Azər Həsrət: “Uitkoffun verdiyi müsahibədə dilə gətirdiyi bu gerçək də təsadüf deyil”
“Azərbaycan Prezidenti İlham Əliyev əsl dövlət liderliyinin nümunəsidir”. Bu barədə ABŞ Prezidentinin xüsusi elçisi Stiv Uitkoff bildirib.
“Prezident Əliyevin ordusu daha güclüdür. O, fürsətdən istifadə edərək özünə məxsus əraziləri (işğaldan azad edilmiş əraziləri) geri aldı”, – deyə Uitkoff Tramp administrasiyasının Bakı ilə İrəvan arasında münasibətləri normallaşdırmaq səylərini şərh edərkən bildirib.
Uitkoffun sözlərinə görə, 8 avqustda Oval Ofisdə keçirilən görüşdə Prezident Donald Tramp Prezident Əliyevdən soruşub: “Niyə dayandınız? Qələbəniz sizin idi, böyük bir ordunuz var”.
Buna cavab olaraq Azərbaycan lideri cavab verib: “Mən bizdən alınanları geri almaq istəyirdim. Bundan artıq mənə heç nə lazım deyil”.
Xüsusi elçi bunun “əla qərar” olduğunu qeyd edib və Prezident Əliyevi müdrik dövlət liderliyinin nümunəsi kimi göstərib.
Sözügedən məsələni bakı-xeber.com-a şərh edən siyasi ekspert Azər Həsrətin fikrincə, Prezident İlham Əliyevin üstün liderlik keyfiyyətləri haqqında hər zaman danışılıb: “Əlbəttə ki, biz Azərbaycan vətəndaşı olaraq bununla qürur duyuruq. Çünki bu, bizim liderimizdir, ölkəmizin Prezidentidir. Doğurdan da İlham Əliyev çox alicənab davranmağı bacaran bir liderdir. Uitkoffun verdiyi müsahibədə dilə gətirdiyi bu gerçək də təsadüf deyil. Əlbəttə, elə şeylər var bəzən ictimailəşdirilmir, mətbuata çıxarılmır və biz onun haqqında xəbər tutmuruq. Sizi əmin edirəm ki, İlham Əliyevin bu cür görüşlərdə, danışıqlarda bundan qat-qat artıq ifadələrlə üzləşdiyi şübhəsizdir. Əlbəttə ki, ona belə suallar da verilir, onunla fikir mübadiləsi də aparılır. İlham Əliyevə göstərilən o yüksək etimad, hörmət də bundan qaynaqlanır. Onun alicənablığından, haqqı nahaqdan seçməyi bacarmasından, onun güclü ikən kişiyana davranmağı bacarmasından irəli gəlir. Birləşmiş Ştatların prezidenti elə-belə adam deyil. O cümlədən də onun nümayəndəsi Uitkoff. Təbiidir ki, o nümayəndə prezidentin adından gəlir, görüşlər keçirir, yaxud da danışır. Ən nəhayət, geri dönəndə də Donald Trampa məruzə edir. Bax Trampın Prezident Əliyevə göstərdiyi hörmət, etimad da bu cür xarakterdən qaynaqlanır. Yəni artıq qəbul edirlər ki, Azərbaycan gücləndikcə təhlükəyə deyil, əksinə sülhə xidmət edir. Təhlükəyə çevrilmir. Bunu əlbəttə ki, qiymətləndirməlidirlər və qiymətləndirirlər. Yəni İlham Əliyev lider olaraq bir alicənablıq örnəyidir, qüdrətlidir, güclüdür. Ölkəsini bu səviyyəyə yüksəltməyi bacarıb. Lakin bütün bunlarla bərabər, öz təmkinini də qorumağı bacarır. Bu isə mütləq yüksək dəyərləndirilir”.
Vidadi ORDAHALLI
