Müsəlman ölkələri Azərbaycanın Ermənistandan kompensasiya tələbini dəstəklədi...
Faiq Ələkbərli: “İslam Əməkdaşlıq Təşkilatının erməni vandalizmi ilə bağlı qatnamə qəbul etməsi təqdirəlayiq haldır”
Məlum olduğu kimi, İslam Əməkdaşlıq Təşkilatının (İƏT) Nazirlər Şurasının İstanbul şəhərində keçirilən 51-ci sessiyası öz işini başa vurub. Sessiya zamanı 5 qətnamə qəbul olunub.
Həmin qətnamələrdən biri - “Ermənistan Respublikasının Azərbaycan Respublikasına qarşı təcavüzü nəticəsində Azərbaycan Respublikasının ərazilərində İslam dininə aid tarixi və mədəni abidələrin və izlərin dağıdılması və təhqir olunması” adlı qətnamədə keçmiş işğal dövründə Ermənistan tərəfindən Azərbaycan ərazilərində İslam mədəni irs nümunələrinə qarşı törədilən vandalizm aktları qətiyyətlə pislənir və Ermənistanın bu cinayətlərinə görə Azərbaycanın irəli sürdüyü tələblər dəstəklənir.
“İşğal dönəmində Azərbaycan tarixinə vurulan ziyana görə kompensasiya ödəniləcək və ermənilər öz səhvlərini etiraf edəcək”
AMEA Fəlsəfə və Sosiologiya İnstitutunun şöbə müdiri, fəlsəfə doktoru Faiq Ələkbərli "Bakı-Xəbər"ə şərhində bildirdi ki, İslam Əməkdaşlıq Təşkilatının 51-ci sessiyasında Azərbaycanla bağlı qəbul olunan qətnamələrdə vaxtilə Azərbaycan torpaqları ermənilər tərəfindən işğal olunarkən Ermənistanın təcavüzkar siyasət yürütdüyü pislənilir. Xüsusilə Ermənistanın Azərbaycan torpaqlarını işğal etdiyi dönəmdə İslam mədəniyyəti, tarixi abidələrinin dağıdılması pislənilir: “Bu, həqiqəti əks etdirən bir məsələdir. Məlumdur ki, Ermənistan yalnız Sovet dönəmində deyil, torpaqlarımız işğal altında olan zaman belə milli mənəvi abidələrimizi ya mənimsəyib, ya da məhv edib. Əslində, Sovet dönəmində Ermənistan bu işi gizli şəkildə edib. Ancaq torpaqlarımızın bir qismini işğal altında saxladığı zaman bu problem pik səviyyədə idi. Ermənilər mənimsəyə bildiklərini özününküləşdirməyə çalışdılar, digər abidələrimizi məhv etdilər. Bu səbəbdən də İslam Əməkdaşlıq Təşkilatının erməni vandalizmi ilə bağlı qatnamə qəbul etməsi təqdirəlayiq haldır. Məlum məsələ ilə bağlı Ermənistan hökumətinin təzminat ödəməsi gözlənilir. Yəni indiki Ermənistan hakimiyyəti bunu daha normal qəbul edib, kompensasiya ödəyə bilər. Paşinyan özündən əvvəlki hökumətin işğalçılıq siyasətini pisləyirsə, o zaman onlar Azərbaycanın tarixi, milli, islam abidələrinə vurduğu ziyanı ödəməli, Azərbaycan tərəfinin haqlı tələbi qarşısında müvafiq addımlar atmalıdır. Ehtimal olunur ki, işğal dönəmində Azərbaycan tarixinə vurulan ziyana görə kompensasiya ödəniləcək və ermənilər öz səhvlərini etiraf edəcək”.
Günel CƏLİLOVA
