Samir Hümbətov: “Kozakın istefası Ukrayanaya görə ola bilər”
Dmitri Kozak həftəsonu öz istəyi ilə prezident administrasiyası rəhbərinin müavini vəzifəsindən getməsi ilə bağlı istefa ərizəsi yazıb. Bu barədə RBK-ya məmurun qərarı ilə tanış olan iki mənbə bildirib.
Mənbələrdən biri onun çərşənbə günü kollektivlə görüşünün planlaşdırıldığını vurğulayıb. Hər iki mənbə deyir ki, Kozak biznesə keçmək üçün müxtəlif təklifləri nəzərdən keçirir.
Qeyd edək ki, Kozak Prezident Vladimir Putinin çoxdankı silahdaşıdır.
Kozak postsovet ölkələri, o cümlədən Ukrayna ilə bağlı siyasətə cavabdeh olmaqla, xarici ölkələrlə sərhədyanı əməkdaşlıq və regionlararası və mədəni əlaqələr idarəsinin işini kurasiya edirdi.
Dmitri Kozak niyə istefa verdi? Onun bu istefası Ukraynaya qarşı müharibəyə görə ola bilər, yaxud ola bilməz? Çünki məlumatlara görə, Kozak başdan bəri Rusiyanın Ukraynada apardığı işğalçı müharibənin əleyhinə olub. İstefası bununla əlaqədar ola bilərmi? Bir də ki, bundan sonra onu nə gözləyir?
“Putin administrasiyası daxilində də çatların olduğunu deməyə əsas verir”
Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov “Bakı-Xəbər”ə bildirdi ki, D.Kozak özü Ukrayna əsillidir: “Hələ müharibə başlamazdan əvvəl o bildirirdi ki, Rusiyanın Ukraynaya müdaxiləsi çox ciddi fəsadlara səbəb olacaq. Yəni təkcə Ukrayana üçün yox, Rusiyanın özü üçün də fəsadlar yaradacaq. Başdan bəri Kozak Rusiyanın bu hərəkətinə müxalif oldu. Amma əlbəttə ki, sistemin içində olduğu üçün bəlkə də onun səsi çox da eşidilmirdi. O, Ukraynaya qarşı bu əməliyyatlarda çox da nəzərəçarpacaq dərəcədə addım atmırdı. Düşünürəm ki, Kozakın istefası Ukrayanaya görə ola bilər”.
S.Hümbətov qeyd etdi ki, Putin administrasiyasında, eləcə də Rusiya ordusunun daxilində xeyli sayda Ukrayana əsilli generallar, yüksək rütbəli şəxslər vardı. “Ukraynaya qarşı müharibədə Putin arxa cəbhədə, istər administrativ heyətdə, istərsə də ordu heyətində bəzi dəyişikliklər edib. Bu, Putinin Ukrayna əsilli şəxsləri uzaqlaşdırmaq siyasəti apardığını da göstərir. Bu da ola bilər. Amma bütün hallarda, Kozakın vəzifəsindən ayrılması komandada bir boşluq yaradacaq. Çünki onun idarəetmə sahəsində kifayət qədər təcrübəsi vardı. Yəni belə bir şəxsin vəzifədən uzaqlaşdırılması Putin administrasiyası daxilində də çatların olduğunu deməyə əsas verir. Düşünürəm ki, Kozak istefa veribsə, yaxud buna məcbur edilibsə, bu onun əks mövqeyinə görə ola bilər. Kozakın və Putinin bundan sonra atacağı addımlardan bəlli olacaq ki, tərəflər - Kozak nə istəyir, Putin nə istəyir” - deyə S.Hümbətov qeyd etdi.
İradə SARIYEVA
