Bəhruz Quliyev: “Hər iki şəxslə bağlı araşdırmaların daha fəal mərhələyə keçəcəyi ehtimalı yüksəkdir”
“Üçbaşlı müharibə partiyası” darmadağın edildi. Bu barədə Ermənistan Baş naziri Nikol Paşinyan bildirib.
O, ilkin nəticələrə görə, parlamentə düşən “Güclü Ermənistan” bloku, “Ermənistan” bloku və “Çiçəklənən Ermənistan” Partiyasını nəzərdə tutaraq, onların məğlub edildiyini qeyd edib. Paşinyanın sözlərinə görə, bu vacib olsa da, lakin son nəticə deyil: “Xalq Ermənistan Respublikasında üçbaşlı müharibə partiyasının və onu müşayiət edən cinayətkar oliqarxik sistemin aradan qaldırılması iradəsini açıq şəkildə ifadə edib. Əlbəttə ki, bu, siyasi əksəriyyətin və hökumətin ən vacib vəzifələrindən biri olacaq və biz bunu təxirə salmadan və çox qətiyyətli və aydın addımlarla həyata keçirməliyik”.
Maraqlı olan odur ki, Samvel Karapetyan və Robert Köçəryana qarşı açılan cinayət işləri bundan sonra davam etdiriləcəkmi? Məsələ ondadır ki, 1 mart 2008-ci ildə Köçəryan prezident olarkən etirazçılara divan tutub və nəticədə 11 nəfər öldürülüb. Bir vaxtlar Karapetyanın sahibi olduğu “Ermənistan Elektrik Şəbəkələri” şirkətində bir sıra pozuntular aşkar edilib. Sətiraltı bunlaramı işarə edir Paşinyan?
Sözügedən məsələni baki-xeber.com-a şərh edən “SƏS” qəzetinin baş redaktoru, politoloq Bəhruz Quliyev prinsipcə, bütün bunları istisna etmədi: “Nikol Paşinyanın seçkilərdən sonra səsləndirdiyi “üçbaşlı müharibə partiyası darmadağın edildi” ifadəsi sadəcə emosional siyasi bəyanat deyil. Bu, həm də Ermənistanın daxili siyasi gündəliyinin yaxın dövr üçün əsas istiqamətlərini müəyyənləşdirən mesaj kimi qiymətləndirilməlidir. Paşinyan bununla uzun illər Ermənistan siyasətində təsir imkanlarına malik olmuş köhnə siyasi elitanın, oliqarxik qrupların və revanşist dairələrin cəmiyyət tərəfindən rədd edildiyini nümayiş etdirməyə çalışır. Bu kontekstdə Robert Köçəryan və Samvel Karapetyanla bağlı cinayət işlərinin gələcək taleyi xüsusi diqqət çəkir. Paşinyanın çıxışında konkret adlar çəkilməsə də, onun “cinayətkar oliqarxik sistemin aradan qaldırılması” barədə dedikləri məhz keçmiş hakimiyyət nümayəndələrinə və onlarla əlaqələndirilən iqtisadi-siyasi qruplara ünvanlanmış mesaj kimi görünür. Robert Köçəryanla bağlı 1 mart 2008-ci il hadisələri Ermənistan cəmiyyətində hələ də tam bağlanmamış siyasi və hüquqi məsələ olaraq qalır. Həmin hadisələr zamanı etiraz aksiyalarının dağıdılması nəticəsində insanların həlak olması uzun illərdir müzakirə olunur və Paşinyan hakimiyyəti bu məsələni keçmiş rejimin məsuliyyəti kimi təqdim edir. Eyni zamanda, Samvel Karapetyan ətrafında aparılan araşdırmalar da dövlətin iqtisadi sahədə oliqarxik təsir mexanizmlərini zəiflətmək cəhdlərinin tərkib hissəsi kimi qiymətləndirilə bilər”.
B. Quliyevin fikrincə, seçkilərdə əldə olunan nəticələr Paşinyana həm siyasi, həm də mənəvi baxımdan əlavə legitimlik verib: “Bu səbəbdən Köçəryan və Karapetyanla bağlı proseslərin dayanacağı deyil, əksinə daha fəal mərhələyə keçəcəyi ehtimalı yüksəkdir. Bununla yanaşı, Paşinyan bu məsələləri yalnız hüquqi müstəvidə deyil, həm də siyasi rəqiblərinin təsir imkanlarını məhdudlaşdırmaq vasitəsi kimi istifadə etməyə çalışacaq. Əslində, Ermənistanda yeni mərhələnin əsas mübarizəsi artıq seçkilərdə deyil, dövlət institutları daxilində köhnə sistemlə yeni hakimiyyət arasında gedəcək. Paşinyanın bəyanatları göstərir ki, o, seçki qələbəsini revanşist qüvvələrə və keçmiş hakimiyyət elitasına qarşı mübarizənin başa çatması kimi deyil, növbəti mərhələsinin başlanğıcı kimi qiymətləndirir. Onu da qeyd edək ki, bu proseslərin regiona təsiri də olacaq. Çünki Ermənistanda revanşist qüvvələrin zəifləməsi Azərbaycan və Türkiyə ilə münasibətlərin normallaşması istiqamətində daha praqmatik siyasətin davam etdirilməsi ehtimalını artırır. Ona görə də Paşinyanın bu çıxışını yalnız daxili siyasi polemika kimi deyil, həm də Ermənistanın gələcək siyasi kursuna dair mühüm siqnal kimi dəyərləndirmək lazımdır”.
Vidadi ORDAHALLI
