Əli Mustafa: “Fidan bu açıqlaması ilə erməni tərəfinin hiyləgər siyasi gedişlərini önlədi”
Türkiyənin Xarici işlər naziri Hakan Fidan bəyan edib ki, Ankara Ermənistanla diplomatik əlaqələri yalnız Azərbaycanla yekun sülh müqaviləsi imzalanandan sonra normallaşdırmağa hazırdır:
“Əgər bu mərhələdə Türkiyə- Ermənistan münasibətləri normallaşarsa, bu, Ermənistan üçün Azərbaycanla sülh müqaviləsi imzalamaq üçün əsasları azaldacaq və nəticədə bölgədə “donmuş münaqişə” risqi yarana bilər. Biz bunu istəmirik. Vaşinqtondakı danışıqlarda iki məsələ müzakirə olunmayıb: Zəngəzur dəhlizi və Ermənistanın konstitusiyası ilə bağlı bəzi məsələlər. Bu məsələlər həll olunub yekun sülh müqaviləsi imzalanandan sonra Türkiyə sərhədlərini Ermənistanla açacaq”.
Burada diqqət çəkən məqam odur ki, son bir neçə gündə erməni rəsmiləri dayanmadan Türkiyə ilə sərhədin açılacağına eyham vururdular. Elə rəy yaratmağa çalışırdılar ki, guya Türkiyə bu məsələdə Azərbaycanın mövqeyini nəzərə almayacaq. Fidan bu açıqlaması ilə bütün bunların üzərindən xətt çəkdi.
Sözügedən məsələ ilə bağlı fikirlərini “Bakı-Xəbər”lə bölüşən siyasi şərhçi Əli Mustafa hesab edir ki, xarici işlər naziri Hakan Fidanın qətiyyətli mövqe ortaya qoyması Ermənistan tərəfinin hiyləgər siyasi gedişlərini önləmiş oldu: “Məlum məsələdir ki, Türkiyə bir çox məsələlərdə, xüsusilə xarici siyasətdə Azərbaycanla paralel hərəkət edir. Ölkəmizin maraqlarını hər zaman nəzərə almağa çalışır. Yəni Türkiyə bizim maraqlarımıza, ölkəmiz də onların maraqlarına uyğun addım atır. Dolayısı ilə “Bir millət, iki dövlət” konsepsiyasına ən yüksək səviyyədə əməl edilir. O baxımdan da xarici işlər naziri Hakan Fidanın açıqlaması çox anlaşılandır. Yəni Türkiyə tərəfi rəsmi olaraq bildirir ki, bizim Ermənistanla münasibətlərimiz, Azərbaycan-Ermənistan münasibətlərinə sinxron olaraq inkişaf edir. Yəni Azərbaycanın Zəngəzur dəhlizi ilə bağlı mövqeyini nəzərə alacaqsa, o zaman Ermənistana hansısa güzəştlərdən söhbət gedə bilər. Ancaq istənilən halda Ermənistan Konstitusiyasından Azərbaycana qarşı ərazi iddiaları çıxarılmalıdır. Bu məsələlərdə Ermənistan Azərbaycanın haqlı tələblərinə əməl edəcəksə, o zaman sülh sazişi imzalanacaq. Həmçinin Türkiyə-Ermənistan münasibətləri normallaşacaq, sərhədlər açılacaq. Fidan bu açıqlaması ilə erməni tərəfinin hiyləgər siyasi gedişlərini önlədi. Türkiyə bununla dünyaya mesaj verdi ki, Azərbaycanla sülh olmadan bu məsələlər həll olunmayacaq”.
Vidadi ORDAHALLI
