Ramil Məmmədli: “Böyük güclər bu qətnamələrin icra olunmasında maraqlı deyildilər”
Prezident İlham Əliyev AMEA-nın 80 illik yubiley yığıncağında çıxışı zamanı deyib ki, bu gün dünyada qaydalar tamamilə dəyişdiyi üçün təhlükəsizlik, müdafiə potensialı, hərbi güc əsas məsələdir və ərazilərimizi güc yolu ilə azad etməsəydik BMT qətnamələri heç 100 il də icra edilməyəcəkdi:
“Beynəlxalq təşkilatlar, yəni onların bir çoxu iflic vəziyyətindədir. Onların qərarları icra edilmir. Necə ki, BMT Təhlükəsizlik Şurasının 4 qətnaməsi 30 il icra edilməmişdir. Əgər biz öz torpaqlarımızı hərbi yolla azad etməsəydik, hələ bundan sonra 100 il də icra edilməyəcəkdi. Beynəlxalq təşkilatların nüfuzu böyük dərəcədə aşağı düşüb. Bu gün güc amili dünyada aparıcı amildir. Yəni bugünkü dünya budur və belə olan halda təhlükəsizlik, müdafiə potensialı, hərbi güc əsas məsələdir. Əlbəttə ki, güclü iqtisadiyyat, maliyyə resursları olmadan bunu əldə etmək mümkün olmayacaq”.
“Ərazilərimizi işğaldan azad etməyimiz bizi arxayın salmamalıdır”
Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert Ramil Məmmədli hesab edir ki, güc amili hər şeydən önəmlidir: “Biz bunu ötən 30 il ərzində gördük. Ərazilərimizin işğalı ilə bağlı BMT Təhlükəsizlik Şurasının qəbul etdiyi 4 qətnamə dünyanın gözü qarşısında bir kağız parçasına çevrildi. Təəccüblü olan həm də o idi, Ermənistana nəinki hərbi, heç siyasi təzyiq belə göstərilmədi. Nə beynəlxalq təşkilatlar, nə aparıcı dövlətlər bir dəfə olsun bu vasitələrdən istifadə etmədilər. Halbuki, işğalçı ilə işğala məruz qalan tərəf arasında bir fərq olmalı idi. Ancaq biz nəyi gördük? Müxtəlif vasitələrlə bizi işğalla barışmağa, Birinci Qarabağ müharibəsindən sonra yaranan reallıqları qəbul etməyə təhrik edirdilər. Ona görə də, bəli, hərb yolu ilə ərazilərimizi azad etməsəydik 100 il də BMT qətnamələri icra olunmazdı. Ona görə ki, böyük güclər bu qətnamələrin icra olunmasında maraqlı deyildilər. Bunu hamıdan yaxşı ölkə başçısı bilirdi. Ona görə ki, Prezident danışıqlar prosesinin içində idi. İctimaiyyətə bəlli olmayan məqamları bilirdi. Ona görə də Azərbaycan ərazi bütövlüyünü və suverenliyini tam təmin edəndən sonra hərbi, müdafiə xərclərini azaltmayıb. Bu xərcləri artırıb. Çünki dünyadakı qarmaqarışıq vəziyyət bunu bizdən tələb edir. Bugünkü dünya güc amilinə söykənir. Kim güclüdürsə, öz istədiyini edir və biz görürük ki, beynəlxalq hüquq işləmir. Ona görə də biz hər zaman güclü olmalıyıq. Ərazilərimizi işğaldan azad etməyimiz bizi arxayın salmamalıdır. Heç kəs bilmir sabah nə olacaq, hansı təhdidlər ortaya çıxacaq. Ona görə daim istənilən təhdidə qarşı hazırlıqlı olmalıyıq”.
Vidadi ORDAHALLI
