Faiq Ələkbərli: “Rubinyanın öz aləmində verdiyi cavab tamamilə əsassızdır”
Prezident İlham Əliyev Azərbaycan Milli Elmlər Akademiyasının 80 illik yubiley yığıncağında çıxışı zamanı indiki Ermənistan ərazində tarixi toponimlərimizdən də danışıb.
Prezident Əliyev bildirib: “...Təkcə XX əsrin əvvəllərində çar Rusiyası tərəfindən dərc edilmiş xəritələrə baxmaq kifayətdir hər kəs görsün ki, indiki Ermənistan ərazisində toponimlərin mütləq əksəriyyəti Azərbaycan mənşəlidir. O xəritələrdə Sevan gölü adlı göl yoxdur. O xəritələrdə Göyçə gölüdür və bütün digər bizim istifadə etdiyimiz tarixi toponimlərimiz orada öz əksini tapıb. O xəritələri biz tərtib etməmişik ki, kimsə desin biz burada saxtakarlıq eləyirik. Bunu çar Rusiyası edib. Həmin o çar Rusiyası ki, vaxtilə erməniləri İrandan və Şərqi Anadoludan gətirərək bizim Qarabağ torpağında yerləşdirib ki, burada etnik və dini tərkib dəyişsin. Yəni, bu xəritələr tamamilə tarixi həqiqətə əsaslanan xəritələrdir. Ona görə biz bunu təbliğ etməliyik, tədqiq etməliyik...”
İlham Əliyevin səsləndirdiyi haqlı fikirləri Ermənistandakı bəzi rəsmilər narahatlıqla qarşılayıb.
Ermənistan parlamenti sədrinin müavini Ruben Rubinyan saxta, əsassız iddaialar irəli sürməklə Azərbaycan Prezidentinin fikirlərinə öz aləmində guya cavab verib.
Azərbaycan Prezidentinin "Sevan gölü yoxdur, Göyçə gölü var” bəyanatı Rubinyanı elə narahat edib ki, o, özündən yeni saxta adlar “icad edib”. “Əgər kifayət qədər geriyə qayıtsaq, bir nöqtədə köhnə xəritələrdə Sevan adını görməyəcəyik. Bunun əvəzinə, Geghama və ya Gegarkun dənizini görəcəyik...”-deyə Rubinyan Facebook-da yazıb.
Tarixdə “Geghama və ya Gegarkun dənizi” ifadəsi olsa da belə, onun ermənilərə aidiyyəti yoxdur. Bunu erməni tarixçiləri ermənilərlə bağlamağa cəhd edirlər. Biz unutmamalıyıq ki, indiki Ermənistan ərazisində oğuz türkləri ilə yanaşı qıpçaq türkləri də yaşayıb və böyük bir mədəniyyət yaradıblar. Bu gün o mədəniyyətə, onlarla bağlı toponimlərə, yer-yurd, çay-göl adlarına da ermənilər iddia edib özününküləşdirirlər.
Ermənilərin “Sevan” adlandırdığı bu göl Rusiyanın tərtib etdiyi xəritələrdə Göyçə gölü olaraq qeyd edilib. “Kitabi Dədə Qorqud”da Gökcə gölü barədə məlumat verilir, o gölün ətrafında türk boylarının yaşadığı bildirilir. Azərbaycan Prezidenti tarixi həqiqətləri bəyan edib və o gölün adının “Sevan” yox məhz Göyçə gölü olduğunu bəyan edib. Prezident Əliyevin bu məsələni və indiki Ermənistan ərazisindəki kütləvi olaraq Azərbaycan toponimlərinin olduğunu vurğulaması erməni saxtakarlığına verilən ən tutarlı cavabdır. Erməni alimlərinin son illər uydurduqları miflər əsasında yazdığı kitabların, məqalələrin iflasa uğradılmasıdır.
“Onun dediyi “Gegarkun” sözünün də haylarla heç bir əlaqəsi yoxdur, bu, təmiz qıpçaq türkcəsində olan sözdür, yenə də türklərlə bağlıdır”
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru Faiq Ələkbərli “Bakı-Xəbər”ə bildirdi ki, Rubinyanın cavabları məntiqsizdir və heç bir əsası yoxdur. F.Ələkbərli qeyd etdi ki, Azərbaycan Prezidenti tarixi faktlar əsasında danışıb, konkret xəritələrdən bəhs edib. Bu məsələ barədə Rubinyanın söylədiklərinin tarixi kökü olmadığını deyən F.Ələkbərlinin sözlərinə görə, heç kəs indiki Ermənistan ərazisindəki qədim Azərbaycan toponimlərini inkar edə, Göyçə gölünün adını saxtalaşdıra bilməz. “Rubinyanın öz aləmində verdiyi cavab tamamilə əsassızdır və o iddia edir ki, guya Göyçə gölü olmayıb. Deyir ki, o gölün adı Gegarkun olub. Onun dediyi “Gegarkun” sözünün də haylarla heç bir əlaqəsi yoxdur, bu təmiz qıpçaq türkcəsində olan sözdür, yenə də türklərlə bağlıdır. Sözün kökündəki “Geg” “gök” deməkdi. Necə ki, qaqauz türkcəsində bu “gök” adlandırılır. Biz qədim dövrlərə baxanda görürük ki, bu, qıpçaq türkcəsində belədir. Gökcə oğuz, Gegarkun isə qədim qıpçaq türkcəsindədir. Hər ikisi də Azərbaycan türkləri ilə bağlıdır. Ermənilər qıpçaq türklərinin dilini və mədəniyyətini də öz adlarına çıxıb saxtalaşdırırlar. Ermənistanda nə qədər qıpçaq mədəniyyəti nümunələri haylar tərəfindən mənimsənilib.
Rubinyan indiki Ermənistanın qədim türk torpağı olduğunun, orda bizim toponimlərimizin mövcudluğunun Azərbaycan Prezidentinin dilindən səsləndirilməsindən narahatdır. O deyib ki, bu məsələlər keçmişdə qalmalıdır, irəliyə baxmaq lazımdır. İrəliyə baxırıqsa o torpaqlarda azərbaycanlılar yaşamalıdır, insanlarımız ora qayıtmalıdır. Prezident İlham Əliyevin dediyi kimi, biz ora tanklarla yox, avtomobillərlə gedəcəyik. İnsanlar o torpaqlarda hökmən yaşamalıdırlar. Göyçə də, Dərələyəz də, İrəvan da, başqa torpaqlar da qədim türk əraziləridir. Odur ki, Rubinyan bunu bilməlidir. Bu gün Azərbaycanla Ermənistan arasında normallaşma prosesi başlayıb, sülh yolunda addımlanır. Bu müsbət məsələlərin fonunda azərbaycanlılar öz qədim yurdlarına qayıdıb yaşamalıdırlar. Azərbaycanlının geri qayıtmaq niyyətindən Rubinyan kimiləri qorxub həyacanlanmamalıdırlar. Bizin öz yurdlarımıza qayıtmaq haqqımız var, bunu Ermənistan dövləti təmin etməlidir”-deyə F.Ələkbərli qeyd etdi.
İradə SARIYEVA
