Dövlət gücünün simvolu və müasir ordunun qürur mənbəyi - XTQ
Azərbaycan ordusunun gücü təkcə onun texniki imkanlarında deyil, həm də onun ruhunda, döyüş əzmi və qələbə iradəsindədir. Bu ruhun ən parlaq təcəssümü, şübhəsiz ki, Azərbaycan Xüsusi Təyinatlı Qüvvələridir. Onlar sadəcə hərbçilər deyil, Vətənin təhlükəsizliyini, suverenliyini və şərəfini qoruyan, ölümün gözünə dik baxan qəhrəmanlardır.
Son hərbi paradda Azərbaycanın güc nümayişi bu reallığı bir daha bütün dünyaya göstərdi. 4 mindən artıq xüsusi təyinatlının eyni sırada addımlaması, vahid döyüş iradəsi ilə bir cərgədə dayanması, xalqda həm fəxarət, həm də qürur hissi yaşatdı. Bu, sadəcə hərbi keçid deyildi, bu, Azərbaycanın döyüş meydanında əldə etdiyi tarixi qələbələrin canlı nümayişi idi. Hər bir addımda Şuşanın, Hadrutun, Cəbrayılın, Füzulinin, Zəngilanın azadlığı uğrunda döyüşənlərin izi vardı.
Azərbaycanın Xüsusi Təyinatlı Qüvvələri ordu sisteminin “dəmir yumruğu”, xalqın iradəsinin və dövlətin qüdrətinin təcəssümüdür. Onlar NATO standartlarına uyğun təlimlər keçmiş, ən müasir texnika ilə təchiz olunmuş, amma bütün bunlardan daha önəmlisi - döyüş ruhu ilə silahlanmış insanlardır. Onların gücü yalnız texnologiyada deyil, “mən Vətən üçün ölməyə hazıram” deyən qəlbdədir.
Bu qüvvələrin qəhrəmanlığı 2020-ci ilin payızında, Şuşa əməliyyatında öz zirvəsinə çatdı. Şuşa – sıldırım qayalar üzərində qurulmuş, hər tərəfdən keçilməzliklə qorunan bir şəhər-qala idi. Amma o bizim qalamızdı, sadəcə işğal altında, əsirlikdə idi. Düşmən illərlə bu mövqeyi “alınmaz qala” adlandırmışdı. Amma Azərbaycan əsgəri üçün alınmaz qala yox idi – yalnız azad olunmalı torpaq vardı. XTQ döyüşçüləri Şuşaya aparan yeganə yoldan deyil, qayalıqlardan, insanın belə baxmağa cəsarət etmədiyi sıldırımlardan dırmaşaraq daxil oldular.
O gecə yağışın, qaranlığın, soyuğun və atəşin içində Azərbaycan XTQ-si addım-addım irəliləyirdi. Hər addımda şəhid yoldaşının səsi qulaqlarında idi, hər nəfəsdə “Vətən sağ olsun” deyə səslənən and vardı. Düşmən atəş açırdı, amma geri çəkilən yox idi. Yaralı döyüşçü yoldaşını çiyninə alıb, bir əli ilə avtomatı sıxan, digər əli ilə onu qoruyan Azərbaycan əsgəri tarix yazırdı. Qan, torpaq və inam birləşib müqəddəs bir zəfər dastanı yaradırdı.
Şuşanın qayalarına sancılan Azərbaycan bayrağı o gün sadəcə bir şəhərin azadlığını deyil, bütöv bir xalqın dirçəlişini simvolizə etdi. Həmin gün XTQ-nin göstərdiyi şücaət, fədakarlıq təkcə hərbi əməliyyat deyildi - bu, bir millətin ruhunun qələbəsi idi.
Bu tarixi günlərdən artıq 5 il keçib. Beş il ərzində Azərbaycan Xüsusi Təyinatlı Qüvvələri həm say, həm struktur, həm də taktiki baxımdan xeyli inkişaf edib. Artıq onlar yalnız dağ döyüşlərində deyil, şəhər əməliyyatlarında, yüksək texnoloji müharibə şəraitində və beynəlxalq antiterror formatlarında da fəaliyyət göstərə biləcək səviyyədədirlər. Təlimlərdə real döyüş təcrübəsi öyrədilir, döyüşçülər fərdi və qrup səviyyəsində qərar vermə bacarığına malik müstəqil hərbi vahidlər kimi yetişdirilir.
Bu gün XTQ Azərbaycanın təhlükəsizlik sisteminin strateji dayağıdır. Onlar hər an əməliyyata çıxmağa, istənilən xüsusi hədəfi qısa müddətdə zərərsizləşdirməyə qadirdirlər. Bu, yalnız hərbi qüdrət deyil – bu, milli iradənin, xalqın birliyinin və dövlətin gücünün göstəricisidir.
Təbii ki, bu qüvvələrin imkanları və fəaliyyət istiqamətləri barədə geniş məlumat verilmir. Bu, dövlət sirri ilə qorunan məsələdir və belə də olmalıdır. Amma açıq görünən odur ki, Azərbaycanın Xüsusi Təyinatlı Qüvvələri bu gün regionda ən hazırlıqlı, döyüş təcrübəsinə malik və ən yüksək səviyyədə intizama sahib hərbi qurumdur.
Onlar təkcə sərhədləri deyil, həm də Vətənin şərəfini qoruyurlar. Onların addımı xalqın ürək döyüntüsü, baxışı isə Azərbaycanın gələcəyinə inamdır.
Azərbaycanın Xüsusi Təyinatlı Qüvvələri bu gün sadəcə ordu birliyi deyil, bu, bir millətin iradəsidir, bir dövlətin qürurudur, bir tarixdir.
Onlar Vətən torpağında iz qoydular, o izlər isə nəsillərin yaddaşına qəhrəmanlıq salnaməsi kimi həkk olundu.
Azərbaycanın “dəmir yumruğu” bu gün də yerindədir - daha güclü, daha çevik və hər an Vətənin müdafiəsinə qalxmağa hazır!
Akif NƏSİRLİ
