Ermənistan sülh sazişi üçün bütün şərtlərdən(?) imtina etdi...
Azər Həsrət: “Məgər burada şərt irəli sürən tərəf Ermənistandır ki, hansısa şərt irəli sürsün?”
Ermənistan hazırda Azərbaycanla sülh müqaviləsi imzalamağa hazırdır. İrəvanın heç bir məhdudiyyəti və ya əlavə şərtləri yoxdur. Bunu Ermənistan baş nazirinin müavini Mher Qriqoryan Rusiya mətbuatına açıqlamasında bildirib.
“Biz indi sülh imzalamağa hazırıq. Bu nə qədər tez edilsə, bir o qədər yaxşıdır. Hazırda sənədin imzalanması üçün konkret yer və vaxtla bağlı heç bir razılaşma yoxdur”, - Qriqoryan vurğulayıb.
Bu nə oyunbazlıqdır? Məgər kimsə deyir ki, Ermənistanın əlavə şərtləri var? Sülh sazişinin Ermənistan Konstitusiyasında Azərbaycana yönəlik ərazi iddiasının olmasına görə yubanması əsas səbəb deyilmi? Məgər bunu erməni rəsmilər bilmir?
“Real addımların atılmaması vaxt itkisidir və bu, ən çox Paşinyanın ziyanına işləyir”
Sözügedən məsələni “Bakı-Xəbər”ə şərh edən siyasi şərhçi Azər Həsrətin fikrincə, belə yerdə “Qız evində toydur, oğlan evinin xəbəri yoxdur” məsələ yada düşür: “Məgər burada şərt irəli sürən tərəf Ermənistandır ki, hansısa şərt irəli sürsün? Sözügedən məsələdə şərt irəli sürən tərəf Azərbaycandır və bunun üçün də kifayət qədər əsasları var. Ən azından ona görə ki, Ermənistan uduzan tərəfdir. Uduzan tərəf şərt irəli sürə bilməz. Çünki buna imkanı yoxdur. Azərbaycan qalib tərəf olduğu üçün öz şərtlərini irəli sürür. Təbii ki, qalibin şərtləri çərçivəsində də sülh müqaviləsi imzalanmalıdır. Ona görə də Ermənistan rəsmiləri ikidəbir durub bu cür bəyanatlarla çıxış etməsinlər. Azərbaycan dövlətinin də şərtləri yetərincə məqbul şərtlərdir. Yəni Ermənistanı aşağılamır, küncə sıxmır. Azərbaycan sadəcə olaraq deyir ki, Ermənistan ölkəmizə qarşı ərazi iddialarından rəsmən imtina etməlidir. Yəni Konstitusiyada dəyişiklik elə və ondan sonra oturub masa arxasına sülh sazişini imzalayaq. Deməyim odur ki, burada qaranlıq heç nə yoxdur. Ancaq təəssüflər olsun ki, praktikada biz bunun əksini görürük. Ermənistan rəsmiləri ikidəbir media qarşısında və müxtəlif toplantılarda fərqli mövqe ortaya qoyurlar. Yaxud da deyirlər ki, şərtimiz yoxdur, sülh müqaviləsini imzalamağa hazırıq. Məgər bu obyektiv yanaşmadır? Əlbəttə ki, yox. Ona görə də hesab edirəm ki, erməni rəsmiləri ciddi olmalıdılar. Ümumi danışmaqdansa, real addımlar atmalıdılar. Real addımların atılmaması vaxt itkisidir və bu, ən çox Paşinyanın ziyanına işləyir. Gələn il Ermənistanda parlament seçkiləri keçiriləcək. Artıq indidən revanşist müxalifət və kilsə Paşinyana qarşı birləşir. Üstəlik, Rusiya Samvel Karapetyanın timsalında “yeni lider” formalaşdırmağa çalışır. Ona görə də Paşinyan tələsməlidir. Bu da Ermənistan Konstitusiyasından Azərbaycana qarşı ərazi iddiaların çıxarılmasından keçir. Bunu etmək əvəzinə fərqli danışırlar. Elə bilirlər ki, daha ağıllıdılar, amma özlərini pis vəziyyətə qoyurlar”.
Vidadi ORDAHALLI
%20imtina%20etdi...%22%2C%22image%22%3A%22https%3A%2F%2Fwww.baki-xeber.com%2Fmedia%2F2025%2F06%2F21%2Ferme.jpg%3Fv%3D1750513755%22%2C%22iframe_v2%22%3Afalse%2C%22iframe_v3%22%3Afalse%2C%22t%22%3A0%2C%22cg%22%3A%7B%22isPrivate%22%3Atrue%2C%22browserName%22%3A%22Chromium%22%7D%7D%2C%22config%22%3A%7B%22page_url%22%3A%22https%3A%2F%2Fwww.baki-xeber.com%2Fsiyaset%2F230766.html%22%2C%22referrer%22%3A%22%22%2C%22user_id%22%3A%22ba5d7fd6-66c5-409d-9b28-93c4e5df6846%22%2C%22iframe_user_id%22%3Atrue%7D%7D&cb=0.7396208370545256){kind=spacer}