Tural İsmayılov: "Bu üç qardaş ölkənin bir araya gəlməsi təkcə hərbi ittifaq deyil, həm də siyasi, ideoloji və mənəvi birlik mesajıdır"
Azərbaycan, Türkiyə və Pakistan arasında hərbi-müdafiə ittifaqının gerçəkləşdirilməsi istiqamətində daha qəti addımlar atılır. Üç ölkənin -Türkiyə, Pakistan və Azərbaycanın sıx strateji əməkdaşlığı hərbi ittifaq formasında özünü göstərir. Biz Vətən müharibəsində qazanılan möhtəşəm zəfərin 5-ci ildönümü münasibətilə keçirilən təntənəli hərbi paradda üç qardaş ölkənin bu sahədə birgə addımlarının təzahürlərini gördük.
Məlumat üçün bildirək ki, hərbi paradda Azərbaycanın 5000, Türkiyənin 240, Pakistanın isə 120 nəfər şəxsi heyəti iştirak edib.
Qeyd edək ki, üç ölkə arasında hərbi İttifaqın formalaşdırılması uzun müddətdir gündəmdədir, ötən dövrdə Türkiyə, Azərbaycan və Pakistan hərbçilərinin birgə təlimləri də keçirildi.
Bu gün üç ölkə arasında hərbi sahədə əməkdaşlıq daha da dərinləşəcək yeni forma alır. Azərbaycan-Türkiyə-Pakistan hərbi-müdafiə ittifaqına doğru daha bir addım atılır.
Bu addımın əhəmiyyəti, gələcək perspektivləri, indiki mesajları nədir? Bu ittifaqın formalaşmasına yönəlik növbəti addımı necə dəyərləndirmək olar?
Politoloq Tural İsmayılov baki-xeber.com-a bildirdi ki, Azərbaycan, Türkiyə və Pakistanın birgə hərbi əməkdaşlığı artıq simvolik mərhələdən çıxaraq strateji dərinlik qazanır. "Bu üç qardaş ölkənin bir araya gəlməsi təkcə hərbi ittifaq deyil, həm də siyasi, ideoloji və mənəvi birlik mesajıdır. Paradda nümayiş olunan koordinasiya göstərdi ki, bu əlaqə sırf diplomatik deyil, praktik gücə söykənir. Azərbaycan ordusu Türkiyə modelinə uyğun modernləşir, Pakistan isə nüvə gücünə malik ölkə kimi bu tandemə strateji çəkidarlıq gətirir. Bu, regional balansı ciddi şəkildə dəyişə biləcək faktordur. İttifaqın formalaşması Qərb və Rusiya arasında sıxışan yeni geosiyasi məkan üçün alternativ təhlükəsizlik arxitekturası yaradır".
T. İsmayılov qeyd etdi ki, Azərbaycan üçün bu birlik Qarabağ Zəfərindən sonra qazandığı hərbi təcrübəni beynəlxalq əməkdaşlığa çevirmək deməkdir: "Türkiyə üçün isə bu, türk-islam dünyasında liderlik missiyasını gücləndirən addımdır. Pakistan bu əməkdaşlıqla həm diplomatik təcriddən çıxır, həm də Cənubi Asiyada öz mövqeyini möhkəmləndirir. Cənubi Qafqazda və Mərkəzi Asiyada yeni güc mərkəzi formalaşır. Müdafiə sənayesi, kəşfiyyat və təlim sahəsindəki inteqrasiya artıq başlanıb. Növbəti mərhələdə birgə komanda qərargahlarının qurulması istisna deyil. Bu, kollektiv müdafiə mexanizminin ilkin modelini formalaşdıracaq. Əslində, bu proses NATO-ya bənzər bir regional təhlükəsizlik bloku konturunu yaradır".
T. İsmayılovun fikrincə, gələcəkdə bu modelin Orta Asiya türk dövlətlərinə də açılması mümkündür və bu, Türk dünyasının strateji birliyinə aparan ən real yoldur.
İradə SARIYEVA
