Zəfərimizin 5 illiyi ilə bağlı qələbə paradı həqiqətən möhtəşəm keçirildi. Hər kəsin bacardığı, əqidəsinə, milli görüşlərinə, dövlət prinsiplərinə, hətta şəxsi mənafeyinə uyğun nəticələr çıxara biləcəyi bir möhtəşəmlik idi...
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Kimin necə baxmasından, necə təhlil etməsindən asılı olmayaraq Paradın möhtəşəmliyi hələ çox illər deyiləcək ,müzakirə olunacaq... Ən müasir hərbi texnika və silah növləri, yeni növ qoşun sistemi, xüsusi qüvvələr... Hər şey həqiqətən möhtəşəm idi... Demək, "hər il ordumuzu və onun maliyyə təminatını durmadan gücləndirəcəyik" strategiyası tam gücü ilə işləyir...
Biri deyir parad dövlətin gücünü nümayiş etdirdi...
Biri deyir hakimiyyətin gücünü göstərdi...
Biri deyir parad Ermənistanı və revanşçıları hədələdi...
Biri deyir "Qərbi Azərbaycan məsələsini həll edəcək qüvvə" nümayiş olundu...
Biri deyir Azərbaycanın dünyada "orta geosiyasi gücə" çevrildiyini göstərdi...
Biri deyir regionun əsas hərbi gücü olduğumuzu təsdiqlədi...
Sözsüz ki, bu rəylərin hər biri az-çox fərqlərlə əsaslıdır....
Ancaq ayrılıqda onların hər biri əsaslı olsalar da, tam əhatəli və mükəmməl olmaya bilərlər.
8 noyabr 2025-ci ilin hərbi paradının dünyanın köhnə nizamla yeni nizamı arasında keçirildiyini nəzərdən qaçırmaq olmaz. Bu möhtəşəm paradın tarixi özəlliklərindən biri məhz bu olmalıdır... Beynəlxalq münasibətlər sürətlə dəyişir. Hüquq normaları ayaqlar altına atılır. Güc önə çıxır. Dünyanın bir yerində başqasına təcavüz edən ölkə(?) digər yerində eyni hərəkəti edənləri ittiham edir. Dünyada müstəsna hərbi, maliyyə gücünə malik olanların idarə etdikləri xaos formalaşır. Buna "yeni dünya düzəni yaranır" deyirlər. Hüquq prinsiplərinə və normalara əsaslanan yeni dünya düzəninin nə vaxt yaranacağını heç kim deyə bilməz... Bəlkə heç olmayacaq, ya bəlkə bu idarə olunan və yalnız gücü olanlara sərf edən xaos hələ neçə on illər beləcə davam edəcək??... Belə beynəlxalq qeyri-müəyyənlikdən ən azı itki və uğurla çıxmağın tək bir yolu var - Milli dövlət gücünə sahiblənmək...
Beynəlxalq hüquq normaları və sistemli düzən hələ uzun illər dünyada işləməyəcək. Çünki önə GÜC ÇIXIB. ..
Biz də Azərbaycan olaraq önə GÜCÜ ÇIXARMALIYIQ. 8 noyabr paradı məhz bunu nümayiş etdirdi. Onun böyük hədəfi bununla bağlıdır. Möhtəşəm parad Azərbaycanın yeni dünya düzəninə keçiddə həlledici olan hərbi gücə sahiblənmək iddiasını və buna doğru inamla getdiyini nümayiş etdirdi...
Azərbaycan yeni dünya düzəninin əsaslarını yazan tərəflərlə bir sırada olmalıdır. Dövlətimiz və xalqımız 8 noyabr yolu ilə birlikdə və inamla gedəcəksə, hədəfə mütləq çatacağıq...
Tahir TAĞIYEV
