) meşələri qırır və onların təbiət qoruğunda postları var.
O qeyd edib ki, baş nazir, departament rəhbəri və şəxsən özü dəfələrlə bu məsələni delimitasiya yolu ilə həll etmək üçün çalışdıqlarını bildiriblər.
O, Azərbaycan qoşunlarının Ermənistan ərazisində Nerkin Xand kəndi və Zəngəzur Təbiət Qoruğu yaxınlığında yerləşdiyini iddia edin. Asryan iddia edib ki, Azərbaycan tərəfi guya təbiət qoruğunda ağacları kəsir, eyni zamanda mövqelərini müəyyən edir və infrastruktur qurur, Ermənistan tərəfi isə sadəcə bu hərəkətləri sənədləşdirir və "müvafiq siyasi kanallar vasitəsilə" məlumat verir.
“Əgər bu anklavlar Ermənistan Respublikasının 29.743 kvadrat kilometrlik ərazisinin bir hissəsidirsə, bir millimetr də olsun torpaq təslim edilməyəcək”, - deyə Edvard Asryan sərhədlərin delimitasiyası və sərhəd yaşayış məntəqələrinin taleyi mövzusuna toxunaraq deyib. O, qeyd edib ki, sovet dövründə cənubdan şimala təxminən 18 yeri əhatə edən bu ərazilərdə tarixən həm ermənilər, həm də azərbaycanlılar məskunlaşıblar. Baş Qərargah rəisi əlavə edib ki, Baş Qərargah sərəncamında olan dəqiq xəritələrə əsaslanır.
Ermənistanın baş qərargah rəisi Azərbaycan ordusuna qarşı açıq qara piar aparır. Seçki sonrası, eyni zamanda bütövlükdə bu uydurma "təcavüz" məsələsini niyə ortaya atırlar. Ermənistan tərəf niyə belə iddialardan əl çəkmək istəmir?
Hərbi ekspet İbrahim Rüstəmli baki-xeber.com-a bildirdi ki, Ermənistandakı bəzi rəsmilərin beynində hələ də revanşist meyllər qalıb.
"Bu sualın cavabı bu gündən gəlmir, onun cavabı illər uzunu Ermənistanda, ermənilərin təmsil olunduğu xarici ölkələrdə, erməni lobbilərində formalaşmış ideologiyadan gəlir. Yəni zaman-zaman Azərbaycan torpaqlarına qarşı edilən iddialar, Qarabağın Ermənistana məxsus olması ilə bağlı uydurma ideoloji təlimlər, ermənilərin bu bölgədə guya minillər boyu yaşaması, dünyanın ən qədim xalqı olması və sair kimi məsələlərin hamısı bir qrup erməninin beynini elə yuyub ki, reallıqla heç cürə barışmaq istəmirlər. Ermənistanın baş qərargah rəisi də reallığı görməkdən uzaqdır. O, reallığı görüb qiymətləndirə bilsəydi, bu cür əsassız və məsuliyyətsiz bəyanat verməzdi. Bu kimi yersiz açıqlamaların, fikirlərin arxasında dayanan məqsəd var. Bunun arxasında nə dayanır? Serj Sarkisyan, Köçəryan kimi mənəviyyatsız, canilərin adamları dayanır. Paşinyan baş nazir olsa da hələ də bölgələrdə, yerlərdə o ideoloji kursun davamçıları var. Baxmayaraq ki, bir dövlət başçısı olaraq Paşinyanın mövqeyi Azərbaycan üçün də, ermənilər üçün də aydındır. Paşinyan bunu çəkinmədən bəyan edir. Çəkinmədən deyir ki, mən Qarabağ səhifəsini bağladım. Ancaq bu demək deyil ki, Ermənistanda Qarabağla bağlı iddia irəli sürən, çürük "Arsax" ideologiyasına köklənmiş adamlar yoxdur. Yəni hələ Ermənistan cəmiyyətində də, Ermənistan cəmiyyətindən kənarda da bu ideologiya ilə nəfəs alan, yaşayan adamlar var. O adamların əsas məqsədi yenidən iki xalq arasında münaqişə yaratmaqdır. Eyni zamanda Ermənistanla Azərbaycan arasında yaratmaq istədikləri münaqişə ilə Cənubi Qafqazı qan gölündə boğmaqdır. Yəni bu ideologiya ölməyib. Ona görə Prezident İlham Əliyev dəfələrlə vurğulayıb ki, biz bütün hallarda döyüşə hazır olmalıyıq, bütün hallarda ayaqda dayanmalıyıq, gözümüzü qırpmamalı, ətrafa dörd gözlə baxmalıyıq. Bunu cənab Prezident təsadüfən demir ki. Bu gün Ermənistanda indiyə qədər görünməmiş demokratik bir ab-hava var. Bunun içində də fərqli baxışlar var. O ünsürlər hələ qalıb. Biz onu hiss edirik. "Arsax" iddiası ilə yaşayan, Azərbaycana qarşı torpaq iddiası irəli sürməyə çalışan, Azərbaycanla daim münaqişə şəraitində yaşamaq istəyən şovinistləri, revanşistlər var. Revanşist qüvvələrin olmasının nəticəsidir ki, hələ də bizə qarşı bu cür əsassız bəyanatlar səsləndirilənlər olur. Halbuki Azərbaycanla Ermənistan arasında münasibət heç vaxt bu qədər şəffaf, sülh yönümlü olmayıb".
İ. Rüstəmli qeyd etdi ki, düzdür, ermənilərə etibar etmək olmaz, amma bu gün Azərbaycanla Ermənistan arasında münaqişəsiz bir münasibət var. "Bunu hakimiyyətlər arası münasibətlər baxımından deyirəm. Amma yenə də heç vaxt unutmaq olmaz ki, ermənilərin içində o virus yaşayır. İlham Əliyevin qüdrəti bir tərəfdən qələbə qazanmaq idisə, bu gün prezidentin ikinci böyük uğuru o qələbəni qorunmasıdır. İlham Əliyev düşməni dosta çevirən insandır, böyük dövlət başçısıdır, liderdir. Bunların arxasında Azərbaycan dövlətinin, Azərbaycan xalqının iradəsi, ordumuzun gücü dayanır"-deyə İ.Rüdtəmli qeyd etdi.
İradə SARIYEVA
