Facebook istifadəçisi Sima Babayeva sosial şəbəkədə paylaşdığı yazı ilə yenidən köhnə yaraları qoparıb, mürgüləyən ictimai fikri silkələməyi bacarıb. Bu status altında yaranan müzakirələr, sanki illərin toplanmış narazılığının gur partlayışıdır.
Sima xanım yazır ki, jurnalist Əvəz Zeynallı keçmiş “Qaçqınkom” rəhbəri Əli Həsənov və onunla bağlı olan dairələr, o cümlədən Ramiz Mehdiyev ailəsi haqqında ciddi iddialar səsləndirib.
Əli Həsənov, təbii ki, bu iddiaları dərhal təkzib edib. Bildirib ki, həyat yoldaşı haqqında deyilənlər yalandır və guya onun heç bir şəkildə Mehdiyev ailəsi ilə münasibəti yoxdur. Amma Sima xanımın yazısında başqa bir məqam da qabardılır: illərlə dövlət strukturlarında yüksək vəzifələr daşımış Ramiz Həsənovun, yəni Əli Həsənovun qardaşının, elə Ramiz Mehdiyevin himayəsi ilə yüksəldiyi iddia olunur. Bu isə oxucuların hiddətini daha da artırır.
Məqalədə Ermənistandan Azərbaycana köçən, burada yaşayan və sonradan rəsmi sənədlərdə milliyyətini dəyişən insanlarla bağlı kontekst verilir. Bu, mövzunun sosial-tarixi tərəfidir, lakin əsas müzakirə yenə də Həsənovun fəaliyyəti ətrafında cəmlənir.
Ən çox haqsızlığa səbəb olan məqam isə budur: müəllifin sözlərinə görə, Əli Həsənovun 22 il rəhbərlik etdiyi “Qaçqınkom”da mənzillərin ədalət prinsiplərinə zidd şəkildə bölüşdürülməsi ilə bağlı iddialar heç vaxt tam araşdırılmayıb. Sözün düzü, bu, cəmiyyətdə uzun illərdən bəri dolaşan, lakin heç vaxt aydınlaşdırılmayan bir narazılıqdır. Elə buna görədir ki, Prezident İlham Əliyevin 2020-ci ildə köçkün mənzillərinin paylanması sahəsindəki nöqsanlar haqda dediyi sərt fikirlər həmin iddialara dolayısı ilə işıq salıb.
Məqalədə Həsənov ailəsinin sərvəti, həyatı və 2017-ci ildə nəvəsinin törətdiyi səs-küylü qəza hadisəsi də yada salınır. Müəllif açıq şəkildə bildirir ki, hüquq-mühafizə orqanları bu ailənin varidatı və mümkün qanunsuzluqları ilə bağlı araşdırma aparmalıdır. Bu, yalnız onun fikri deyil - sosial şəbəkədə yazılan yüzlərlə şərhdə də eyni tələb əks olunur.
Postun altındakı şərhlər isə xalqın içində illərlə yığılıb qalmış kədərin, qəzəbin, umu-küsünün partlayışımıdı.
Esmira Rəhimova yazır:
“Vaxtında da hamı bilirdi bunları, bu təzə xəbər deyil”.
Azər Rəşidoğlu daha sərt danışır:
“Belələri ermənidən də betərdir”.
Əli Bəy Azəri isə mövzunu daha da dərinləşdirir:
“Zəngilanın Məmmədbəyli kəndinə köç gedir. İcra nümayəndəsi kimlərin köçürüldüyündən xəbərsizdir. “Qaçqınkom” isə siyahını kənara atıb öz bildiyini edir. Deməli, hələ də idarəetmə Həsənovun adamlarının əlindədir”.
Qafar Çaxmaqlı illər əvvəl qələmə aldığı yazını yada salır. Əli Həsənovun Sumqayıtdakı bir çıxışından sitat gətirir:
“Mən fəxr edirəm ki, mənim ailəm çoxmillətlidir”.
Qafar deyir ki, bu fikir o vaxt sənədlərə də düşmüşdü.
Akif Paşayev isə həyatı boyu üzləşdiyi bir haqsızlığı dilə gətirir:
“Yataqxanada mənə düşən evi bunlar başqasına satıb. Mən hələ də evsizəm. Gedib “Qaçqınkom”a deyəndə isə cavab alıram ki, sən mövcud olmayan ünvanda qeydiyyatdasan!”
Səfa Qulusoy yaddaşları oyadan başqa bir epizodu xatırladır:
“Həsənov maaş 35 manat artırılanda televiziyada çıxıb deyirdi ki, bu böyük puldur!”
Elxan İbrahimoğlu daha fərqli iddia səsləndirir:
“Arvadı qarabağlı deyil, Qarabağa gəlmiş hay tayfasındandır”.
Hürü Hüseynova isə hisslərini gizlətmir:
“Bu adamın vicdandan xəbəri yoxdur!”
Şərhlərin ümumi tonunda bir mesaj var: insanlar illərdir eşitdikləri, yaşadıqları, amma haqqında danışmağa güc tapmadıqları haqsızlıqları indi açıq şəkildə dilə gətirirlər.
Asif Mərzilinin fərqli mövqeyi
Maraqlısı odur ki, “Təzadlar” qəzetinin baş redaktoru Asif Mərzili mövzunu tamam başqa yöndən dəyərləndirir və Əli Həsənovu “vətənpərvər” adlandırır:
“Kiminsə həyat yoldaşının hansı millətdən olması onun Vətənə münasibətini müəyyənləşdirə bilməz. Bu mövzu boş şeydir”.
Bu mövqe sosial şəbəkədə ciddi suallar doğurur. Elə buna görə də Asif bəyə sual ünvanlanır: “Siz nə üçün Əli Həsənovu vətənpərvər hesab edirsiniz?”
O isə belə cavab verir:
“Onunla şəxsi bağlılığım yoxdur. Arvadının milliyyəti onun Vətən sevgisini dəyişməz. Tarixdə çox nümunələr var: Tağıyevin, Rəsulzadənin, başqa ziyalıların həyat yoldaşları müxtəlif millətlərdən olub”.
Amma Asif bəy yenə də əsas suala cavab vermir: Həsənovu hansı keyfiyyətlərinə görə vətənpərvər adlandırır?
Bu suala aydınlıq gətirmədiyi üçün sosial şəbəkədə mövzu daha da qızışır.
Sima Babayevanın paylaşımı əslində bir statusdan daha böyük mətləblərə işıq saldı - illərlə yığılıb qalmış narazılıqların, qaranlıq qalan sualların, ictimai ədalət tələb edən səslərin gurultusuna çevrildi. Bu müzakirələr göstərir ki, cəmiyyət təkcə cavab deyil, həqiqət istəyir. Həqiqət isə hələ ortaya çıxmayıb.
Akif Nəsirli
