Fuad İbrahimov: “Ölkəmizdə bununla bağlı perspektivlər var”
Prezident İlham Əliyev AMEA-nın 80 illik yubiley yığıncağında çıxışı zamanı hərbi sənayemizin ixrac imkanları ilə bağlı önəmli məqamları qeyd edib. Ölkə başçısı bildirib ki, Azərbaycanda hərbi sənaye sürətlə inkişaf edir və artıq uzun illər ərzində bu sahəyə böyük vəsait ayrılır, bu sahədə fəaliyyət göstərən şirkətlərin fəaliyyəti təkmilləşir:
“Eyni zamanda, bu yaxınlarda biz bu sahəni özəl sektor üçün də açmışıq. Çünki bu istiqamətdə ən böyük uğurlar əldə etmiş ölkələrdə hərbi təyinatlı məhsullar məhz özəl şirkətlər tərəfindən istehsal olunur. Ona görə biz də burada lisenziyaları verməklə özəl sektoru cəlb etmişik. Hələlik bu proses icra mərhələsindədir, amma yəqin ki, yaxın gələcəkdə bir çox Azərbaycan şirkətləri artıq dünya səviyyəli keyfiyyətli hərbi təyinatlı məhsullar istehsal edəcəklər. Eyni zamanda, dövlət xətti ilə bu istiqamətdə işlər aparılır və biz öz hərbi imkanlarımızı artıq böyük dərəcədə yerli istehsal hesabına genişləndiririk, öz tələbatımızı böyük dərəcədə ödəyirik. Artıq bir çox ölkələrə hərbi təyinatlı məhsul ixrac edirik və qarşıya vəzifə qoyulub ki, həm daxili tələbatı ödəmək, həm də ixrac etmək üçün bizdə bu istiqamətdə çox ciddi sənaye klasteri yaradılsın. Çünki bu, çox gəlirli sahədir”.
Maraqlıdır, ekspertlər hərbi sənayenin ixrac perspektivlərini necə dəyərləndirir?
“Azərbaycan müdafiə sənayesini inkişaf etdirməklə bir sıra Asiya və Afrika ölkələrinə silah ixracını artıra bilər”
Sözügedən məsələni “Bakı-Xəbər”ə şərh edən iqtisadçı-ekspert Fuad İbrahimovun fikrincə, Azərbaycanda bununla bağlı perspektivlər var: “Çünki ortada bununla bağlı təcrübə var. Hələ 2005-ci ildə Müdafiə Sənayesi Nazirliyi yaradıldı. Bir sıra hərbi təyinatlı məhsulların istehsalına başlanıldı. Bu qurumun təsis olunması ölkədə müdafiə təyinatlı məhsulların istehsalının sistemli şəkildə təşkilinə və beynəlxalq əməkdaşlıq əlaqələrinin genişləndirilməsinə şərait yaratdı. Qısa müddətdə müxtəlif təyinatlı sursatların, atıcı silahların, döyüş texnikasının ehtiyat hissələrinin və digər müdafiə məhsullarının istehsalı üzrə müəssisələr fəaliyyətə başladı. Prezidentin də qeyd etdiyi kimi, artıq özəl şirkətlər də bu işə cəlb edilib. Eyni zamanda, bildiyim qədər Türkiyənin bir sıra şirkətləri ilə bu istiqamətdə müştərək layihələr həyata keçirilir. Son illərdə Azərbaycan hərbi sənayesində modernləşmə və texnoloji yenilənmə prosesi sürətləndirilib. Yerli müəssisələrdə istehsal olunan silah və texnikalar həm ordunun təminatında, həm də ixrac məqsədilə istifadə olunur. Ən başlıcası isə bu gün dünyada silaha tələbat var. Azərbaycan müdafiə sənayesini inkişaf etdirməklə bir sıra Asiya və Afrika ölkələrinə silah ixracını artıra bilər. Onu da qeyd edim ki, bu sahədə dayanıqlı və innovativ inkişaf üçün özəl sektorun fəal iştirakı zəruridir. Çünki özəl şirkətlərin çevik idarəetmə sistemi, innovasiyaya açıq yanaşması və rəqabət mühiti müdafiə sənayesinin effektivliyini artıran əsas amillərdəndir. Bu həm də ölkəmizin xaricdən asılılığını azaldacaq”.
Vidadi ORDAHALLI
