Bəhruz Quliyev: “Pakistan, 44 günlük Vətən müharibəsində Azərbaycanın haqq işinə açıq və qətiyyətli dəstək verən ilk ölkələrdən biri olmuşdu”
Zəfərin 5 illiyinə həsr olunmuş Bakı paradı təkcə Azərbaycanın hərbi gücünün nümayişi deyildi. Bu mərasim, həm də regionda dəyişən geosiyasi balansların, yeni müttəfiqlik münasibətlərinin və qardaş ölkələrin həmrəyliyinin simvoluna çevrildi. Prezident İlham Əliyevin “Bu gün bizimlə bu paradda ilk dəfə qardaş Pakistan ordusu da iştirak edir” sözləri bu mənada dərin siyasi və mənəvi məna daşıyırdı.
“Səs” qəzetinin baş redaktoru, siyasi ekspert Bəhruz Quliyevin fikrincə, Pakistan Silahlı Qüvvələrinin Bakıdakı Zəfər Paradında iştirakı sadəcə bir mərasim detalı deyil, dərin mənəvi, siyasi və geostrateji məna daşıyan hadisədir. Onun sözlərinə görə, mənəvi baxımdan bu addım Azərbaycan-Pakistan qardaşlığının sarsılmazlığını, iki xalqın ortaq dəyərlər və ədalət prinsipləri üzərində birləşdiyini nümayiş etdirir.
Pakistan, 44 günlük Vətən müharibəsi zamanı Azərbaycanın haqq işinə ilk açıq və qətiyyətli dəstək verən ölkələrdən biri olmuşdu. Bakıdakı paradda Pakistan əsgərlərinin iştirakı həmin həmrəyliyin simvolik davamı idi. Bu, “dostluq sözlə deyil, əməl ilə sübut olunur” mesajının canlı ifadəsi kimi tarixə düşdü.
Siyasi baxımdan Pakistanın paradda iştirakı Azərbaycanın beynəlxalq müstəvidə artan nüfuzunun və Cənubi Qafqazda formalaşan yeni güc balansında lider mövqeyinin təsdiqidir. Bu, həm də dünya ictimaiyyətinə açıq mesaj idi ki, Azərbaycan artıq regional proseslərdə tək deyil - onun yanında qardaş, etibarlı və nüfuzlu tərəfdaşlar var.
Qlobal arenada Bakı-İslamabad tandemi artıq yalnız diplomatik münasibətlərdən ibarət deyil. Bu tərəfdaşlıq, regional əməkdaşlığın yeni modeli kimi formalaşır və Türk dünyasının geosiyasi dayaqlarını daha da gücləndirir.
Pakistan ordusunun Bakıda iştirakı Cənubi Qafqaz-Cənubi Asiya xəttində yeni təhlükəsizlik və müdafiə platformasının formalaşmaqda olduğuna işarədir. Bu, Azərbaycanın regionda sabitliyin təminində təkbaşına deyil, beynəlxalq miqyasda dəstəklənən bir mövqedə dayandığını göstərir” - deyə cənab Quliyev vurğuladı.
Ekspertin fikrincə, Pakistanın iştirakı həm də Ermənistan və bölgədə destruktiv qüvvələr üçün açıq siqnaldır: Zəfər təkcə keçmişin deyil, gələcəyin də təminatıdır. Pakistanın nüvə silahına malik ölkə kimi bu mərasimdə təmsil olunması, Azərbaycanın arxasında dayanan güc balansını daha da möhkəmləndirdi.
Pakistanın paradda iştirakı, Azərbaycan-Türkiyə-Pakistan üçtərəfli əməkdaşlıq formatının artıq yalnız diplomatik səviyyədən çıxaraq praktik hərbi müstəviyə keçdiyini nümayiş etdirdi. Bu üçlük regionda sabitliyin, təhlükəsizliyin və qarşılıqlı etimadın yeni dayağı kimi çıxış edir.
Sözsüz ki, bu hadisə həm də gələcəkdə müdafiə sənayesi, hərbi texnologiyalar və ortaq təhlükəsizlik layihələri sahəsində əməkdaşlığın dərinləşməsi üçün platforma rolunu oynayacaq.
Bakı paradında Pakistan ordusunun iştirakı ümum İslam həmrəyliyinin də canlı təzahürü idi. Bu, təkcə regiona deyil, beynəlxalq ictimaiyyətə də ünvanlanmış mesaj idi:
- Azərbaycan təkcə regional güc deyil, həm də İslam dünyasının dəstəyinə malik dövlətdir;
- Qardaşlıq münasibətləri siyasi bəyanatlardan çıxaraq əməli əməkdaşlıq səviyyəsinə yüksəlib;
- Zəfər yalnız bir xalqın deyil, bütün Türk və İslam dünyasının ortaq qürurudur.
Yəni Pakistan Silahlı Qüvvələrinin Bakıdakı ilk demarşı, Azərbaycanla bu ölkə arasındakı strateji münasibətlərin yeni mərhələsinin başlanğıcı oldu. Bu hadisə göstərdi ki, Azərbaycanın Zəfəri yalnız tarixi qələbə deyil, həm də gələcək geostrateji müttəfiqlik sisteminin təməlidir.
Beləliklə, Zəfərin 5 illiyinə həsr olunmuş Bakı paradı həm keçmişin şərəfini, həm də gələcəyin birliyini təcəssüm etdirdi. Azərbaycan, Türkiyə və Pakistanın bayraqları altında addımlayan hərbçilər yalnız bir paradda deyil, yeni qlobal düzənin başlanğıcında addımlayırdılar.
Akif NƏSİRLİ
