Fikrət Yusifov: “Ermənistan sülhdən sonra Azərbaycandan neft-qaz almaq üçün də müraciət edəcək”
Məlum olduğu kimi, Azərbaycan dəmir yolları vasitəsilə daşınan Rusiya buğdasının ilk partiyası Ermənistana çatıb. Bu barədə Ermənistanın iqtisadiyyat naziri Gevorq Papoyan bildirib. Onun sözlərinə görə, ümumi çəkisi 1048 ton 800 kiloqram olan taxıl yüklü 15 vaqon noyabrın 5-də axşam “Ayrum” stansiyasına gətirilib:
“Bu, adətən Yuxarı Lars vasitəsilə çatdırılan Rusiya buğdasıdır. Siz oradakı çətinlikləri – növbələri, eləcə də nəqliyyat əlaqəsinə ciddi maneələri bilirsiniz. Bu dəfə yük Rusiya ərazisindən keçməklə Azərbaycana dəmir yolu ilə çatdırıldı. Hazırda Ermənistanla Azərbaycan arasında birbaşa dəmir yolu əlaqəsi olmadığı üçün qatar Gürcüstana, oradan isə Ermənistana daxil oldu. Beləliklə, bu gün tarixi gündür. Demək olar ki, 35 ildən sonra ilk dəfə olaraq yük Azərbaycan ərazisindən dəmir yolu ilə Ermənistana çatdırılıb”
Qeyd etdiyimiz kimi, Ermənistan Rusiya və Qazaxıstandan aldığı buğdanı Azərbaycan üzərindən daşımağa başlayıb. Gələcəkdə Ermənistanın başqa növ yükləri də Azərbaycan üzərindən daşımaq imkanı olacaq.
Azərbaycanın bu xoşməramlı addımı qarşılığında Ermənistan da oxşar addımı atacaq. Ölkəmizə idxal edilən malların Ermənistan üzərindən daşınmasına şərait yaradılacaqmı?
“Bizim Ermənistan üzərindən daşınacaq elə bir yükümüz yoxdur, lakin Ermənistan yüklərinin Azərbaycan üzərindən daşınmasına çox möhtacdır”
“Ekonomiks” Beynəlxalq İqtisadi Araşdırmalar İctimai Birliyinin sədri Fikrət Yusifov “Bakı-Xəbər”ə şərhində bildirdi ki, otuz il bağlı olan kommunikasiyaların indi açılması Ermənistanı separatçıların yaratdığı blokadadan çıxarır. Azərbaycan Ermənistana daşınan yüklərin öz üzərindən keçməsinə razılıq verməklə bütün dünyaya bir daha sübut etdi ki, sülhsevən və qonşuları ilə qarşılıqlı əməkdaşlıq şəraitində yaşamaq istəyində olan bir dövlətdir: “Bizim Ermənistan üzərindən daşınacaq elə bir yükümüz yoxdur. Lakin Ermənistan yüklərinin Azərbaycan üzərindən daşınmasına çox möhtacdır. Bu hələ hamısı deyil. Ermənistan sülhdən sonra Azərbaycandan neft-qaz almaq üçün də müraciət edəcəkdir. Çünki bu məhsulları uzaqdan daşımaqdansa qonşudan almaq daha sərfəli olur”.
Həmsöhbətimiz hesab edir ki, zamanla iki ölkə arasında erməni separatçılarının yaratdığı düşmənçilik aradan qalxacaq: “Əsas olan budur ki, ermənilərin böyük əksəriyyəti Azərbaycanla normal münasibətlər qurmadan bu regionda yaşamağın mümkün olmayacağını anlaya bildi. Bu məsələdə Ermənistan baş naziri N.Paşinyanın erməni xalqı qarşısında xidmətləri böyükdür. O, zamanında xalqına izah edə bildi ki, Azərbaycan və Türkiyə ilə münasibətləri yaxşılaşdırmaqdan başqa yolları yoxdur”.
Günel CƏLİLOVA
