Ramil Məmmədli: “Lukaşenkonun jesti tərəflər arasında münasibətlərin istiləşməsi anlamına gəlmir”
Belarus Prezidenti Aleksandr Lukaşenko Ali Avrasiya İqtisadi Şurasının genişləndirilmiş iclasında Ermənistanın Baş naziri Nikol Paşinyana Yeni il təbriklərinə görə təşəkkür edib.
Lukaşenko iclasda "Təbrikləriniz və konstruktiv çıxışınız üçün təşəkkür edirəm, Nikol Vovayeviç", - deyə bildirib.
Məlumat üçün qeyd edək ki, iclasdakı çıxışının sonunda Nikol Paşinyan iştirakçıları qarşıdan gələn Yeni il münasibətilə təbrik edib.
Lukaşenko ilə Paşinyan arasında belə mehribançılıq diqqət çəkir. Ona görə ki, tərəflər arasında münasibətlər çox gərgin idi. Məsələ ondadır ki, 2024-cü ilin dekabrında Lukaşenko ilə Paşinyan arasında Aİİ sammitində Ermənistan nümayəndə heyətinin növbəti görüşdə iştirak formatı ilə bağlı mübahisə olub. Mübahisə Paşinyanın Ermənistan nümayəndə heyətinin Ali Avrasiya İqtisadi Şurasının 2025-ci ilin mayında Minskdə keçiriləcək növbəti iclasında distant formatda iştirak edəcəyini bildirməsindən sonra başlayıb. “Burada nə problem var? Məgər Minsk bu qədər uzaqdır? Sizi gətirəcək kimsə yoxdur?! Ehtiyac olsa, sizin nümayəndə heyətinizi biz gətirərik”, - Lukaşenko bildirib.
Belarus-Ermənistan münasibətləri Aleksandr Lukaşenkonun Bakı və İrəvan arasında Qarabağla bağlı münaqişə ilə bağlı verdiyi bəyanatdan sonra pisləşib. Belarus prezidenti Qarabağdakı əməliyyatı azadlıq müharibəsi adlandırıb. Daha sonra Paşinyan bəyan edib ki, Lukaşenko Belarusa rəhbərlik etdiyi müddətdə bu ölkəyə səfər etməyəcək.
“Ermənistan de-fakto KTMT-dən uzaqlaşmaq yolu tutub”
Sözügedən məsələni “Bakı-Xəbər”ə şərh edən hərbi ekspert Ramil Məmmədli hesab edir ki, Lukaşenkonun Paşinyana təşəkkür etməsi əslində formal xarakterlidir: “Deməzdim ki, bu, tərəflər arasında xüsusi yaxınlaşmanın göstəricisidir. Sadəcə, Lukaşenko etik çərçivədən çıxış edərək ona təşəkkür edib. Lukaşenko fərqindədir ki, Ermənistan Paşinyanın timsalında KTMT və Aİİ-dən uzaqlaşmaq kursunu götürüb. Düzdür, bu, əsasən KTMT-yə münasibətdə özünü göstərir. Paşinyan davamlı olaraq KTMT tədbirlərini boykot edir, birgə təlimlərə qatılmır, qurumun tədbirlərinin Ermənistanda keçirilməsini boykot edir. KTMT nizamnaməsində üzv ölkənin fəaliyyətini dondurması öz əksini tapmasa da, Ermənistan praktiki olaraq bunu edir. Ermənistan de-fakto KTMT-dən uzaqlaşmaq yolu tutub. İstisna deyil ki, sonrakı mərhələdə Ermənistan Aİİ-yə də münasibətdə bənzər mövqedən çıxış edəcək. Nəzərə almaq lazımdır ki, Ermənistan Avropa İttifaqına inteqrasiya yolunu tutub və bunu açıq bəyan edir. Bütün bunlardan sonra düşünmürəm ki, Lukaşenko Paşinyanla isti münasibətlər qursun. Çünki Lukaşenko ilə Paşinyan arasında ilk ixtilaf 2018-ci ilə təsadüf edir. Yəni Paşinyanın yeni baş nazir olduğu vaxt bu baş verib. Məsələ ondadır ki, həmin il Paşinyan KTMT baş katibi Yuri Xaçaturovu həbs etdirmişdi. Buna Lukaşenko sərt etiraz etmişdi. Ondan sonra da tərəflər arasında bir sıra fikir ayrılıqları olub. Ona görə də hesab edirəm ki, Lukaşenkonun jesti tərəflər arasında münasibətlərin istiləşməsi anlamına gəlmir”.
Vidadi ORDAHALLI
